Read Karbi 1 SAMUEL 22 Bible Online

1 SAMUEL 22 - Karbi bible

1 SAMUEL 22

¹Gath arongsopi pen David katsi Adullam arong adung alongku along damlo. Haladak David do pu a-ik atum lapen ahemtun asor arjulongsi kedo-anta la along chelangdunlo,

²Kechenek kepho arat atum, mate kepinangji kedo mate aning kangsamse arat an la along damlo, kadokave bang 400 amonit dolo lapen la halatum ajalin plang-lo.

³David hadak pen barsi Moab adet Mizpah anat damlo, lapen Moab arecho aphan pulo, “Neliphan Arnam kopisi keklemjima la neli chininetik kanghon pen nelipo nelipei pavanglongra nanglilong padonang.”

⁴Lasi recho arideng David apo-apei otekangsi longku arlo chepatu nangtik an halatum hadak dolo.

⁵Anke Gad amontri David along vangsi pulo, “Ladak dori, Judah adet non amat dam iknon.” Lasi David osi Hereth anampi ajo damlo.

⁶Arnisi Sol, Gibeah along kedo un ahut alangli inglong angsong tantuli arong arum kangni un ahut alangli rideng chir do lapen alangli chakri atum alangliphan komjaisi do. David lapen la amonit atum aphan thek-long-lo pu la aphan than pachinilo,

⁷lapen achakri atum aphan la pulo, “Arjutha, Benjamin amonit atum! Nangtum kedo-an aphan David longle lapen drakha aberi nangpiji lapen nangtum aphan la achakri nang paplangpo putong nangtum kemathama?

⁸La apottong nangtum nebethurloma? Nangtum inutbakta David pen nesopo isivet pu nethanthe. Nangtum baduta nephan mathathe lapen nemonit inut non amat nephan kepathijisi David kerivung-lo lapen nesopota la aphan aning pathedunlo pu nethanthe!”

⁹Sol achakri atum pen Doeg ta arjapdunthersi la pulo, Nob along kedo Ahitub asopo Ahimelek along David kedam neli thek-long-lo.

¹⁰David kopisi keklem nangjima HEMPHU aphan la arjupilo, lapen David aphan la ajehak a-an lapen Philistia aso Goliath anokjirta pidunlo.

¹¹Kurusar Ahimelek lapen la adon arap kedo-an aphan Sol recho pahangtoilo lapen halatum Nob along kurusarlo, lapen halatum la along vangpet-lo.

¹²Ahimelek aphansi pulo, “Arjutha, Ahimelek!” “Nangli kepu atengsi chesik-lo, akehai,” pusi la thak-lo.

¹³La aphan Sol arjulo, “Kopisi nangli lapen David neliphan kephangnojile nelibe kethurloma? Kopisi la aphan ajehak a-an lapen nokjir kepidunloma? Lapen laphan Arnam karjupiloma? Non la nebe thurlo lapen neliphan kepathijisi asai rilo.”

¹⁴Ahimelek thak-lo, “Nangli kelong angbong David helo inut kekroithirklong achakrilo! La nangli osalo, nangli ingphun kerai anokbelo, lapen nangli kangsai amei along kadokaveta man kepihur abangpolo.

¹⁵Ahok, la aphan neli Arnam arjupilo, lapen la nonchot kali. Nangliphan kephangno alam ke, recho nangli neliphan lapen nelihemtun aphan lambok nangne. Laso alam aphuthak neli thangta chinine!”

¹⁶Recho pulo, “Ahimelek, nang lapen nangli donrap atum thinangji,”

¹⁷Anke la adung karjap tonbang aphan pulo, “HEMPHU akurusar atum aphan pathinon! Latum David aphan chorung-lo lapen la konatsi kekatma laso alam chini pameta latum nephan nethanthe.” Bonta HEMPHU akurusar atum aphuthak ari kerungji tonbang atum molo.

¹⁸Lasi Doeg aphan Sol pulo, “Nangle latum aphan pathinon!” Lapen halatum kedo-an aphan Doeg pathi-et-lo. Halaso arni la bang 85 akurusar atum aphan pathilo. Halatum sangkelang amar keponji a-ot kedo atumlo.

¹⁹Nob along kedo kurusar arongsopi arat pinso-arlo, kebi-kethi, chainong, gadha lapen biresak kedo-an aphan Sol pathitoilo.

²⁰Bonta Ahimelek asopo inut Abiathar abang chepajoksi David along damlo, lapen chelangdunlo.

²¹La aphan kosonsi Sol ke HEMPHU akurusar atum aphan pathiloma la thanlo.

²²La aphan David pulo, “Neli Doeg aphan halabangso arni kethek-long ahut la Sol aphan thanvekpo pu la neli chinipame. Lasi nanglitum adon arap kethinangke nelisi adailo.

²³La apot nelilong donon, lapen phere-nangne. Sol ke nangli lapen neliphanta pathiji aninghang, bonta nelilong nangli jokji.”