Read Karbi 1 SAMUEL 17 Bible Online

1 SAMUEL 17 - Karbi bible

1 SAMUEL 17

¹Judah arong Sokoh pu along Philistia atum ron kechedanjisi chingrumpet-lo; lapen ajehak adak Ephis Dammim adimsi halatum mukam chekimlo.

²Sol lapen Israel atum Elah Arlok alongsi mukam chekimlo, lapen hadaksi Philistia atum pen ron kechedanji aphan chesik-lo.

³Philistia atum ehin anat anglong along aren arjapsarlo, lapen Israel atum akaprek anat arjapsarlo, latum angbong arlok isi dolo.

⁴Gath arongsopi pen Goliath pu inut amonit Israel atum pen kechedanjisi Philistia amukam pen nangbarlo.

⁵La ajon ingrup throk ra echak lapen tam-angchin ke-er aphutup ta chekup.

⁶Akeng-heihei ta tam angchin apindeng pen chebang-lo, lapen la tam angchin achir aphang athak an chevek-lo.

⁷La achir harpi abe asonsi arthat-lo, lapen chir aplang kardik lin throksi anbak do. Inut aron-aso la angno damsi la achong ponpilo.

⁸Goliath arjapthersi Israel atum aphan hang-lo, “Nangtum hadak kopisi keklemlo, ron kechedanji aphan aren arjapnon? Ne inut a-Philistia, nangtum Sol aban! Ne pen kechedanjile nangtum angbong pen inut chingvainon.

⁹Hala jongsi haidet-lo, pulote, nephan pathipo lapen netum nangtum aban plangpo; bonta ne jongsi haidet-lo pulote, nangtum kedo-anta netum aban plang nangpo.

¹⁰Ladak ne nangtum Israel aron-armu aphan ladak kechedanji aphan phalo. Ne pen pachedan-rappetji aphan nangtum angbong pen inut aphan ne hang-lo.”

¹¹Sol lapen la amonit atum arjulongsi halatum pherelo.

¹²David ke Judah along Bethlehem pen Ephrath asor Jesse asopo. Jesse asomar bang nerkep do, lapen Sol recho kecho ahut la sarru amonit-lo.

¹³Ron kechedanjisi la asomar bangkethom ke Sol alongsi dunlo. Aklengsi ke Eliab, adun abang Abinadab lapen kethom adun abang Shammah.

¹⁴David ke aso akebineilo, lapen a-ik atum bangkethom Sol along kedodun ahut,

¹⁵David Sol pen ha Bethlehem apo abiresak kelangjisi ahut adak helatbom.

¹⁶Goliath arnivang adap lapen arnikangsam ni 40 an Israel atum kechedanji aphan phalo.

¹⁷Arnisi David aphan Jesse pulo, “La sangkarnu lin 10 lapen him plang 10 lahei ponserak ra mukam kedo nang-ik atum along damseraknon.

¹⁸Lapen la chulang athu plang kep hukum kepi ahemphu aphan ponpinon.” Nang-ik atum mephun-langma pura arjunon, lapen halatum aphan nang mesenlang pu thek-longvek-lo pulote, laso angthek pini amat nang birta vannon.

¹⁹Sol recho lapen nang-ik atum lapen Israel kedo-an atum Philistia atum pen kechedanjisi Elah Arlok alongsi dolo.

²⁰Puthot adap David thurdap-prangsi biresak kelang akam mane aphan pektekangsi an ponlo lapen la aphan Jesse kepu atengsi damlo. Israel atum kechedan damjisi aren karjap lapen ron kechedan akehang hangjo ahut David ledunlo.

²¹Philistia lapen Israel aron-armu atum kechedanjisi kedo adim charjap-rep-lo, pu pu chepangno phrong-lo.

²²An kepador ahemphu aridengsi David an tekang-lo, lapen ron karjap adim kat-lo, lapen a-ik atum along damlo lapen halatum kopusonma arjulo.

²³Halatum pen chingkibom ahut Goliath vangchotsi aphrang asonthot Israel-atum pen kechedanji aphan phalo. Lapen David la arjulong-lo.

²⁴Israel atum Goliath aphan thek-longsi pherelo lapen kat-lo.

²⁵“Laphan langtha!” Pusi halatum lahin lahin chepulo. “La ron kechedan akepha arjutha! La aphan kepathi un aling abangphan Sol recho isi thedung anong-e kepiji chechak-lo, lapen recho asopi la bangphan penan chopidetpo, lapen la abang apo ahemtun pen midu ta pinangnelo.”

²⁶Adung abangphan David arjulo, “Laso a-Philistia aphan kepathi abang lapen Israel aphan non ason kepinrem pen kepajok abang kopi longji? Jat seta la kereng aron-armu Arnam aphan kepinrem akekroikre a-Philistia komat-lo?”

²⁷Goliath aphan kepathi abangphan kopi pipoma, la aphan than-et-lo.

²⁸David a-ik akleng Eliab, halaso amonit pen David kechingki alam arjudun long-lo. La David aphan aningthisi pulo, “Nang ladak kopi akamlo? Kejejangtang ajo ingtan along halahei abiresak komatsi kelang-lo? Nang ke oso! Nang ron arong kelangjitong kevangma?”

²⁹“Non ne kopisi keklemlo?” David arjulo. “Ne lam etheta arju kartangma?”

³⁰La anut kaprek aphan chetevarsi lasonthot arjulo, lapen aphongtin akarjuta la esonnat akethaksi la long-lo.

³¹Ajehak amonit atum David kopisi keningjema arjudun long-lo, lapen halatum Sol aphan thanserlo, lapen alangli laphan pahangdet-lo.

³²Sol aphan David pulo, “Recho badutame laso a-Philistia aphan phere nangne! Neli damsi la pen chedanpo.”

³³“Kali” Sol thak-lo, “Nangli kosonsi la pen chedanpoma? Nangli inut osohek-lang, lapen hala ke bang akai arjonsi ron aso keplang!”

³⁴“Recho,” David pulo, “Nelipo abiresak neli kelang ahut, hingho lapen thokvam biresak chonep-lo,

³⁵neli la aphi dunsi la aphan tengkhengpo lapen biresak aphan pajokpo, lapen hingho lapen thokvam jongsi nelinat pangnokhrap lote, neli la achethok ingkep-hetpo lapen la aphan arbusi pathipo.

³⁶Neli hingho lapen thokvam pathitang-lo, lasonthotsi la kereng-et aron-armu Arnam aphan kepinrem akekroikre a-Philistia aphanta klempo.

³⁷Hingho lapen thokvam atum pen HEMPHU neliphan pajok-lo, laso a-Philistia pen Alangli nepajokpo.” “Mesenlo,” Sol thak-lo, “Damnon, HEMPHU nanglilong padonang”

³⁸Alangli methang ron kechedan apindeng David aphan pachepindengjisi la aphan pilo: tam ingchin aphutup isi, la David aphu athak kup-lo, ron apindeng achoi,

³⁹Sol anokjir ron apindeng athak David chesek-lo lapen kengkam kechejorji bor-ilo, bonta la un-edet-lo, pima lahei la kaita chepindengde pinlang. “Lahei pen neli chedan-i thekthe,” Sol aphan la pulo, “Neli lahei rimre pinlang.” Lasi lahei la chephlok-et-lo.

⁴⁰La biresak kevi achin cheponsi longkoiso akenaibot mupho langso pen humponlo lapen ajarong arlo lahei chethap-lo, lapen phamri pen kevar abathuli chesiksi Goliath pen kechetongjisi damlo.

⁴¹Philistia abang David anat kevang pangcheng-lo, la angno ron arisim kepon abang pen vangbomsi patebok-lo,

⁴²lapen la David aphan langpamesi la aphan inghon pangtung-lo, pima la bihek a-osolang, kelang langmechit a-osolang.

⁴³David aphan la pulo, Halaso achin ke kopi aphanlo ko? Ne methan putong nang kemathama? David aphuthak a-arnam amen pen ahirjuno hang-lo.

⁴⁴“Vangnon,” la David aphan phalo, “Lapen nang-ok ne vo lapen marat api aphan pisi pachodetpo.”

⁴⁵David thak-lo, “Nang nokjir, chir, lapen kejor achir pensi nelong kevang, bonta neke nang kepinremtang Israel aron-armu Arnam, Jakong kethe HEMPHU amen pensi nanglong vang-lo.

⁴⁶Pini arni nephuthak HEMPHU ajakong batpo lapen ne nangphan paremdetsi nangphu ingthan pongpo, lapen Philistia abang arpum a-ok votek voso aphan lapen marat api aphan pisi pachopo. Anke Israel atum along Arnam inut do pu pirthe adang atum chinipo.

⁴⁷Lapen ladak kedo abangphutin ta HEMPHU ke nokjir mate chir-heihei pen la arat aphan kepajokji aphan nangne pu chinipo. Alangli ke ron along haiverlo, lapen la nangtum kedo-an aphan netum ajakong arideng hodaidetpo.”

⁴⁸Goliath puthot David anat kedam pangcheng-lo, lapen Philistia pen ron aren kechedanjisi David la anat kat paprap-lo.

⁴⁹La ajarong arlo ari chephusi longkoiso emu enlo, la pen Goliath anat ap-lo. Halaphan la atehang rosi aphu ap-dak-lo. Lapen Goliath longle athak kreptak-lo.

⁵⁰Lasi nokjir avepin pen David paremsi Goliath aphan phamri pen kevar abathuli lapen longkoiso emu pen pathilot-lo.

⁵¹La adung la katvirsi la athak ardontanlo, lapen Goliath anokjir ahom pen nokjir satsi la aphu ingthanpong-lo lapen la aphan pathilo. Philistia atum halatum anokbe kethi thek-longsi latum kat-lo.

⁵²Israel lapen Judah amonit atum hangjolo, lapen halatum aphi aphi hungdunlo, Gath lapen Ekron anghap anat an tovarsoding halatum hungdunlo. Shaar-aim adovan anat kedam Gath lapen Ekron atovarsoding Philistia atum chingkoisi akeng so-olo.

⁵³Philistia atum aphan kehungdun pen Israel atum nangchevoisi halatum amukam along latum mar thiponlo.

⁵⁴Goliath aphu David humsi la Jerusalem anat pondet-lo, bonta Goliath aron-arisim la amukam along chebilo.

⁵⁵Goliath pen David ron kechedan kedam ahut ron-armu hukum kepi abangphu, Abner aphan Sol arjulo, “Abner, la komat asopolo?” “Neli chinine, Recho,” Abner thak-lo.

⁵⁶“Tangte damra arjudamnon,” Sol hukum pilo.

⁵⁷Lasi Goliath aphan David pathidetsi amukam kechevoi ahut, la aphan Abner, Sol along pondet-lo. Halaso ahut anta Goliath aphu David otdinglang.

⁵⁸La aphan Sol pulo, “Riso nangli komat asopolo?” “Neli ke Bethlehem asor nangliban Jesse asopo,” David thak-lo.