Read Karbi 1 SAMUEL 1 Bible Online

1 SAMUEL 1 - Karbi bible

1 SAMUEL 1

¹Ephraim akhei pen Elkanah pu amen inut amonit Ephraim Anglong alongsi Ramah arongsopi along dolo. La Jeroham asopo lapen Elihu asupo, lapen Tohu ahemtun asor, Zuph aro-abeng-lo.

²Elkanah apiso banghini do, Hannah lapen Peninnah. Peninnah asomar do, bonta Hannah ke inut-ta ave.

³Elkanah aningkan vangta Shiloh along Jakong Kethenei HEMPHU aphan karchoji lapen athok-heihei kepijisi Ramah pen damlo. Hadak Eli asomar banghini Hophni lapen Phinehas atum HEMPHU aphan kurusar cheplang-lo.

⁴Elkanah athok kepi aphongtinta apharman isi ke Peninnah lapen pharman isi ke la asomar abangphutin aphan ok pilo.

⁵La Hannah aphan chinghon-o seta pharman isi ansi la aphan pichot-lo, pima HEMPHU bangpi aphan osomar pavedet-lo.

⁶Peninnah, bangpi aphan panopo lapen pinrem po, Pima HEMPHU bangpi aphan osomar pipedet-lo.

⁷Lasonsi aningkan ningkan dambomlo; halatum HEMPHU ahem kedam aphongtin ta Hannah aphan Pinennah lason aning padukpo lapen pachirupo anke bangpi ajatta kechoji molo.

⁸Bangpi apenan Elkanah bangpi aphan arjupo, “Hannah, nang kopi athesi kechiruma? Nang kopisi chochedet loma? Nesomar bang kep apar ne nangphan nang chinghonhe det-loma?”

⁹Arnisi, Shiloh along halatum HEMPHU ahem along chodet aphi Hannah thurphlut-lo. Bangpi aning runpik-lo lapen bangpi HEMPHU aphan kardom ahut chiruvarret-lo.

¹⁰Halaso ahut inghap adung Eli, kurusar amethang adim chongnilo.

¹¹Hannah isi chechakthip-lo: “Jakong Kethe HEMPHU, nephan nelangtha, Nangbanpi aphan. Ne kesung nanglangtha lapen nemathatha! Nephan netengneri! Nang jongsi sopo inut nepilote, la akai isi nangphansi ne hodaipo, ne la chechak-lo lapen la aphan kaita achu ingtipte detpo.”

¹²Penang an ajirkeding HEMPHU aphan Hannah Arnam ardombom ahut Eli-ke bangpi angtur langpangthek-lo.

¹³Bangpi dojoisi ardombomlo, bangpi angtur paklemchot bonta ase ave. Lasi bangpi hor kangrilo pusi Eli mathalo,

¹⁴lapen bangpi aphan pulo, “Nangli hor kangri chepaklang var-ret-rinon! Hor kejun che-ora do pamenon!”

¹⁵“Kali, neli, hor junje akehai,” bangpi thak-lo. “Neli hor junjepinlang! Nelining oipik, lapen neli HEMPHU aphan Arnam ardombomlang, neli kesung an laphan hodailo.

¹⁶Amovangve arloso pu neli phan mathari. Neli lasonsi ardomlo pima nelining dukpik.”

¹⁷“Ningkangsam penle damnon,” Eli pulo, “Lapen nangli kehang ason Israel a-Arnam nangli papilonang.”

¹⁸“Neliphan akemele nangli pama-thaverlonang,” bangpi thak-lo. Ansi bangpi aning ke-oi hamlo.

¹⁹Puthot adap Elkanah lapen ahem asor adapprang thursi HEMPHU aphan ardomlo, lapen Ramah anat hem chedamlo. Elkanah la apiso pen dim-tar pasilo, lapen bangpi akardom HEMPHU thak-lo.

²⁰Lasi bangpi aso dolo lapen inut amahang pathek-lo. La aphan Samuel pusi bangpi amen irlo, lapen thanlo, “HEMPHU aphan ne la ardomlo.”

²¹Elkanah lapen la ahem-asor Shiloh kedamra HEMPHU aphan ningkan esek athok lapen kechechaktang kepanong athok kepi apor nangletang-lo.

²²Bonta non aphong abang ke Hannah dundedet-lo. Bangpi apenan aphan pulo, “Oso an chothek lote ne la aphan HEMPHU ahem pondetpo, hadak la akai isi dopo.”

²³Elkanah thak-lo, “Chokpo nangning kehang akeme alingle klemnon; la an chothek-lo pupe tik ke hemle donon. Lapen nang kechechak ason HEMPHU-le ahok paplang-lonang.” Lasi Hannah hemsi dokok-lo, lapen asopo aphan chelanalo.

²⁴La aphan bangpi an chothek-lo pu pen bangpi la aphan Shiloh along pondet-lo, lapen ningkan kethom achainong-alo , him aduk lin kep, ok-reng ajarong isithup drakha ahorlang ponlo. Bangpi oso bihek Samuel aphan HEMPHU ahem Shiloh along ponlo.

²⁵Halatum chainong thudet aphi oso Eli angno halatum pondet-lo.

²⁶La aphan Hannah pulo, “Neliphan neli diya tha, akehai. Neliphan nanglining dolangma? Neli helo ladak karjapther pen HEMPHU aphan kardom abangpilo.

²⁷Laso a-oso kelongji aphan HEMPHU along neli hang-lo, lapen Alangli neli kehang atengsi nelipilo.

²⁸Lasi HEMPHU arideng laso a-oso neli hodailo. La achethe dotik an la HEMPHU apharmanlo.” Anke halatum hadak HEMPHU aphan archolo.