Read Keapara Filipi 2 Bible Online

Filipi 2 - Keapara bible

Filipi 2

¹Gemi maguli Keriso aonai voanana evega-tiligamina pa? Gena ulamagina gemi tugamagi eveagaokarana pa? Gomi na Veaga Palaguna gatami ai govega-agoato gotalu-koukouna pa? Gemi venugagiviti e veveakava gatami kwapurakwapura geriai gokalarana pa?

²Gaura pakurai anogimina, pio vega-verere taunataunaku, gemi tugamagi koukou ai, ulamagi kwapunai e aomi e Palagumi maki kwapunai pio talu.

³Gau ta ragai pio kalaa vevega-rage tugamagina magulinai e veagi magulirai, na gomi matotaumi pio vevega-rigo kwapurakwapura vekarawami ai, a taukavami pio tao-kunera.

⁴Taukavami geria nama maki pio tavu, a ati gomi matotaumi geregami gemi namamo.

⁵Gemi kalai Keriso Iesu vetaina pio kala, gena tugamagi pio gapia:

⁶Ia gaura mapararai Palagu goti gelegele,na ati etugamagito,vomaguli pene gapi-gaugaua.

⁷Ia matotauna evekilagi-piatogato,ne vetugunagi melona vetainai eagoto.Ia maki taunilimalima vetaina ewalato,ne ita nuganugarai ema taluto.

⁸Ia evevega-rigotoe Palagu ekamonagi-veniawaipene ago gena kwarega,pa, satauro ai ekwaregato noowanekala rakava talimana ta vetaina.

⁹Gaura pakurai Palagu na egapi-itiato kupa atagaina,raimoraimonai ara nama iwavagina eveniato.Voara ara maparara eiwarana.

¹⁰Iesu arana pakunai kupa anerura,e tanoparai getaluna talimara,e tanopara kapulenai pa kwarega kapulenai getaluna talimara,maparara pia tiu-tali ia wailanai.

¹¹E mae maparara na Iesu Keriso pia kilagia“Velekou” Palagu ita Tamara vevato-agina ulanana. Pita wae-lovolovo tanopara gena maeka

¹²Au walakavaku maparami, vanagivanagi au gokamonagi-venikuwai gera inagulu koukou ai vetaina muliku ai maki pio kamonagi-veniku vegata. Pio inagulu makalimi e mapilupilumi ria, maguli pio rawalia ulanana.

¹³Kwalana Palagu gomi aomi ai einaguluna, gomi evega-nagimina e tiliga evenimina, gena ririwa pio kalara ularana.

¹⁴Inagulu mapararai ragai pio munemune e ragai pio vevega-veitu.

¹⁵Pe gomi Palagu natuna ati vetoukaumi e nama iwavagi ai pio ago, etanopara rakava kwaikwai e gekala-rakava-vagina talimara nuganugarai, pe pio wae-lovolovo, noowane mitiu pogi aina gewaena vetaina.

¹⁶Voo pene maguli kilana pio kwalanaa e pio varavaragia genai. Voia pio kalaa genai, au mageku rorirori pana veagi gomi gemi ai Keriso pene waikule-wai tomanai. Kwalana votomai au pana ripa, au geku vekwalavi ai e inagulu ai ati avekwalavi-kawato.

¹⁷Pere au para kwarega, ralaku pere vepopo-lovolovo, noowane gomi gemi kamonagi warewarena Palagu goveniana vetaina. Irau vovetaina gaurai, au avererena, e geku verere maki gomi ria takala-kouana.

¹⁸E raupara kwapunai gomi maki pio verere, pe maparara pita verere-koukou. Timoteo pana tugu-watia

¹⁹Pene Iesu Velekou gena ririwa genai, atugamagina, Timoteo pana tugu-watia; pe gomi valimi panama kamonagia genai, au aoku penema keto-tali.

²⁰Timoteo geregana namo au mamilagiku eripaana, e gomi nakagatumi tugamagina ekala-kamuana.

²¹Taunilimalima maparara matotauria geria magulimo rogora getolerana, a Iesu Keriso gena inagulu ati getavuana.

²²Gomi ripami namanama, ia kolemana e gena veraramani, ia e au, noowane tama e natu geinagulu-kouna vetaina, Vali Namana gavopatagiana.

²³Gaura pakurai pana tugu-wati vega-velekea, maguli enai raka pene mia-tiwa geku ai pana ripaa vou.

²⁴Au geku veraramani Velekou genai ataoana, au maki roe nea pana wati gemi ai. Epaproditas gena wati

²⁵Au atugamagina namana ea walakavara Epaproditas pana tugu-waikule-waia. Ia maki au goti gainagulu-kouto e Keriso gena vetali ai gavetali-kouto talimana. Gomi maki vetugunagimi ekalato, au geku ai gotuguato aonai, gemi veveni gaura na pio veakavaku ulanana.

²⁶Ia maki eririwa kamuna gomi pene gitami. E evekwalavina gomi gemi ai, kwalana gena viti valina gokamonagiato gaurai.

²⁷Taunatauna vagi, ia eviti-rakavaato, roli ekwaregato, na Palagu gena venugagiviti ia atanai, e ati ia atanaimo, na au geku ai maki, kwalana geku aovitiviti neekamu vagina kalinana.

²⁸Gaura pakurai geku ririwa kamuna pana rakatugu-watia gomi gemi ai, pe pio gitaa e pio verere, ne au geku aovitiviti pene malaga.

²⁹Pio gapi-ragea mavereremi ria gera Velekou aranai, gemi venugagi-rage ralemana pene matagai talima evetaira geriai.

³⁰Kwalana gena maguli galamana ati ekalaato, e roli ekwaregato, kwalana Keriso Valina namana galamanai. Vegailia evetaina geku ai veveakava gomi na pogoro veniku vetaina ia na au ema veakavakuto.