Read Keapara Apostolo 2 Bible Online

Apostolo 2 - Keapara bible

Apostolo 2

¹Pentekoste tomanai, Iesu gevega-taunataunaawai talimara maparara kapu kwapunaimo gekoukouto. Pentekoste ganina gagala imaima (50), Pasova velekwana tomana na pene vogomai etoma.

²Ne atilovana noowane agi kamuna ta kuluna kupa na emarigoto, getanu-kouto numana aona maparana evega-vonuato.

³Ne noowane kalova maera vetaira gemarigowai gegitarato. Vokalova maera gemarigoto, ira kwapurakwapura repara kukurai gemoleto.

⁴Ne ira maparara Veaga Palaguna na evega-vonurato, ne karo irauirau ai gekilato, Veaga Palaguna na evenirato gelegelenai.

⁵Votomanai Iuda talimara, Palagu kalina na gekaliwai talimara, tanopara kapura maparara na gevogomaito, Ierusalemai getaluwai.

⁶Vokulu gekamonagiato aonai, taunilimalima gutuma gegalu-kavito. Nugara geparato, kwalana ira kwapurakwapura na Iesu gevega-taunataunaawai talimara gekamonagirato geraka-kouto talimara geria karo ai gekilawai.

⁷Ira gevevega-kali-rakavato e geaovoaovoto, negetiwato, “E gekilakilana talimara e Galileia talimara, ei?

⁸Arigi rauparai ita kwapurakwapura gera karo ai gekilana takamonagirana?

⁹Ita reketana Patia talimara, reketa Media talimara e Elam talimara. Reketana Mesopotamia, Iudea e Kapadokia na, reketana Pontas na e Asia na,

¹⁰Frikia e Pamfilia na, Aikupito e Kureni lagana Libia tanora na, e mareketa Roma na tavogomaito,

¹¹Iuda talimara, e ati Iuda talimara Iuda gera aliruputali gegapi-rageato talimara; e ita reketa Krete e Arabia talimara. Na ita maparara na takamonagirana ita kwapurakwapura gera karo ai Palagu na kala kamura iraura vagira ekalarawai gekilagi-matagairana.”

¹²Maparara nugara geparato e maaovoaovora matotaura geverenagi-verenagito, negetiwato, “Ekala ganina rakagau?”

¹³Na talima reketana na gevegarevegare-agirato, negetiwato, “Etalima e pege niu-rakava.” Petero gena valipia

¹⁴Ne Petero apostolo gagalana kwapuna (11) ria geruga-itito, e karona evega-kamuato, ne vokoukou talimara evopata-venirato, netiwato, “Iuda talimami e Ierusalemai gotaluna talimami maparami, pio kamonagi namanama, ekala ganina gemi ana kilagi-matagaia.

¹⁵Etalima e ati pege niu rakava, gomi gotugamagina vetaina. E amoamo roea ora gauna 9 koloko.

¹⁶Na etoma Ioela, peroveta talimana, na ekilagi-kuneato vetainai ematagaina, netiwato,

¹⁷‘Palagu ekilana:Toma ikarai au Palaguku pana popo-rigoataunilimalima maparara atarai.Ne natumi melora e vavinera pia peroveta,gemi malaga valigu pia mata-vanagi,e velepara e logeapara pia nivi.

¹⁸Pa, votoma au geku vetugunagi marurae garera atarai au Palaguku pana popo-rigoa,ne pia peroveta.

¹⁹Ne nugapalevagi kalara kamurakupa kukunai pana vega-matagaira,e vegailia tanoparai;rala, e kalova, e kovu milomilo.

²⁰Garo pene vetao-kule pene mukunaa,e uve pene kalovakalova,rala vetaina pene mia,Velekou gena vogomai tomana kamunae irau vagina pene kavinagi gaurai.

²¹Ne rai Velekou aranai ekea-ragena talimanamaguli pene vaia.’

²²Isaraela talimami, ekila pio kamonagira: Iesu, Nasareta talimana, Palagu na eveniato inaguluna gomi gemi ai evega-matagai-gitakauato. Ia genana Palagu gena kala irau vagira e nugapalevagi kalara e vegailia irau vagira reketa ekalarato gomi nuganugami ai, pe gomi ne ripami.

²³Palagu gena ririwai e ripai warau enavuga-kuneato gelegelenai, Iesu gomi gimami ai etugu-kauato, ne rakava talimara na geveakavamito, gaurai Iesu satauro ai gonaero-kauato ne govagi-kwaregaato.

²⁴Na Palagu na ia kwarega na evega-kuliiti-waiato, e kwarega vitina egaivagiato, kwalana kwarega ati gelegele ia pene gapi-gaugaua.

²⁵Davida na ia ekilagiato, netiwato,‘Velekou toma mapararai wailaku ai agitaana.Ia au gimaku ripana kavanai,gaurai gau taa na ati pene kalavo-kalavoku.

²⁶Gaura pakurai aoku verere na pevonu,e geku kilakila verere na pege vonu.Kwarega kalina na maki ati akalina,

²⁷kwalana au kwarega talimarageria kapu ai ati pono raokwaniku,e gemu Talima Veagana ati pene poraga.

²⁸Maguli rauparara warauna ovega-ripakuto;goi lagamu ai pana talu,ne verere na pono vega-vonuku.’

²⁹Walakavaku maparami, etoma au aoku matiligana na pana kila, ita kalakalara kamuna Davida ekwaregato pe getoleato, etoma ia kalana ita ria ea.

³⁰Na ia peroveta talimana, e ripana Palagu na warau ekilagi-gavuato, netiwato: Davida kalakalana ta ia gena teronai pene tanukau vegata.

³¹Davida na eripa-kuneato, Palagu na rakagau wailai pene kalaa egitaato. Gaurana Keriso gena kuliitiwai kilana ekilagiato, netiwato, ‘Ia kwarega talimara geria kapu ai ati eraokwaniato, e tauniparana ati pene poraga.’

³²Palagu na Iesu, kwarega na evega-kuliiti-waiato, ai maparamai ripamai.

³³Palagu na egapi-rageato, gimana ripana kavanai etaoato, ne Palagu na ekilagi-gavuato, Veaga Palaguna Tamana genana egapiato. Ne ia na Veaga Palaguna toma pepopo-rigoa, gomi na gogitaana e gokamonagiana.

³⁴Kwalana Davida kupai ati everageto, na ekilato,‘Palagu na au geku Velekou ekilagiato, netiwato:Au gimaku ripana kavanai ono mai-tanu,

³⁵pene ago gevetali-venimuna talimara pana tao-rigora,gagemu panakauna gaurai pana vega-agora.’

³⁶Gaura pakurai Isaraela talimara maparara pia ripa-namanama, eIesu, gomi na gosatauroato, Palagu na Velekou e Keriso ai evega-agoato.” Taunilimalima gutuma gevetugamagi-waito e gelaka-waikuleto

³⁷Ekila gekamonagiato aonai, nugara gerageto, ne Petero e voapostolo reketa gerenagirato, negetiwato, “Walakava, ai rakagau aia kala?”

³⁸Petero na evaikilarato, netiwato, “Gomi kwapurakwapura gemi rakava geriana pio vetugamagiwai pio laka-waikule, e Iesu Keriso aranai bapatiso pio gapia, pe gemi rakava pene tugamagi-piatogara; e gena vega-nama, Veaga Palaguna, pio vaia.

³⁹Kwalana Palagu gena kilagavu ekalaato gomi gemi e gomi natumi geria, e kapu raurai getaluna talimara geria. Pa, Velekou ita gera Palagu na ekilagi-gavuato Veaga Palaguna na pene keara talimara maparara pene venira.”

⁴⁰Petero na kila vogo ekilagirato, egavu-tinarato evaikila-gaivagirato, netiwato, “Egulu talimara rakavara geriana matotaumi pio kali-maguli.”

⁴¹Talima gutuma na gena kila gegapi-rageato, gaurai bapatiso gegapiato. Votomaimo taunilimalima maparara ragana toitoi (3,000) vetaira ira geria golea aonai gelou-togato.

⁴²Ne vanagivanagi apostolo talimara geriana ripa gegapiwai, gekoukouwai e geveveakavawai, pereti gekala-koruwai pa ganikou geganiwai e gerapali-koukouwai. Iesu gevega-taunataunaawai talimara geria maguli

⁴³Apostolo geriana Palagu na nugapalevagi kalara kamura e vegailia irau vagira vogo ekalarawai, e taunilimalima maparara gekali-rakavato.

⁴⁴Iesu gevega-taunataunaato talimara maparara getanu-kouwai e geria e garia geveware-veniwai.

⁴⁵Geria rinaga e tano gevoi-agirawai, ne monira ira maparara aorai gewarerawai, kwapurakwapura geria rapu gelegelerai.

⁴⁶Toma mapararai Rupu Veaga aonai getanu-kouwai. Geria numai ganikou geganiwai e gegani-koukouwai mavererera e mamainora ria.

⁴⁷Palagu gevega-rageawai, e taunilimalima maparara geria vetaukava veveni nama geverere-agiawai. Gaurai toma mapararai Velekou na evega-magulirawai talimara ira ria etao-kourawai.