Read Karbi RUTH 4 Bible Online

RUTH 4 - Karbi bible

RUTH 4

¹Lapen Boaz rong anghap damsi hadak ingnilo; lapen langtha, Boaz kepu kechephopik halabangso abang vang-lo. Lapen alangli pulo, “Pu vang-ra dak nang chongnitha;” lapen alangli vangsi chongnilo.

²Lapen Boaz bang kep rongsopi arlengkesar pangrumsi pulo, “Dak chongnihurtha;” lasi halatum chongnilo.

³Ansi kechephonei abang phan alangli pulo, “Naomi, la Moab adet pen nangkechevoi abangpi edon Elimelek alongle echet jorpo.

⁴Lapen ne bangso alam nangphan thanpo, pusi mathalo, atheke dak kangnisar atum lapen ne kechepho arleng kesar atum angnole nang namnon. Nang jongsi lang jite lang detnon; kalite nephan thannon, kechiniji nening hang-lo, athe nang pen apar kelangji baduta avelo, lapen nangdun abang ke ne helo.” Lapen alangli pulo, “Ne langdetpo.”

⁵Ansi Boaz pulo, “Nang Naomi arideng pen longle kenam arni pen nang Ruth , la ke Moabpi, la kethitang abang ahemepi aphanta namlo; lapusonsi kethitang abang apoton amen pareng longpo.”

⁶Bonta kechepho nei abang pulo, “Ne la methang aphan langthekthelo, la klemlote nemethang ahem angthun avedetpo. Ne kepajok nangji adeng nang le ennon, athe ne la lang un-elo.”

⁷Hako ahut Israel adet mar kechelang lapen kechelar ajutang lahelo; alam kepathirji aphan kejor abang akeng-op chephloksi abang kaprek aphan pipo, lapen lasonsi Israel adet haki kepi ajutang do.

⁸Lasi kechephonei abang Boaz aphan “Nang methang aphanle chenamnon” pu kepu ahut alangli methang akeng-op chephlok-lo.

⁹Ansi Boaz akesar lapen rat atum an aphan pulo, “Nangtumsi hakilo, pini ne Elimelek amar an lapen Chilion lapen Mahlon amar an Naomi arideng pen nampet-lo.

¹⁰La an chot kalilang, Mahlon ahemepi, la Ruth, Moab-pita nepiso keplangjisi namtang-lo lapen ajok mar-tar kethitang abang ahemsi chedothotpo lapen alangli ro ke methang akorte-murti along lapen mahang thekvek adimsi dovetpo; pini nangtum hakilo.”

¹¹Ansi inghap along kedo arat atum an, lapen akesar atum puhurlo, “Netum hakilo. HEMPHU nanghem kevangji a-arloso Rahel lapen Leah asonle paplangnang, pima halatum banghinisi Israel ahem kimlo. Nang Ephrath aro angbong paplang-o nang lapen Bethlehem along nangnong pathedung nang;

¹²lapen nanghemta Perez ahem ason pamannang, pima Perez ke Tamar pen Judah asopolo, lason le bangpi pen ajok HEMPHU osomar nang papilonang.”

¹³Lasi Ruth aphan Boaz pondet-lo lapen bangpi alangli piso plang-lo; lapen bangpi pen dim-tar pasilo lapen HEMPHU bangpi aphan aso pachopathelong-lo, lapen asopo inut pirthe pahachelo.

¹⁴Ansi bangpi Naomi aphan pulo, “HEMPHU ahirjume atheng paplangnang pima Alangli pini nangphan adun adon pavedet-lo, ke-ora abang nangsu pitang-lo. Israel atum angbong laso a-oso amen pachethangnang!

¹⁵La nangphan chethe pareng abang lapen nang kesar ahut kelanaji abang-lo, athe nang phan kechinghonnei nangmunpi la nangsomar bang throksi an sose abangsi laso a-oso aphan amahang pathek-lo.”

¹⁶Ansi Naomi oso ensi arbak-lo lapen a-obokpi cheplang-lo.

¹⁷Lapen tebok-terei a-arloso atum laphan amen irsi pulo, “Naomi inut a-oso amahang thekpilo.” Halatum laphan Obed pusi irlo; alangli ke Jesse apo, Jesse ke David apolo.

¹⁸Perez akhei apoton la helo: Perez ke Hezron apo,

¹⁹Hezron ke Ram apo, Ram ke Amminadab apo,

²⁰Amminadab ke Nashon apo, Nashon ke Salmon apo,

²¹Salmon ke Boaz apo, Boaz ke Obed apo.

²²Obed ke Jesse apo, lapen Jesse ke David apo.