Read Karbi 1 SAMUEL 18 Bible Online

1 SAMUEL 18 - Karbi bible

1 SAMUEL 18

¹Sol lapen David latum kechingki pajut-lo. Laso aphi David aphan Sol asopo Jonathon aning dok-khak-lo. La aphan amethang asonthot kanghonjisi vang-lo.

²Halaso arni pen David aphan la along Sol padodunlo, lapen ahem pachedam toitedet-lo.

³La aphan aning kedok ongsi David aphan Jonathon kejutje pin pajirpo aseme tang-lo.

⁴La kechekok vamri chephloksi la David aphan ron arisim pen pen pilo, lapen la anokjir, athai lapen vamkok ta pilo.

⁵Sol ketoi akam an David keklem pachunpilo, lapen la aphan la aron-armu achakri Sol bak-lo. Laso akam Sol achakri lapen amonit atum an la aphan aningdok-hurlo.

⁶Goliath aphan pathidet aphi, David lapen ron-aso atum hem kechevoi ahut, arlosopimar atum Israel arongtin pen Sol recho aphan kechetongjisi nangbarlo. Halatum aning karong alun lunsi kanlo, lapen mirdong-prakso-heihei thip-lo.

⁷Halatum ketalon ahut arlosopimar atum lunlo, “Sol ke suri pathilo, bonta David ke suri kep pathilo.”

⁸La Sol aningdokde det-lo, lapen la aning thipik-lo. La pulo, “David aphan halatum bangsurikep hok-lo, bonta nephan ke suri isi vet. La aphan latum nedun recho batpo!”

⁹Lapen halaso arni pen la David aphan lang-un-elo lapen hontheverlo.

¹⁰Arnisi Arnam pen karjonglangno Sol along vangsi plengset-lo, lapen la amethang ahem ingcham amonit asonsi ningjetap-lo. David abang ke kai asonthak-thaksi kumbeleng ardengbomlo, lason ahut, Sol abang chir otdongsi,

¹¹“Ne la aphan arpong along jor pacherap-hetji,” pusi amethang chepulo, lapen bataihini la anat chir jorlo; bonta aphongtinta David cheseraichorlo.

¹²David aphan Sol pherelo, pima la along HEMPHU dolo, bonta alangliphan ke obub-lo.

¹³Lasi la aphan Sol angno pen toisi bangsuri isi anokbe ahemphu bat-lo. Anke alangli la angno pen damjuilo lapen rat atum alongsi dolo.

¹⁴Lapen la keklem alingta chunlo, pima la along HEMPHU dolo.

¹⁵David kepachun akam Sol thek-long-lo lapen la aphan aphi-ong phere-ong-lo.

¹⁶Israel lapen Judah along abangphutin amonit David aphan inghonlo, pima la inut kepachunthek ajalinlo.

¹⁷Anke David aphan Sol pulo, “Nelisopi akleng Merap ladak dolo. Bangpi nangliphan neli piso nangchopipo, bangpi nangli piso plangpo, jongsi nangli neliphan inut angthin kethe lapen kekroithirklong aron-aso ason neliphan ingduk-lote.” (Sol mathalo, lason pen David aphan Philistia atum pathilotpo, laso akam amethang klemvek nangnelo.)

¹⁸David thak-lo, “Neli lapen nelihemtun kopilo, neli recho a-osa keplang nangji?”

¹⁹Bonta David aphan Merab kepi apor nangkele ahut ke la aphan pipesi anut kaprek amonit Meholah pen Adriel pu aphan penan chopidet-lo.

²⁰Tebonseta, Sol asopi Mikal ke David pen aningchedok-lo, lapen laso alam Sol arjulong-lo, la aning dok-olo.

²¹La amethang chepulo, “David aphan ne Mikal si chopipo, bangpi pen ne la aphan moipo lapen Philistia atum pen ajok la aphan pathitoipo.”

²²La achakri atum aphan hukum pisi David aphan papujoitoilo, “Recho nangliphan aning nangdok-o lapen la achakri atum anta; non helo la asopi pen kechepangri apor kemelo.”

²³Lasi laso alam halatum David aphan thanlo, lapen la thak-lo, “Recho a-osa kemanlong ke isi aman kethe-o anong-lo, neli son ningjoino lapen keduk aso aphan the-ongchot-lo.”

²⁴David keputang alam Sol aphan achakri atum than-et-lo,

²⁵lapen David aphan kepathanjisi halatum aphan Sol hukumpilo. “Piso anam nangli pen recho kenangjike bangpharo a-Philistia kethitang atum a-ok kangduk achet vanpinangji, la ahotur aphuthak alar kehui ason manpo.” (Lasonsi Philistia atum arideng Sol ke David aphan pathitoilo.)

²⁶Sol, keputang alam achakri atum David aphan thanlo, lapen recho a-osa kemanjisi David aning cheparong lo.

²⁷Anke David thursi amethang amonit atum pen damsi bang pharohini a-Philistia amonit aphan pathilo; lapen David halatum achelek angchun vanlo, lahei aphai ateng Recho aphan pi pamelo. Lasi David aphan Sol ke asopi Mikal penan chopi nangkok-lo.

²⁸David along HEMPHU dolo pu Sol chinipamelo, lapen la asopi Mikal ta laphan chinghon pamelo pu la chinilo.

²⁹Lasi David aphan ansose la pherelo, lapen la rengtik an ahotur ason plang-lo.

³⁰Philistia aron-armu vangsi chedanpo, bonta akaprek achakri atum apar ta David aphongtin hailo. La apotsi David anong kejume chethanghulo.