Read Keapara Vevega-matagai 19 Bible Online

Vevega-matagai 19 - Keapara bible

Vevega-matagai 19

¹Voia mulinai noowane taunilimalima galagala vagi karora kulura kupai gekogowai akamonagirato, gekilato,“Haleluia!Vevega-maguli, e maeka ralema iwavagina,e tiavu ita gera Palagu gena.

²Kwalana ia raupara rorirorinai eveagirorinae rakava voira evenina.Ia na mata-poraga garena kamuna kala rakavavoina metau iwavagi na pevenia.E mata-poraga garena na e tanopara maparanagena mata-poraga kalana na pevega-rakava-kwaikwaia.Palagu na gena vetugunagi talimara ralara evega-rigorato galamanai,rakava voina metau iwavagina pevenia.”

³Magekogo-waito, negetiwato,“Haleluia!Vanuga kamuna na eragena kovuna ati pene aiki,vokovu pene rage vanagivanagi.”

⁴Ne vovegitatago talimara gagala ruala vativati (24) e vomaguli gaura vativati gevetiu-talito, ne Palagu gena teronai tanutago gealiruputali-veniawai, evetaina gekilato, “Amen, Haleluia!” Mamoe Natuna gena vegarawa velekwana

⁵Ne voterona na karo ta evogomaito, netiwato,“Palagu gena vetugunagi talimami maparami,e Palagu kalinana gokalina talimami,girigirina pene ago kamuna,gera Palagu iovega-ragea!”

⁶Ne au na kulu ta noowane gutuma para kulura vetaina akamonagiato, noo wai vogo galura gerakana kulura vetaina, e noo kupa ekuluana kuluna kamuna vetaina, gekogowai, negetiiwai,“Haleluia!Ita gera Goloka Iwavagi PalagunaVele kamuna roe etaluna.

⁷Maparara ita verere, ita vonelagi,e ita vega-ragea,kwalana Mamoe Natuna gena vegarawatomana warau pekwara,e garawana maki pege kala-maavua.

⁸Rapuga kulokulora gaokara namara, ati rapurelera,milo girina kiata maki aikina kinavagina gevega-rapugaato.” Vorapuga kulokulora gaokara namara voo Palagu gena veaga talimara geria kala-rorirori ekilagirana.

⁹Ne voaneru na au evaikilakuto, netiwato, “Evetaina ono taloa: ‘Mamoe Natuna gena vegarawa ganikouna pakunai gekearato talimara pia verere!’ ” Maevaikilakuto, netiwato, “E Palagu gena kila taunataunara!”

¹⁰Ne au voaneru gagena kwalanai avetiu-talito, ana aliruputali-venia ulanana. Na ia na ekila-waikuto, netiwato, “Nevetaina ragaina ono kala! Au maki vetugunagi talimaku goi vetaimu, e goi walakavamu Iesu valina kilara gevega-taunataunarana talimara vetaira. Palagumo ono aliruputali-venia! Kwalana Iesu gena varavara kilarana taunilimalima elaunagirana peroveta kilara pia kilagi-matagaira.” Osi kulokulonai erageto talimana

¹¹Au apoeto, kupa evekala-pakato, ne wailaku ai osi kulokulona ta agitaato. Voosi atanai erageto talimana arana “Raramani” e “Taunatauna” negetiwato. Ia kala rorirorina eveagirorina e evetalina.

¹²Ia matana kalova molera vetaina, e repanai kraon galagala vagi. Ia genai ara ta evetaloto, voara talima ta ati ripana, ia gereganamo ripana.

¹³Ia ralana evonuto rapugana na everapugato, e arana “Palagu gena Kila.”

¹⁴Kupa vanugana gena vetali goleana ia mulinai gelakanagi-lakanagiwai. Ira maparara rapuga gaokara namara, kulokulora e ralavu-ketorana geverapugato, osi kulokulorai gerageto.

¹⁵Ia pokana na vetali kativana mata-gogelagogela ema vegoto-atito. Tanopara irauirau petera evetali-kativana mata-gogela gaunana pene patira. Ia na auri tokina na pene vaira matiavu kamuna ria. Vine vuara gepana-talirana vetaina pene vepana-talira. Voia voo Goloka Iwavagi Palagu na gena paru kamuna pene vevega-lakatia kapuna.

¹⁶Rapuga mogana eligoato gaunai e kekevenai eara etaloato, “King maparara geria King e vele maparara geria Vele.”

¹⁷Ne au na aneru ta garo aonai eruga-tagowai agitaato. Voaneru na kupa pakanai gelovona manura ekea-inala-venirato, ekilato, “Iovogomai, Palagu gena ganikou kamunai ioma rau-koukou.

¹⁸Pe tanopara velera kamura virigora, e vetali goleara geria vevai taura kamura virigora, e tiliga iwavagi talimara virigora, e osi virigora e osi ai geragena talimara virigora, e taunilimalima maparara, maguli talimara ati voira talimara, e pakai getaluna talimara, girigiri e kamura, maparara virigora pioma ganira!”

¹⁹Ne au na vevega-rakava gauna e tanopara velera kamura mageria vetali goleara ria tanukou-tago agitarato. Ira osi kulokulonai erageto talimana magena vetali goleara pia vetali-venira ulanana getanu-kouto.

²⁰Na vovevega-rakava gauna gegapi-gaugauato, e opakau perovetana maki, ia vegailia irau vagira vevega-rakava gauna aranai ekalarawai talimana. E vegailia kamura geriana vevega-rakava gauna gena maka gegapiato talimara e ia vegailiana pa avuavuna gauna gealiruputaliana talimara eopa-learana. Ira taura ruala kovu kalovana molena ati keikeina e salfa aonai gepia-rigorato.

²¹Na reketa osi ai erageto talimana pokana na vetali kativana evegoto-atito, gauna na evagi-kwarega-kwaregarato, manu maparara geagoto, ira virigora gegani-veroverorato.