Read Keapara Luka 1 Bible Online

Luka 1 - Keapara bible

Luka 1

¹Vele talimamu Teofilo, goi atalo-venimuna. Taunilimalima vogo na Iesu na ekalarato kalara ita vepakarai gaura valira warau getalorato.

²Tovotovonai taunilimalima matara na gegitarato gaura e gevopatagirato valira gelegelerai gevega-riparato.

³Gaura pakurai au maki atugamagina, namana evetaina, Vele o, rakagau rakagau gewalato gaura veavugara patavu gitagitara, gaurai gewalato gelegelerai ama talorana goi gemu.

⁴Gaurai ewagumona pono ripa, gevega-ripamuto kilara votaunatauna vegata. Ioane Bapatiso gena wala gekilagi-matagaiato

⁵Heroda, Iudea tanoparana evele-agiawai laganinai, Rupu Veaga velena ta etaluwai arana Sakaria, Abia gena kwalu talimana. Garawana arana Elisapeta. Ia maki Aarona kalakalana, Rupu Veaga velena geria kwalu garena.

⁶Ira ruala maki kala rorirori talimara Palagu wailanai. Velekou gena rova e vevega-nagi maparaparara gegapi-ragerawai maaora maparara na maki.

⁷Na ira ruala vou ati naturia, kwalana Elisapeta maki egaerato, e ira ruala maki warauna gevelepara e logeapara-vagito.

⁸Toma ta Sakaria gena rupu inagulura ekalarawai Palagu wailanai Rupu Veaga aonai, kwalana gena kwalu geria toma pakunai.

⁹Gaurai Rupu Veaga velera geria kala gelegelenai Sakaria gevirigiato, mulamula maponana namana pene kapua. Gaurai elaka-togato Velekou gena Rupu Veaga aonai,

¹⁰taunilimalima maparara mulimuli ai gerapaliwai aonai mulamula ekapuato.

¹¹Aonai Velekou gena aneru ta ia genai ematagaito, mulamula kovuna maponana patapatana veagana ripana kavanai eruga-tagowai.

¹²Sakaria na egitaato aonai nugana epara-vagito e ekalito.

¹³Na aneru na evaikilaato, netiwato, “Sakaria, ragai pono kali, kwalana gemu rapali Palagu na pekamonagia. Garawamu Elisapeta na natumu ta pene gapia, pono araa, arana Ioane.

¹⁴Goi pono verere, mapono verere, taunilimalima vogona na maki ia gena wala pia verere-agia.

¹⁵Kwalana Velekou wailanai ia maki vele kamu iwavaginai pene mia. Ia maki vine nanuna ati pene niua e niuniu gaura gaokara maki aikina vagi. Ia tinana tinagenai roe voa, Veaga Palaguna na pene vonu.

¹⁶Ia na Isaraela talimara vogona pene vaiwaikulera Velekou, ira geria Palagu, genai.

¹⁷Velekou wailanai pene laka Elia peroveta talimana gena kwalimu e gena tiavu vetaina. Tama manatura ia na mapene vega-tanu-koukoura. Karoverave talimarai maki pene vega-tanu-kulera, kala rorirori talimara pia kilagira; ne ia na Velekou gena taunilimalima pene kala maavura.”

¹⁸Sakaria na aneru evaikilaato, netiwato, “Au raka pana ripa-tiwa? Au velepara vagi, garawaku maki logeapara vagi.”

¹⁹Aneru na evega-geleato, netiwato, “Au Gaberiela, Palagu wailanai arugana. Palagu na au petuguku, pana vaikilamu evali namana ea pana varamu.

²⁰Na au geku kila ati ovega-taunataunaana gaurai, goi murumu pene kapu, ati pono kilakila, pene ago ekila ganina peneve wala tomanai. Akilagirana gaura geria lagani taunataunarai pia wala.”

²¹Ekala ewalawai gaurai, taunilimalima gevealo-kavato geveroliveroliwai rakagau gaurai Sakaria Rupu Veaga aonai warigi ekwaipo-gitato.

²²Elakatito aonai, ira ati evega-vegupurato, gaurai geripato, ia epoe-karaleto, rakagau kwauta egitaato Rupu Veaga aonai. Gaurai ia gimanaimo ira evega-riparato, ati ekilakilato, kwalana ia muruna ekaputo.

²³Sakaria gena votoma inagulura Rupu Veaga aonai gaura evega-aikirato mulinai, ewaikuleto gena vanugai.

²⁴Voia mulinai ia garawana Elisapeta warauna ekuviato, gaurai uve imaima numai etalu-veavugato.

²⁵Ekilato, “Velekou na penugagivitiku, evetaina au geku ai pekalagia. Geku nugarage taunilimalima wailarai pegapi-pakaa.” Iesu gena wala aneru na ekilagiato

²⁶Elisapeta matinagena uve taula toitoi aonai, Palagu na aneru ta arana Gaberiela etuguato vanuga ta Galileia aonai arana Nasareta.

²⁷Vavine ta vonai. Ia mataogavuna arana Iosepa, Davida gena kwalu. Vovavine arana Maria.

²⁸Aneru ia genai eagoto, evaikilaato, “Maino goi gemu ai, Velekou goi goti e gena vega-nama para goi gemu ai.”

²⁹Maria na ekila ekamonagiato aona warigi evekwalavi-gitato, etugamagito evega-nama ganina eerakagau.

³⁰Aonai aneru na maevaikilaato, netiwato, “Maria, ragai pono kali, Palagu gena vega-nama goi atamu ai petaoa.

³¹Goi pono kuvia melo ta pono gapia, pono araa, arana Iesu.

³²Ia arana peneve rage e pia kilagia Goloka Iwavagi Palaguna Natuna. Palagu talutalu na king ai pene vega-agoa, ia kalakalana Davida vetaina.

³³Ia Vele Taputapu ai pene ago, vele talutalu Iakobo petena geria, gena Basileia ati pene aiki.”

³⁴Maria na aneru evaikilaato, netiwato, “Eeraka pene wala-tiwa? Au tau ta goti rogoti gara genokou.”

³⁵Aneru na evega-geleato, netiwato, “Veaga Palaguna goi atamu ai pene kwara, Palagu tiavuna na pene porogimu. Vovetainai goi gemu na pene wala melona maveagana Palagu Natunai pia kilagia.

³⁶Pono ripa, goi vavine kavamu Elisapeta, warauna pelogeapara vagi, na matinagena. Ripamu, taunilimalima na gekilagiawai, ia kapakovago garena negetiiwai, na etoma ia gena uve taula toitoi ea.

³⁷Kwalana Palagu gau maparara kalakalara ripana.”

³⁸Maria ekilato, “Au Velekou gena vetugunagi vavineku, pe pokilagia vetainai geku ai pene wala.” Ne aneru na eraokwaniato, elakato. Maria Elisapeta genai eagoto

³⁹Oranaimo Maria ekuliitito, Iudea golo vanugana gautai elakato.

⁴⁰Vonai Sakaria gena numai everageto, Elisapeta evega-namaato.

⁴¹Elisapeta na Maria gena vega-nama kilana ekamonagiato natuna ia tinagenai ekalavo-kalavoto, aonai Elisapeta Veaga Palaguna na evega-vonuato, mamina egapiato.

⁴²Ne ekila-kamukamuto, netiwato, “Vavine maparara aorai Palagu gena vega-nama goi atamu ai kamu iwavagi, e pono gapia melona atanai maki!

⁴³Na au geku nama rakagau gaurai Velekou tinana au geku ai pevogomai?

⁴⁴Gemu vega-nama kilana pakamonagia aonai, natuku tinageku ai evererena gaurai ekalavona.

⁴⁵Goi overerena, kwalana ovega-taunataunato, Velekou gena kila pene vuvuka notiwato.” Maria gena verere marina

⁴⁶Ne Maria ekilato,“Au aoku na Velekou evega-rageana.

⁴⁷Au palaguku na maki au evega-magulikunaPalaguna everere-veniana,

⁴⁸kwalana au, gena vetugunagi vavinena,geku talu lealeai roe tugamagi-tagokuna!Ewagumona, pene ago, gulu mapararaPalagu gena vega-nama au ataku ai nepiatiwa,

⁴⁹kwalana kala kamu iwavagiraTiavu Palaguna na au geku ai pekalara.Ia arana veaga.

⁵⁰Gena vetuga ia kalina na gekalinatalimara atarai pene taoa,pene ago gulu maparara aorai.

⁵¹Ia gimana egapi-itirato tiavuna naveagi talimara eako-lovolovorato.

⁵²Ia na vele kamura geria tanutanukapura na eroli-piarigorato,na ati gevega-agirana talimara egapi-itirato.

⁵³Vito talimara maki gau namara na evega-vonurato,na rinaga talimara ia na gimara kovagora etugu-waikulerato.

⁵⁴Gena kilagavu ita tupura e gatara Isaraela talimarageriai ati etugamagi-lekwalekwarato,e ia evogomaito gena vetugunagi talimaraIsaraela pene veakavara ulanana,

⁵⁵kalakalara ekilagavu-venirato gelegelena.Aperaamo makalakalanapene vetuga-vanagivanagira, netiwato.”

⁵⁶Maria vonai Elisapeta goti uve toitoi getalu-agirato. Mulinai gena vanugai ewaikule-waito. Ioane Bapatiso ewalato

⁵⁷Elisapeta gena gapi tomana warau ekwarato gaurai, melo ta egapiato.

⁵⁸Ne lagana talimara e gena talimana valina gekamonagiato ia ria geverere-koukouto, kwalana Velekou gena vetuga kamu ia genai ewalato gaurai.

⁵⁹Toma vega-taula vativatinai melo tauniparana kopina kiata pia voro-vagia ulanana getanu-kouto. Votoma maki arana pia keaa Sakaria, tamana arana pia kea-vanagia negetiwato.

⁶⁰Na tinana ati eririwato gaurai ekilato, “Aikina! Ia arana Ioane.”

⁶¹Ira gekilato, “Na goi na pamili aonai neara aikina!”

⁶²Aonai irana melo tamana gimaraimo gerenagiato, melo arana rai nepiatiwa.

⁶³Sakaria na talotalo gauna eririwaato, ekilagiato, geveniato, gaunai evetaina etaloato, “Ia arana Ioane.” Aonai maparara gevevega-kalito.

⁶⁴Vonai vou muruna evekala-pakato, maena maki evelugato, ne ekilakilato Palagu evega-namaato.

⁶⁵Aonai lagana talimara maparara gevevega-kalito vokala valina Iudea golo vanugara maparara aorai eraka-lovolovoto.

⁶⁶Valina gekamonagiato talimara maparara na getugamagiato, gekilato, “Emelo rakavetaina?” Kwalana Velekou gimana tiavuna ia atanai. Sakaria gena mari

⁶⁷Ioane tamana Sakaria Veaga Palaguna na evega-vonuato, gaurai Palagu gena kila evega-matagaiato, netiwato,

⁶⁸“Velekou, Isaraela talimarageria Palagu, ita vega-namaa,kwalana ia gena kwalu talimara evogomai-veniaratopene voi-waikulera e pene vega-magulira ularana.

⁶⁹Vevega-maguli talimana matiavuna goti etuguato ita gera,ia gena vetugunagi talimana Davida kalakalana.

⁷⁰Ekilagavu ia gena peroveta talimara veagara narauvagi gekilagi-matagaiato:

⁷¹Ita ia na ekilagi-gavurato,gevekuku-venirana e geparu-venirana talimaragimara na pene vega-magulira netiwato.

⁷²Ekilato maki, ita tupura gatara pene vetugara,e gena kilagavu veagana ati pene tugamagi-lekwalekwaa.

⁷³Ia na ita kalakalara Aperaamo ekilagavu-veniato,

⁷⁴netiwato, gevekuku-venirana talimaragimara na pene vaimagulira.Gaurai vetugunagina pita ago-venia, ati kalira.

⁷⁵Wailanai pita laka maveagara e marorirorira makigera maguli tomara mapararai.

⁷⁶Natuku o, goi maki Goloka Iwavagi Palagunagena peroveta talimanai pia kilagimu,kwalana pono laka-kune Velekou gena rauparapono kala-maavua ulanana.

⁷⁷Gena kwalu talimara pono vega-ripara,ia na geria rakava pene tugamagi-piatogarae pene vega-magulira.

⁷⁸Kwalana ita gera Palagu gena vetuga kamu ita gerai.Garo eragena maekana vetaina vevega-maguli ita atarai pene mia.

⁷⁹Ne mukunai e kwarega aonai getaluna talimaramaeka na pene rala-talira,maino rauparanai pene vaira.”

⁸⁰Ioane ekamuto mapalaguna e matiligana. Tanoleanai etaluwai, pene ago Isaraela talimara geriai ematagaito tomana.