Read Karbi 1 SAMUEL 23 Bible Online

1 SAMUEL 23 - Karbi bible

1 SAMUEL 23

¹Philistia atum Keilah arong tengkheng-lo, kerotmi asok chonghu et-lo pu David arjulong-lo.

²Lasi la HEMPHU aphan arjulo, “Ne damnangjima lapen Philistia atum aphan tengkheng nangjima?” “Damnon, “ pusi HEMPHU thak-lo, “Halatum aphan tengkheng-ra Keilah pajoknon.”

³Bonta David amonit atum laphan pulo, “Ladak Judah along eli kephere nangji ason do-o, Keilah dam pen Philistia asong aphan tengkheng lote, la an sose nanghingno muchotpo.”

⁴Lasi HEMPHU aphan David puthot arjuthulo, lapen la aphan HEMPHU thak-lo, “Damra Keilah tengkheng non, pima Philistia atum aphuthak Ne nangpahaidetpo.”

⁵Lasi David lapen amonit atum Keilah damlo, lapen Philistia atum aphan tengkheng-lo, halatum aphan pathi-o-lo, lapen pi lapen amar latum ponpi-et-lo. Lapen lasonsi David rong aphan pajok-lo.

⁶Ahimelek asopo Abiathar chepajoksi Keilah along David asong kechelang dun ahut, la sanglang arlong cheponlo.

⁷David ke keilah anat damtang-lo pu Sol aphan thanlo, lapen la pulo, “Arnam la aphan nerideng nepitang-lo. Keparpongkling arong lapen apaisong kedo anghap hadak la kedam pen amethang aphansi la chingnang-damlo.”

⁸Lasi Sol asong aphan ron kechedanji aphan hang-lo, Keilah damsi David lapen la amonit atum aphan nepdampo.

⁹Sol ke David aphan ketengkhengji kemang alam la arjulongsi, la Abiathar kurusar aphan pulo, “Sanglang-arlong ladak vantha.”

¹⁰Anke David pulo, “HEMPHU, Israel a-Arnam, ne arjulong-lo, ne, nangban ajoinesi Sol, Keilah vangsi la kepavirji mangtang-lo.

¹¹Keilah asor neliphan Sol arideng hodaidet poma? Ne karjulong ateng pen Sol vangvekjima? Israel Arnam, HEMPHU, nang nephan kethakji aphan choningrilo!” HEMPHU thak-lo, “Sol vangvekji.”

¹²“Lapen Keilah asor nemonit lapen nephan Sol arideng nehodaijima?” David puthot arjuthulo. “Halatum hodaipo,” HEMPHU thak-lo.

¹³Lasi David lapen la amonit kedo-an bang 600 Keilah o si dambomlo. David Keilah pen chepajok-tang-lo pu Sol arjulongsi la kemang akam obup-lo.

¹⁴Ziph adung kejejangtang ajo inglong alongri David chepatusi dolo. La aphan kaiketa Sol rivung-lo, bonta David aphan Arnam, la arideng hodaidedet-lo.

¹⁵David aphan kepathiji si Sol bartang-lo, pu la chechinilo. Ziph adung kejejangtang ajo Horesh alongri David dolo.

¹⁶Hadak la along Jonathon damsi Arnam nangraiji pusi la aphan aning pathelo,

¹⁷laphan pulo, “Phereri. Nelipo Sol nangliphan thangnat ta pasung un-e. Nangli si Israel atum arecho kemanji abangphulo la chinipamelo lapen neli ke nangli dunlo.”

¹⁸Latum banghini lahin lahin jirpo aseme kangthir chechak-lo, David Horesh along dosi Jonathon hem chedamlo.

¹⁹Ziph pen ajehak arat atum Sol along Gibeah damsi pulo, “David ke nelitum alongri Hakilah anglong Horesh alongsi chepatulo, la Judia akejejangtang ajo anitur anat.

²⁰Recho nelitum chini nangli ko-ansi la aphan nep ingtung-loma; lasi nelitum alongri vang-ra nangli la aphan nep-longvekji.”

²¹Sol thak-lo, “Neliphan kangjinso apot HEMPHU nanglitum aphan pahirjumenang!

²²Damra non ephong langdamtha la konat adimsi kedoma lapen la aphan komatsi kethek-long-loma? La reset pu neli arjulong-lo.

²³La kechepatu adim pangthek pamenon, lapen paprapjin pen neliphan laso akelong alam nethan thuvektha. Anke neli nangdunpo, lapen jongsi la halaso ahavar dobomlang pulote, ha arlok an la aphan neli ridunpo, laphan kerilok Judah adang bithe dam nang-et seta ripo.”

²⁴Lasi latum o-si Sol aphrang Ziph anat chevoilo. David lapen la amonit atum Maon akejejangtang ajo si kedo, la ke-otang arlok Judia akejejangtang anitur ahin anat.

²⁵Sol lapen la amonit atum David aphan keridunjisi barlo, bonta laso alam la charjulong-lo lapen Maon akejejangtang ajo longbui anglong anat damlo, lapen hadak sa-lo. Sol la arjulongsi la David aphi aphi dunlo.

²⁶Sol lapen la amonit atum inglong anat dolo, lapen ahin kaprek anat kedo David lapen la amonit atum pen kedo chepaprek-lo. Halatum Sol lapen la amonit atum pen chepahelojisi paprap-lo pima latum tebokpik khangjang-lo lapen nep-long dapprangpo.

²⁷Halaso amat pherangke vangsi Sol aphan pulo, “Non amat vang iknon! Philistia atum det tengkhengtang-lo!”

²⁸Lasi David aphi Sol kehungdun ingtonkok-lo, lapen Philistia atum pen kechedanjisi damlo. La apotsi laso anglong aphan kechekak anglong pusi irlo.

²⁹David osi Engedi ahavar anat damlo, hadak la chepatu damlo.