Read Keapara 1 Tesalonika 5 Bible Online

1 Tesalonika 5 - Keapara bible

1 Tesalonika 5

¹Walakavamai maparami, ai na gomi ati mapaia talo-venimi, arigi lagani votoma e ora pia matagai.

²Kwalana gomi ripami vealeva, Velekou gena vogomai tomanai lema talimana, pogi aonai evogomaina vetaina, pene vogomai.

³Taunilimalima pia kila, “Maino e gau maparara namamo.” Aonai atilovana rakava kamu iwavagina na pene waitagora, no gare matinagena etolena vitina vetaina. Talima ta ati pene kali-maguli kapuvagi.

⁴Na walakavamai, gomi ati mukuna aonai gomagulina talimami, pe votomana ragai pene vega-polumi lema talimana vetaina.

⁵Gomi maparami maeka e lagani talimami. Ita ati pogi e mukuna taunilimalimara.

⁶Gaura pakurai ita ragai pita maitu, ragai pita talu-guilagi, reketa gekalana vetaira, na pita kero, pita poepoe, e gera tugamagi pia rorirori.

⁷Gemaituna talimara pogi aina gemaituna, e geniuniuna talimara maki pogi aina genuiniuna.

⁸Na ita garogota taunilimalimara gaurai, gera tugamagi pia rorirori. Ita kamonagi e ulamagi getira koparai pita taora, e maguli veraramanina repara palenai pita vega-agoa.

⁹Kwalana Palagu na evirigirato ati ia gena paru vitina pita vuaa ulanana, na vevega-maguli pita vaia gera Velekou Iesu Keriso genana.

¹⁰Ia ita ularana ekwaregato ganina, ia goti pita talu-vanagivanagi, lewana ita magulira pa kwaregara ia mapene vogomai tomanai.

¹¹Gaura pakurai gomi kwapurakwapura pio vevega-tiliga-veveni e pio veveakava-veveni, etoma gokalana vetaina. Vevega-ripa kilara reketa

¹²Walakavamai maparami, ganogimina, gomi aomi ai geinagulu-tiligana, Velekou aranai gegita-tagomina e raupara rorirori ai gevega-ripamina talimara pio nugagi-ragera.

¹³Geria inagulu pakurai pio nugagi-rage-vegatara e pio ulamagira. Mamainomi pio talu.

¹⁴Walakavamai maparami, gavega-nagimina, ati geinaguluna talimara pio gavutinara, gekalina talimara pio vega-tiligara. Moira talimara pio veakavara, taunilimalima maparara geriai pio vaigaoka.

¹⁵Pio poepoe, talima taa na rakava na rakava voina ragai pene kalaa, na vanagivanagi gomi kwapurakwapura gemi ai e taunilimalima maparara geriai maki kala namaramo pio kalara.

¹⁶Toma mapararai pio verere.

¹⁷Lagani mapararai pio rapali.

¹⁸Palagu pio tanikiua gau maparara geriai kwalana eia e Palagu gena ririwa gomi Keriso Iesu ria gomagulina aonai.

¹⁹Veaga Palaguna kalovana ragai pio gunua.

²⁰Peroveta kilara ragai pio kilagi-piatogara.

²¹Gau maparara pio ripa-namanamara; namaramo pio gapi-ragera.

²²Rakava gaura maparara geriana pio laka-gerevagi. Vevega-nama kilara

²³Maino Palaguna na pene vega-veaga-gugulumi. Palagumi, e gemi maguli, e tauniparami maparara ia na pene gita-tagora, kepi taa na maki ragai pene rawalimi, pene ago, gera Velekou Iesu Keriso gena waikule-wai tomanai.

²⁴Gomi ekeamito Palaguna gena kila maparara taunatauna, ia na pene kalara.

²⁵Walakavamai maparami, ai maki atamai ai pio rapali.

²⁶Walakava maparara vewalakava vevelavuna na pio vega-namara.

²⁷Avega-nagimina Velekou aranai etalotalo pio agi-matagaia walakava maparara wailarai.

²⁸Gera Velekou Iesu Keriso gena vega-nama gomi gemi ai pene mia.