Read Keapara Heberu 2 Bible Online

Heberu 2 - Keapara bible

Heberu 2

¹Gaura pakurai rakagau takamonagirato kilara pita gapi-kikitalira, ati nama gerana pia lekwalekwa, ne taago-veniana kapuna pita leaa.

²Kwalana aneru na ita tenera geria gevaravarato kilara taunatauna vegata, e vokila gekaroverave-venirato e ati gekwalanarato talimara geria kala rakava gelegelerai metauna gegapiato,

³a ita raka pita kali-maguli-tiwa, pene evevega-maguli kamuna pita gita-guilagia genai? Evevega-maguli tovotovonai Velekou matotauna na evaravaragiato. Voia mulinai gekamonagiato talimara na ai gema varamaito voo taunatauna.

⁴Palagu na maki evega-taunataunaato vegailia kamurai, e nugapalevagi kalara kamura, e kala irau vagira raupara irauirau ai, e Veaga Palaguna gena wareware gaurana. VoVeaga Palaguna gena wareware gaura Palagu gena ririwa rorinai kamonagi talimara evenirato. Iesu na vevega-maguli kapunai evaiagorana

⁵Votanopara pene vogomai ai na gakilagiana Palagu na ati aneru geria vegitatago kapulenai etaoato.

⁶Na Puka Veaga aonai kapu taai talima ta evaravarato, netiwato,“Palagu o, taunilimalima rai, pe goi na otugamagi-gaokaana?Pa Taunilimalima Natuna rai, pe goi na olaka-gitaana?

⁷Goi na kiata otao-wairigoato aneru kapulerai;mulinai maeka ralema iwavagina e venugagi-ragekraonna genai otao-kauato,

⁸e gaura maparara ia gagena kapulenai otaorato.” Kwalana Palaguna gaura maparara ia gena vegitatago kapulenai etaorato. Taunatauna, Palagu na gau kwauta ati etaoraka-kwaniato, ia gena vegitatago kapuna mulinai. Na etoma gaura maparara ati ia gena vegitatago kapulenai tagitarana.

⁹Na Iesu tagitaana, ia Palagu na vopaka kianai etao-wairigoato aneru kapulerai, kwalana Palagu gena vega-nama genana taunilimalima maparara ulara na pene kwarega. Toma Iesu tagitaana, atanai Palagu na ralema e venugagi-rage kamuna etao-kauato, kwalana vitiviti ai ekwaregato.

¹⁰Gau maparara ekalarato e egaunarato Palaguna, gena ririwa Iesu roe nea vitiviti genana ati vetoukaunai pene ago-kune. Voia mulinai voupe natuna gutuma pene vaimaira, ne ia ralemana e maekana kamuna pia vaia. Palagu genai raupara rorirorina kwapuna voiamo. Kwalana Iesu Palagu natuna geria vevega-maguli talimana kamuna.

¹¹Taunilimalima evega-veagarana tauna, Iesu, e Iesu na evega-veagarato talimara Tamara pe kwapuna. Voia pakunai Iesu ati enuga-ragena, evega-veagarato talimara ekilagirana ia walakavana.

¹²Ia na Palagu ekilagiana, netina,“Goi aramu au walakavaku geriai pana kilagi-matagaia;ekalesia aonai goi mari ai pana vega-ragemu.”

¹³Maekilato,“Palagu genai pana veraramani.” E maekilato,“Au e Palagu na evenikuto goleana natuna ria.”

¹⁴Kwalana Palagu natuna maparara mavirigora e maralara gaurai, ia matotauna maki ira gelegelerai eagoto. Vovetaina ekalato kwalana gena kwarega genana kwarega tiavuna egapi-tagoana talimana, Tiapolo, pene vega-aiki-vagia ulanana.

¹⁵E taunilimalima raira geria maguli aorai kwarega kalina na eligoligorato pene vega-magulira ulanana.

¹⁶Taunatauna, Iesu na ati aneru eveakavarato, na Aperaamo kalakalana.

¹⁷Gaura pakaurai Palagu na Iesu raupara mapararai tarina maparara gelegelerai ekalarato. Kwalana vorauparai vou venugagiviti e veraramani Rupu Veaga velena kamunai pene ago. E Palagu vetugunagina pene ago-veni, taunilimalima geria rakavana pene voi-vagira ulanana.

¹⁸Kwalana Iesu matotauna na vekalatovo vitivitina mamina egapiato, ewagumona rai vekalatovo pene rawalia genai pene veakavaa ripa.