Read Karbi 1 SAMUEL 12 Bible Online

1 SAMUEL 12 - Karbi bible

1 SAMUEL 12

¹Anke Israel arat aphan Samuel pulo, “Nanglitum nangpaklemtoi akam neli klemtang-lo. Nanglitum aphan kepangrijisi recho inut nanglitum aphan nangpitang-lo,

²non alangli nanglitum aphan pajalongnon. Neli ke sartang-lo lapen nelichu lokpup-lo, lapen nelisomar nanglitum along dolo. Neriso ahut pen non pu anta neli nanglitum ajalinlo.

³Neli ladak dolo. Jongsi neli kechoklem chokche pulote non nedinnon HEMPHU lapen la kangvaitang arecho angno. Neli mane achainong api lapen agadha ponpidet-loma? Mane aphan neli chobei loma lapen chenek-loma? Mane pen neli tangka chodeng chonghuloma? Lahei angbong jongsi neli klemlo pulote, neli kepontang amar voithu-etji.”

⁴Rat atum thak-lo, “Kali, nangli cho-beibe lapen nechenekne, nangli badu penta thangnat amar ta pondetde.”

⁵Samuel thak-lo, HEMPHU lapen la kangvaitang arecho helo pini ahakilo, nanglitum neliphan thangnat adai thek-longle pu kepu. Kalang! HEMPHU-si hakilo, halatum thak-lo.

⁶Samuel ningjebomlo, “HEMPHU ke Moses lapen Aaron aphan kangvai abang-lo, lapen nangliphusar atum aphan Ijip pen kevan abang-lo.

⁷Non nanglitum kedo adim arjapnon, lapen nanglitum aphan pachemathathu pen ajok neli nangdinlang, kosonsi HEMPHU manghumeme akam keklem pen nanglitum lapen nangliphusar atum aphan kepajok-loma?

⁸Jakob lapen la ahemtun atum Ijip damlo lapen Ijip asor latum aphan chenek-lo, kerap kelongjisi nangliphusar atum HEMPHU aphan hangjolo, lapen alangli Moses lapen Aaron aphan toilo, lapen halatum aphan Ijip pen vandetsi laso alongle along padolo.

⁹Bonta rat atum halatum a-Arnam HEMPHU aphan tengnedet-lo, lasi Philistia atum lapen Moab lapen Sisera arecho, Hazor arongsopi aron-aso ahemphu atum la nangphusar atum abe pathursi pachedanlo lapen halatum aphuthak pahaidet-lo.

¹⁰Ansi halatum kerap kelongjisi HEMPHU aphan hangjolo lapen pulo, ‘Netum pap klemtang-lo, pima netum nang pen suitang-lo, HEMPHU, lapen Baal lapen Astarte akumlinsi ardom-rong-lo. Netum ahotur atum pen nepajoktha, lapen netum nangphansi archopo!’

¹¹Lapen Gideon, Barak, Jephthah lapen kejutsi neliphan HEMPHU nangtoilo. Netum abangphutinta nangtum aphan hotur pen pajok-lo lapen nanglitum aphan HEMPHU-si jokvanpen padolong-lo.

¹²Bonta Ammon arecho Nahash nanglitum aphan ketengkhengji thek-long-lo, nanglitum HEMPHU aphan nanglitum arecholo pu ingvaivedet-lo lapen neliphan pulo, ‘Nelitum aphan kepangri abang inut arecho netum nangji.’”

¹³Non nanglitum kangvaitang arecho ladak dolo, la aphan nanglitum hang-lo, lapen non HEMPHU la nanglitum aphan nangpidet-lo.

¹⁴Kadokaveta mesen pen dampo, jongsi nanglitum nang Arnam HEMPHU aphan manpilote, ingduk lote, laphan alam arjulote lapen la ahukum kroipet lote, nanglitum lapen nanglitum arecho la aphan kroipet-lote, mesen.

¹⁵Bonta nanglitum jongsi HEMPHU alam arjujera la ahukum kroikrelote la nanglitum lapen nanglitum arecho abe thurpo.

¹⁶Lasi nanglitum kedo aling ladak arjapnon lapen HEMPHU akethe akam keklem nanglitum thek-longpo.

¹⁷Non ningkreng asek-lo, kalima? Bonta neli Arnam ardompo lapen HEMPHU cheter lapen arve nangtoipo. La plang-lote nanglitum chechinipo, nanglitum recho inut kehangke HEMPHU aphan langplotsi pap klemlo.

¹⁸Anke Samuel arnam ardomlo, lapen halaso arni HEMPHU cheter lapen arve nangtoilo; anke kedo-an arat atum HEMPHU lapen Samuel aphan pherepik-lo.

¹⁹Anke kedo-an arat atum Samuel aphan pulo, “Nelitum kethithedetjile HEMPHU nangli Arnam aphan nangliban atum apharman Arnam neli ardompitha, pima nelitum methang aphan inut arecho kechohang pen ajok nelitum apap along laso kehingno batdunthulo.”

²⁰Anke rat atum aphan Samuel thak-lo, “Phereri; nanglitum lapuson kehingno akam klemlo seta, HEMPHU pen nangtum kat-ri. bonta la aphan nangning kedo-an pen ingduknon.

²¹Ahok-he a-arnam-heihei aphi dunrinon, halatum nanglitum aphan thangnatta nangrap thekthe, athema halatum ahok kali.

²²HEMPHU nanglitum aphan chechakthip-lo, Alangli nanglitum aphan nang-o-elo, athema la nanglitum aphan amethang arat aso kepaplangjisi phartang-lo.

²³Neliphan ke HEMPHU aphan langplotsi nanglitum aphan kardompipe pen pap nepaklem longlenang. La kali si nanglitum aphan kopima akeme ason neli nangthanpo.

²⁴Nanglitum aning kedo-an pen HEMPHU aphan kroithipnon lapen ingduknon. Nanglitum aphan la akethe akam nang keklempi ason chemathatu.

²⁵Bonta nanglitum jongsi pap klemverlote nanglitum lapen nanglitum arecho aphan pavirdetpo.”