Read Karbi 1 SAMUEL 28 Bible Online

1 SAMUEL 28 - Karbi bible

1 SAMUEL 28

¹Penang an aphi Israel pen kechedanjisi Philistia asong chingrumpet-lo, lapen David aphan Akish pulo, “Nangli chini, nangli lapen nangli monit atum nelibe dosi chedan nangpo.”

²“Kalang-lo,” pusi David thak-lo. “Neli nangliban, lapen neli kopi klem thekjima nangli methang thek-longpo.” Akish pulo, “Mesenlo! Neli nangliphan neli ingphun kerai abang pinchongpo.”

³Non Samuel thilot-lo, lapen la aphan kedo-an Israel atum ningduk-lo, lapen la amethang arong Ramah along la aphan pipbup-lo. Sangkelang kedo-an aphan, paludep kedo-an aphan Israel o-et nangji pusi Sol jakong pen hukumpilo.

⁴Philistia aron-asong chingrumsi Shunem arong adung mukam chekimlo; Gilboa anglong along Israel atum aphan Sol pangrumsi mukam chekimlo.

⁵Philistia aron-armu aphan Sol thek-longsi la phereduk-lo,

⁶lapen la kopi klem nangjima pusi la HEMPHU aphan arjulo. Bonta mang pen seta HEMPHU thakthedet khangjang-lo, mate montri atum pen ta thak pipedet-lo.

⁷Anke aban atum aphan Sol hukum pilo, “paludeppi neliphan inut neliripi damtha lapen neli damsi bangpi aphan arjudampo.” “Endor along inut do,” halatum thak-lo.

⁸Lasi Sol amethang chepatu parjesi la pe-ri akaprek chingthang-lo, lapen bangpi aphan kelangdamjisi kangting-kuk ahut, la monit banghini atum along dunlo. “Karjulong atum pen neli arjupi iktha lapen kopi plang poma neliphan nelithan iktha,” bangpi aphan la pulo. “Neli kepu amen karjong aphan hangnon.”

⁹Arloso abang thak-lo, “Sol recho keklem alam nangli chinipame tahai, alangli kopusonsi sangkelang atum lapen paludep atum aphan Israel pa-otoima. Tangte, nangli kopisi nangli neliphan pachevurcheksi neli kepathiji bor-iloma?”

¹⁰Ansi Sol isi seme kangthir tang-lo, “Kereng-et a-HEMPHU amen pen la keklem apot nangliphan aduk pipelo pu neli semetang-lo,” bangpi aphan la pulo.

¹¹“Koloso aphansi nangli hangpi nangpo?” Arloso abang arjulo. “Samuel,” la thak-lo.

¹²Arloso abang Samuel aphan thek-longsi, bangpi hangchirlo, lapen Sol aphan pulo, “Nangli kopisi neliphan pachobeiloma? Nangli helo Sol Recho!”

¹³“Nangli thangta phere-nangne!” Bangpi aphan recho pulo, “Nangli kopisi kethek-long-lo?” “Neli kethek-longke inut akarjong pirthe pen kethur thek-long-lo,” bangpi thak-lo.

¹⁴“La kelang kopusonlo?” la arjulo. “La inut akesar amonit asonsi thurlo,” Labangpi thak-lo. “La pe-keding che-umlo.” Anke la Samuel lo pu Sol chinilo, lapen la aphan man kepijisi longle anat tongkilo.

¹⁵Sol aphan Samuel pulo, “Nangli kopisi neliphan pasungthuloma? Nangli kopisi neliphan pavangthu nang-loma?” Sol thak-lo, “Neli non sungpik-lo, Philistia atum nelibe ron thurlo, lapen Arnamta neliphan obup-lo. La montri atum pen, mate mang-heihei pen seta neliphan thakthepinlo. La apotsi neli kopi klem nangjima nelipathanji aphan nangliphan hang nangkok-lo.”

¹⁶Samuel pulo, “HEMPHU nangliphan otangdet lapen nangli hotur plangdet aphi neliphan nangli kopisi nehang nangjilangma?

¹⁷HEMPHU ke nelipen keputang akam si klemlo: Nanglipen alangli recho arat pontang-lo, lapen David aphansi la pidet-lo.

¹⁸Nangli HEMPHU ahukum kroikrelo lapen Amalek atum aphan lapen kedo-an amar pavir-et-edet-lo. La apotsi non nangliphan HEMPHU la klemlo.

¹⁹La nangli lapen Israel aphan Philistia arideng hodai detpo. Penap nangli lapen nangli sopota nanglilongsi nangdunpo lapen Israel aron-armu HEMPHU-si Philistia atum arideng hodaidetpo.”

²⁰Menmen Sol longle athak klithorsi ari-akeng phajongting-lo. Samuel keningje alam arjulongsi pherepik-lo. La ainitilo, pima la losini, jopangthang thangnatta choche.

²¹Arloso abang la adung damsi la kechephere thek-long-lo, lasi laphan bangpi pulo, “Akehai, kanghon pen nangli karju ason nelipran chethongdutsi klemlo.

²²Non neli kepu ason klem iknon. Nangliphan neli asap-o an dangpilang. Kedam unji aphan nangli la chovek nangji.”

²³Sol kechoji molo, lapen pulo, la ajat asonta cho un-elo. Bonta la achakri atum la aphan pachojisi choningrilo. La aphi kroilo, lapen longle pen thurlo lapen hongplang along ingnilunlo.

²⁴Bangpi kepangtubom achainong aso ejon thulo, anke bangpi ajehak him aduk ensi la tunlo lapen thapkave ahim selampilo.

²⁵Sol lapen la achakri atum bangpi lahei inglelo, lapen halatum la cholo, lapen halabangso ajo amat halatum damjuilo.