Read Karbi 1 SAMUEL 25 Bible Online

1 SAMUEL 25 - Karbi bible

1 SAMUEL 25

¹Samuel thilot-lo, Israel kedo-an vangpetsi la aphan ningduk-lo. Ansi la aphan ahem Ramah along halatum pipbup-lo. Laso aphi, David Paran akejejangtang ajo damlo.

²Kaleb aro Nabal pu amen inut amonit hadak dolo, la Karmel arong adung longle cherailo.

³La inut keplang-o amonit-lo. Biresak jon 3000 do lo lapen bi jon 1000 chepahemphulo. La apiso Abigail arje mepik lapen reset, bonta la abang ke chingkinodak lapen aning sedengkak amonit.

⁴Nabal ke Karmel along amethang abiresak angmi ingtipbomlang, lapen kejejangtang ajo kedo David la arjulong-lo,

⁵lasi la bangkep ariso Karmel padamsi Nabal aphan kepariji ahukum pilo lapen la aphan kardom papidamtoilo.

⁶La halatum Nabal aphan kepunangji alam pinkhat-lo: “David aning aklong pen, nangliphan, nanglihemtun lapen nangli kedo-an aphan kardom pilo, jirpo.

⁷Alangli nangli biresak angmi kangtip alam arjulong-lo lapen alangli nangliphan pachini kangtung alam ke lahelo: Nangli biresak kebi atum nelitum alongsi do, lapen nelitum latum aphan thangnat pasungsedet-lo. Halatum amar ason an inghu pipedet-lo, Karmel along kedotik anke.

⁸Halatum aphan arjunon, anke halatum nangliphan nangthanpo. Nelitum kecho kejun arni nanglilong vang-lo, lapen nelitum aphan kedeng pameji aphan David nangliphan choningrilo. Kanghon pen nangliban atum aphan kopi asonma kedo nelipidun iktha, lapen nangli kechinghon ajirpo David aphan seta.”

⁹David amen pensi Nabal aphan labangso abirta David amonit atum pilo. Anke latum hadak inghongkok-lo,

¹⁰kejut thu Nabal thak-lo, “David! La komat-lo? La aphan ne arjulongle-pinlang! Non malom kekat aban atum si det plengset!

¹¹Ne him, lang lapen pi angmi kangtip atum aphan kethupi a-ok keponpiji nekam kali, lapen kechinine adim pen kevang amonit atum aphan kepiji akam ave!”

¹²David amonit la along chevoilo, lapen Nabal keputang alam an than-et-lo.

¹³“Nangtum anokjir chehomnon!” La hukum pilo, lapen halatum kedo-an la klemlo. David amethangta nokjir chehomsi bang 400 la amonit pen pen cheponsi bang 200 ke mar-heihei pahonlo.

¹⁴Nabal aban inut abang Nabal apiso Abigail aphan pulo, “Nangli arjulong-loma? Neli hemphu aphan David kejejangtang ajo pen kardom kepajirjisi pherangke nangtoilo, bonta halatum aphan alangli patherak-dunlo.

¹⁵Halatum elitum aphan me-o; halatum elitum aphan pasungse, lapen halatum alangli hidi nelitum kedo esek kaiketa elitum amar latum thiponpelo.

¹⁶Ajo-anerlo halatum kaiketa halatum pen pen elitum api ahur langsi railo.

¹⁷Laso alam aputhak kanghon pen mathathutha, lapen latum kopi nangjima phar iktha. La ehemphu lapen ahemtun kedo-an aphan isi akevir vantahai. La phak aphu ason la-an kebuiklui, la bang alamta arjuje!”

¹⁸Abigail paprapjin pen plang 200 ahim lapen ok-reng ajarong plengthup drakha ahorlang, jon 5 abiresak a-ok karnu lapen lin 17 asang-karnu, drakha athekreng abitung 100, thebo ahim plang 200 pangrumsi lahei gadha athak arthang-lo.

¹⁹Ansi bangpi ban atum aphan pulo, “Nangtum nephrang dambomnon, lapen ne nangtum aphi aphi nangdunbompo.” Bonta bangpi apenan aphan thangnata putekang ke det-lo.

²⁰Bangpi amethang agadha chardonsi inglong akung-kung damlo. Bangpi David aphan menmen chetongmamlo, lapen la amonit atum bangpi anat vangbomlo.

²¹David mathalo, “Kopisi ne ladak kejejangtang ajo laso amonit amar keraipiloma? La amar esonnatta chonghu pipe lapen laso akerap alar la nephan lasonsi klem-rong-lo!

²²Penap adap an laso amonit atum aphan pathi pajut-et longletik Arnam nephan nepathilot-nang!”

²³David aphan Abigail thek-longsi bangpi sunlo, lapen longle athak

²⁴David akeng-ri ardomphrup-lo, lapen alangliphan bangpi pulo, “Kanghon pen akehai, neli arjutha! Neliphanle akoi neti iknon.

²⁵Kanghon pen Nabal aphan ning chebiri, lake inut amokevangve abang, inut akelu sarpolo! Nangliban atum nangkele ahut hadak nelibang ave, akehai.

²⁶lake HEMPHU si nangliphan alarkehui pen lapen nangli hotur atum aphan kepathi pen pahelolo. Non neli kereng-et a-HEMPHU amen pensi semetang-lo, nangli hotur kedo-an lapen nangliphan kephangnoji pu atum an Nabal aphan asonsi adukpipo.

²⁷Kanghon pen akehai, laso anong-e deng iktha, neli nanglivanpilo, lapen nangli monit atum aphan la pi iknon.

²⁸Akehai, neli jat akechokchele klem seta kanghon pen neli diya iktha. HEMPHU nangliphan lapen nangliso nanglisu aphan recho pacholongji, pima nangli Alangli aron si chedanpilo, lapen nangli kevangtik an nangli akehingno akam klemklelo.

²⁹Nangliphan jongsi mane tengkheng seta, lapen kepathiji bor-i-seta inut tonbang ador keso akhi kerai ason thak-thaksi HEMPHU nangli Arnamsi nangliphan raipo. Nangli hotur aphan ke la halatum aphan inut amonit phamri kevar abathuli pen arlong kevar asonthak thaksi varchorpo.

³⁰Lapen HEMPHU kechechaktang akeme ason an nangliphan klem patang-lote, la nangliphan Israel arecho nangli paplangpo,

³¹anke nangli ning ke-oi mate ning siksak nangnelo, akehai, ason avepin pen nangli methang alarkehui pen kepathi aphuthak seta. Lapen HEMPHU nangliphan ahirjume pilote nangli, kanghon pen neliphan tengne ik-ri.”

³²Bangpi aphan David pulo, “Israel Arnam HEMPHU anong pathenang, nangliphan pini nelipen kechetongji aphan komatsi nangketoilo!

³³Nanglining kemathathek apot Arnam aphan chorolo, lapen pini pran-karmut lapen neli alarkehui pen nangli neliphan kepahelo apot.

³⁴HEMPHU nangliphan kephangnoji pen neliphan khang-lo. Bonta neli kereng-et Israel a-Arnam amen pen semetang-lo, nangli jongsi neliphan kechetong paprapre asonte Nabal amonit kedo-an penap adap an thinang-etpo.!”

³⁵Ansi bangpi kevan ason an David chodeng-lo, lapen bangpi aphan pulo, “Mathari, hem chedamnon. Nanglining kehang aling neli klempo.”

³⁶Abigail puthot Nabal along chedamthulo, labang recho atum kecho achojun hem isi pathik-lo. Hor kangri pen aning cheparong-lo, lasi adap the-ang-e tik la aphan bangpi thanthedet-lo.

³⁷Anke la kangri hamdetsi la aphan bangpi than-et-lo. La achethe vang nodak-lo, lapen ephar thi-klak-lo.

³⁸Nikep aphi Nabal aphan HEMPHU arburopsi la thilot-lo.

³⁹Nabal thi-et-lo pu alam David arjulongsi, la pulo, “HEMPHU aphan chorolo! Nabal nephan kepatherak apot la alar-huitang-lo lapen aban aphan kehingno akam keklem pen khang-lo. Nabal keklem kechokche apotsi la aphan HEMPHU aduk pilo.” Anke David Abigail aphan kepangri alam pathantoilo.

⁴⁰La aban atum Abigail along Karmel damlo lapen bangpi aphan pulo, “Nangliphan David apiso keplangjisi alangli netoilo.”

⁴¹Abigail longle athak ingkupdisi pulo, “Neli alangli banpi chot, alangli ban atum aphan akeng kechamji aphan seta chesik-lo.”

⁴²Bangpi thur paprapsi amethang agadha chardonlo. Bangpi along bangpho abanpi atum dunlo, bangpi David aban atum along dunsi alangli piso plang-lo.

⁴³David, Jezreel pen Ahinoam aphan piso enlo, lapen non Abigailta apiso plangtang-lo.

⁴⁴Halaso ahut David apiso Mikal aphan Galim arong Sol penan chopidet-lo.