Read Karbi 1 SAMUEL 15 Bible Online

1 SAMUEL 15 - Karbi bible

1 SAMUEL 15

¹Sol aphan Samuel pulo, “HEMPHU Israel arat aphuthak recho kepachoji nangliphuthak jangthu kepatipjile la nangketoi bangphu neli helo. Non Jakongkethe HEMPHU kopisi kepuma arjutha.

²La Amalek arat aphan adukpipo, pima Israel atum Ijip pen kevang ahut halatum aphusar atum khamkhedunlo.

³Damra Amalek atum aphan tengkhengnon, lapen halatum kedo ason an pavirklungnon. Isibak amarta pajok-longri. Kedo-an pinso-arlo, osomar, kethi-ivok; chainong, biresak, ka-ut kedo-an lapen gadha kedo-an lahei pathi-etnon.”

⁴Sol kedo-an kechedan asong aphan hangpet-lo lapen Telem along halatum aphan lakhalo. Israel pen ron-aso suri 200, lapen Judah pen suri kep dolo.

⁵Anke la lapen la amonit kedo-an Amalek arongsopi damsi langkung kekrengtai ajo chepatuklipsi inghongding-lo.

⁶Israel atum Ijip pen kevang ahut aphusar atum kangjinso dun Ken asor aphan pacheretoilo: “Damnon lapen Amalek atum pen che-onon anke ne halatum pen pen nangtum aphan nangpathirap petpe detpo.” Lasi Ken aso atum kat-et-lo.

⁷Amalek aphan Sol paremdet-lo. Havilah pen Shur, la ha Ijip anihang an chedanlo;

⁸la Amalek arecho Agag aphan akereng nepchek-lo lapen kedo-an arat aphan pathilap-lo.

⁹Bonta Sol lapen la amonit atum Agag achethe pajok-lo, lapen akemenei abiresak lapen achainong, chainong aso lapen biresak aloso, mate akeme amar an pathithedet-lo; ale kave lapen amokevangve amar an si halatum pavirchot-lo.

¹⁰Samuel aphan HEMPHU pulo,

¹¹“Sol aphan Ne recho kebat apot ningduk-lo; la nepen suitang-lo lapen Ne hukum-heihei kroikrelo.” Samuel aningthilo, Jopangthang la HEMPHU aphan choningrilo.

¹²Puthot adap Sol aphan kechetongjisi la damlo. Sol ke Karmel arpongso anat damtang-lo pu la arjulong-lo, hadak amethang anong kechekimo ahem kekim adimlo, lapen la Gilgal anat damlo.

¹³Samuel Sol along an arludamlo lapen la Samuel aphan pulo, “HEMPHU nangphan pahirjume nang, Samuel! Neli HEMPHU ahukum kroipet-lo.”

¹⁴Samuel arjulo, “Tangte kopisi chainong lapen biresak kangreng ase ne karjulong nangkok-lo?”

¹⁵Sol thak-lo, “Ne monit atum lahei Amalek atum pen vanlo. Halatum nangli Arnam HEMPHU aphan kethokjisi akemenei abiresak lapen achainong chobilo, lapen ahin an ke nelitum pavir-et-lo. ”

¹⁶“Do joinon.” Samuel hukum pilo, “Lapen kopisi HEMPHU atove neliphan kepuloma neli nanglithanlang.” “Nangthannon, “ Sol pulo.

¹⁷Samuel thak-lo, “Nangmethang aphan thangta kali pu jonghe chepu seta nangli Israel ajalin lo. Nangliphan HEMPHU Israel aphuthak recho bat-lo,

¹⁸lapen kehingno Amalek atum aphan kepavirjisi nangliphan hukum pisi toitang-lo. Halatum aphan pathi-et-etik ke chedanbom nangji pusi alangli hukum pitang-lo.

¹⁹Tangte kopisi la aphan nangli kroikredet-loma? Kopisi nangli kethipon amar aputhak anat lapen HEMPHU aphan aningpadokde akam klemtong-loma?”

²⁰“Neli HEMPHU aphan kroilo, “ Sol thak-lo. “La kepu atengsi neli damlo lapen Agag recho aphan vandet-lo lapen Amalek kedo-an aphan pathi-et-lo.

²¹Bonta nelimonit atum kemenei abiresak lapen achainong halatum kelong an pathithedet-lo; la vivesi halatum lahei ladak Gilgal along nangli Arnam HEMPHU aphan kethokjisi vanlo.”

²²Samuel pulo, “HEMPHU kopilo aning kedoknei: Kekroi mate dan lapen athok-heihei la aphan akemenei abiresak pen kethok mute la aphan kekroi memu.

²³La abe kethur ke maja kanghoi atum kehingno asonsi hingnolo, lapen ane chepathe ke kumlin kardom apap asonlo. Alangli hukum nangli dengdelo apotsi; la nangliphanta recholo pu dengdelo.”

²⁴“Kalang-lo, neli pap klemtang-lo,” Sol thak-lo. “Neli HEMPHU ahukum lapen nangli kepinkhat-heihei kroikretang-lo. Nelimethang amonit aphan neli pherelo, lapen halatum aning kehang alingsi klempilo.

²⁵Bonta neli nangliphan choningrilo, neli pap kedo-an diyara nelilong nangduntha, anke neli HEMPHU aphan archo thekpo.”

²⁶“Neli nanglilong nangdunde,” Samuel thak-lo. “Nangli HEMPHU ahukum kroikrelo lapen Alanglita nangliphan Israel arecho pu dengdelo.”

²⁷Anke Samuel ke-ojisi chetevarlo, bonta Sol la ape otdunhet-lo, lapen la chingsek cherlo.

²⁸La aphan Samuel pulo, “Pini nangli pen Israel Recho-arat ingsektang-lo, lapen nangli par keme muchot anut kaprek aphansi la pidetpo.

²⁹Israel adak-atur Arnam chobeibe mate aning chelarle. La monit kali, alangli aning chelarle.”

³⁰“Ne pap klemtang-lo,” Sol thak-lo. “Bonta ne rat ajalin atum lapen Israel angno asap-o aman nepitha. Nelilong nangduntha anke neli nangli Arnam HEMPHU aphan archo thekpo.”

³¹Ansi la along Samuel dunlo, lapen HEMPHU aphan Sol archolo.

³²“Agag recho nelilong ladak vannon, “ Samuel hukum pilo. La angno Agag recho vang-lo, pheresi a-ok klemhurlo, amethang aphan chemathalo, “Kethi la ko-an akeho!”

³³Samuel pulo, “Nangnokjir pen ongdung apei aphan aso pavelo, lasi non nangpei ta asopo avedetpo.” Lapen la Agag aphan Gilgal adovan athengno ingthan-i-ilo.

³⁴Ansi Ramah anat Samuel damlo, lapen Sol Recho ahem Gibeah anat chedamlo.

³⁵Samuel rengtik an, la arecho aphan cheklangkledet-lo; bonta la aphuthak la aningdukpik-lo. Sol aphan Israel arecho kebat aputhak HEMPHU-ta aning che-oilo.