Read Karbi 1 SAMUEL 19 Bible Online

1 SAMUEL 19 - Karbi bible

1 SAMUEL 19

¹Asopo Jonathon lapen kedo-an achakri atum David aphan kepathiji kemang alam than-et-lo. Bonta David aphan Jonathon aningdokpik,

²lapen la aphan la pulo, “Nelipo nangliphan kepathijisi bor-ilo. Penap adap cherepametu; pine kechininepin adim chepatu damra hadak dokoknon.

³Neli damsi nangli kechepatu arit ajo nelipo adung arjappo, lapen nanglilam nelipo aphan nelithanpo. Jongsi pine neli long-lote neli nangliphan than pachinipo.”

⁴Sol angno David aphan Jonathon rolo, lapen pulo, “Akehai, nangliban David aphan thangnat akehingno klemri. Alangli nangphan thangnat akehingno klemklelang; seta la keklem asontin nangphan akerap ketheneisi klemlo.

⁵La Goliath aphan kepathi ahut amethang apran chesongdut-lo, lapen Israel aphan HEMPHU isi akethenei akehai pahailong-lo. La nang kethek-long pen nangning arong-lo. Tangte kopisi nang non adai kave amonit aphan kephangnoji ninghang-lo lapen David aphan kepathiji aron thangnat ta ave!”

⁶Jonathon kepu alam Sol kroilo, lapen HEMPHU amen pen David aphan pathithelo pusi semetang-lo.

⁷Lasi David aphan Jonathon hang-lo. Lapen kadokave alam laphan than-et-lo; anke laphan la Sol along pondet-lo, lapen aphrang asonthak thaksi Sol aphan David ingduk-lo.

⁸Philistia atum pen puthot ron thurthulo. Halatum aphan David tengkhengsi parempamelo, lapen halatum kedo-an kat nang-et-lo.

⁹Arnisi HEMPHU pen karjonglangno vangsi Sol aphuthak plengset-lo. La amethang ahem chir otdongsi ingnilo, lapen David ta hadak kumbeleng ardengbomsi do.

¹⁰David aphan Sol achir pen kejorbopji bor-ilo, bonta David cheseraisi chir arpong along jorchok-lo, David katjuisi chepajok-lo.

¹¹Halaso ajo amat Sol ajehak amonit David ahem toisi la aphan puthot adap kepathijisi patondamlo. David apiso Mikal la aphan pacheretoilo, “Nang jongsi paningve damde pulote, penap ke nang kethitangpo.”

¹²Bangpi la aphan inghapso pen arum pasunjoilo, lapen la katjuilo, lapen chepajok-lo.

¹³Anke bangpi hem kumlin ponsi hongplang athak la bat-lo, puhui isi bisi la aphu along bi angmi bilo, lapen la aputhak harlup pamelo.

¹⁴David aphan Sol amonit atum keri ahut Mikal halatum aphan la aphu keso pusi thanlo.

¹⁵Bonta halatum aphan Sol toithusi halatum methang amat David aphan palangdamtoilo. Halatum aphan la hukum pilo, “Ahongplang pen la aphan ladak vandet-non, lapen ne laphan pathilotpo.”

¹⁶Halatum arlo damsi hem kumlin ahongplang athak lang-lo lapen la aphu along bi angmi apuhui long-lo.

¹⁷Mikal aphan Sol arjulo, “Kopisi nang lapuson nechongthui loma? Lapen nehotur aphan pajok-loma?” Bangpi thak-lo, “La neliphan pulo, jongsi ne laphan kepajokji rapdunde pulote nephan la pathilotpo.”

¹⁸David katjuisi Ramah anat Samuel along damlo, la aphan Sol keklem an angton pen thanlo. Anke la lapen Samuel Naioth anat damsi hadak sakok-lo.

¹⁹David, Ramah along Naioth si dopu thanlo,

²⁰lasi la aphan kepangnang jisi ajehak amonit toilo. Halatum esong amontri atum kekan hangjo thek-long-lo, lapen Samuel halatum ajalinlo. Anke Sol amonit atum aphanta Arnam akarjong pen plengset-lo, lapen halatum anta kansi hangjolo.

²¹Laso alam Sol arjulongsi la ongdung apherangke atum aphan toilo batai kethom aphong, lapen lasonthotsi halatum aphanta plang-lo.

²²Ansi la amethang amat Ramah anat vang pangcheng-lo. Seku along langtukpi alang la nanglesi, Samuel lapen David konat-lo pu la arjulo, lapen halatum Naiothsi do pu halatum thanlo.

²³Hadak la damsi latum aphan ta Arnam akarjong si jalo, lapen latum kansi hangdunjolo, ha Naioth atovarsoding anta.

²⁴La apindeng chephloksi Samuel angno kansi hangdunlo, lapen halaso arni ape-ari avepinlo ha jopangthang antalo. (Lake aphrang kechethan kepu alam ateng-lo, “Sol ta inut amontri plang-loma pu.”)