Read Karbi 1 SAMUEL 8 Bible Online

1 SAMUEL 8 - Karbi bible

1 SAMUEL 8

¹Samuel kesar ahut, la asomar aphan Israel adang kangsai-abang pinchong-lo.

²Aso-akleng amen Joel lapen akebi amen ke Abijah; latum Beersheba along kangsai atumlo.

³Bonta latum apo atovar damdedet-lo; latum tangka kelongji aphan aninghang-o, lasi latum tangka chodeng chonghulo, lapen ahokpet pen lam ingsaiselo.

⁴Anke Israel ajalin atum kedo-an chingrumsi Samuel along Ramah anat damlo,

⁵lapen la aphan pulo, “Langtha, nanglike sarbomlo, seta nanglisomar atum ke nangli tovar en-edet-lo. Lasi recho bat-ra netum aphuthak papangrinang, anke netum inut arecho dopo, ha akaprek adet atum kedo ason.”

⁶Latum inut arecho kehang apot Samuel aning dokdelo, lasi la HEMPHU aphan arjulo,

⁷lapen HEMPHU pulo, “Nangphan rat atum nangkepu athetin arjunon. Nangphan le halatum kangvaive kali; nephansi halatum arecholo pu ingvaivelo.

⁸Ne halatum aphan Ijip pen kevan arni pen kaita halatum Ne pen suiver lapen akaprek a-arnam-heihei aphansi archoverlo; lapen Nephan keklem asonthotsi halatum non nangphanta klemlo.

⁹Lasi halatum alam arjunon, bonta pasodak pen halatum aphan pacheretoinon lapen halatum arecho halatum aphan kosonsi kelangponpoma than pajirminon.”

¹⁰Samuel aphan recho nangji pu kehang arat aphan HEMPHU kethan alam an alangli than pamelo,

¹¹“Lason helo nangtum arecho nangtum aphan kelangpo, La nanglisomar atum aphan ron-aso pinchongpo, halatum angbong ajehak atum ke ronhemkonglongsi ardonnangpo, akaprek atum loseisi ardonnangpo, lapen akaprek atum ke ron ahemkonglong aphrangsi kat nangpo.

¹²La ajehak atum aphan bang suri aphuthak ahemphu batpo, ajehak atum bang 50 aphuthak ahemphu batpo. La ahidi along nangsomar atum haibai nangpo, asok rotpi nangpo, risim, lapen ronhemkonglong ajohton selamnangpo.

¹³Nangsopimar atum nangpo lapen la antunbang lapen himselambang plang nangpo.

¹⁴La nang kemenei ahidi nang-enpidetpo, drakha aberi, jit aberi-heihei anta enpo lapen la achakri atum aphan pidetpo.

¹⁵La nangsok lapen nang drakha phankep pen ephan nang enpidetsi la kangsai atum lapen akaprek achakri atum aphan pidetpo.

¹⁶Nangban atum aphan lapen kemenei nang chainong , gadha pondetpo lapen la aphan paklemtoipo.

¹⁷Nangpi ahur pen jonkep angbong ejon pondetpo, lapen nang methangta la aban cheplang nangpo.

¹⁸Halaso apor kevang ahut, nangtum ninghodak pen khindejopo pima nangtum arecho nangtum kangvaitang abang apot, bonta nangtum kekhinde alam HEMPHU-ke arjujedetpo.”

¹⁹Rat atum Samuel alam ano chevarvedet-lo, bonta pulo, “Kali! Netum recho inut nangvekji,

²⁰la lote netumta bang kaprek adet atum asonpo, netum emethang arecho pen netum aphan pangripo lapen netum aphan ron kechedan aklam-heihei along nejaponpo.”

²¹Halatum kepu athetin Samuel arjulo lapen damsi HEMPHU aphan thanlo.

²²HEMPHU la aphan thak-lo, “Halatum kehang alingle klemnon lapen halatum aphan inut arecho batpinon.” Ansi kedo-an Israel amonit atum aphan Samuel hem pachedam toilo.