Read Keapara Vevega-matagai 4 Bible Online

Vevega-matagai 4 - Keapara bible

Vevega-matagai 4

¹Eia mulinai au apoe-agoto, vanagi vekala-paka kupa vanuganai agitaato. Ne karo ta noowane kipi kuluna, tovotovonai akamonagiato karona voa ekilato, “Eanana ono mairage, pe eia mulinai rakagau roli gewalana gaura anama vega-gitamu.”

²Ati lovana Veaga Palaguna na eporogikuto, ne wailaku ai talima ta kupa teronanai etanu-tagowai agitaato.

³Voteronai etanu-tagowai talimana gitagitana no vatu arana iaspa evekemelena ralemana vetaina, e vatu kalovakalovana arana kanelia ralemana vetaina, ralemana irau vagi. Voterona kevau na egegelagiato. Vokevau gitagitana noowane emeral vatuna.

⁴Voterona voo terona gagala ruala vativati (24) na getao-gegelagiato. Voterona gagala ruala vativati ai vegitatago talimara kamura kwapurakwapura getanuto. Ira maparara rapuga kulokuloramo geligoto, e ira kwapurakwapura reparai kraon, kolona gekalarato, gaura gekalarato.

⁵Voterona na rama ekeuleawai, karo kamura e gaita erakawai. Voterona wailanai lamepa taulatoi kwapuna gegalawai. Volamepa gegalawai gaura voo Palagu palaguna taulatoi kwapuna.

⁶E voterona wailanai maki rawapara ekawalagiana, neka wainawaina vetaina. Maguli gaura vativati (4) nugana tumakenai, voterona geruga-gegelagiato. Ira wailara e mulira matara vogovagi.

⁷Vomaguli gauna kunena noowane liona, vega-rualana gauna noowane polomakau maruna, vega-toitoi na wailana taunilimalima vetaina, e vega-vativatina noowane gamoga vetaina.

⁸Emaguli gaura e kwapurakwapura vanera taula toitoira e evanera e maparara matanamo gevonuto vanera aora kavara gaura maki matamo. Ira vanagivanagi pogi e lagani ati geagalagina, ekila e ati gevega-ikaana, gekilana:“Veaga, veaga, veaga,Velekou, Palagu talutalu, ia veaga,kunenai etaluwai,ewagomona maki etaluna,e mapene vogomai!”

⁹E teronai etanu-tagowai talimana maguli etalu-vanagivanagina. E maguli gaura na voteronai etanu-tagowai talimana gevega-rageawai, e mavenugagi-ragerana gealiruputali-veniawai, e getanikiu-veniawai gaurai,

¹⁰vovegitatago talimara kamura gagala ruala e vativati (24) voteronai etanuna talimana wailanai gevetiu-taliwai. Ne emaguli vanagivanagina talimana gealiruputali-veniawai. Geria kraon maki ia wailanai getao-talirawai, nee gekilawai,

¹¹“Ai gema Velekou e ai gema Palagu,goi goloka iwa kekere ravuravu,gaurai taunilimalima e maguli gauramaparara na goi pia vega-ragemu,pia nugagi-ragemue tiavu maki maparana goi gemu,Kwalana gau maparara goi na okalarato,e goi gemu ririwaimo okalaratoe ewagumona gemiana.”