Read Keapara Vevega-matagai 5 Bible Online

Vevega-matagai 5 - Keapara bible

Vevega-matagai 5

¹Ne apoeto, voteronai etanu-tagowai talimana gimana ripanai talotalo pepana mogana ta agitaato. Vopepa kava ruala matalotalona, gepinuato, e vega-taulatoi kwapuna gekara-gavuato. Gekara-gavurato kapura maparara rova vegailiana getaoato.

²Tiliga rakavarakava aneru na ta agitaato, karona ati keikeina kamu iwavagi evopatato, ekilato, “Rai gelegele ekumukumu rovana pene gaivagia ripa, e epepa mogana matalotalona pene kala-pakaa?”

³Na talima ta kupai pa tanoparai pa tanopara kapulenai ati gelegele vagi vopepa pene kala-pakaa e aonai pene poe-rigo.

⁴Ne atagi-rakavarakavato, kwalana talima taa vagi maki ati gerawaliato, vopepa mogana matalotalona pene kala-pakaa e aonai pene poe-rigo.

⁵Ne vovegitatago talimara kamura taa na evaikilakuto, netiwato, “Ragai ono tagi! Ono poe-ago! Iuda kwaluna geria liona, Davida Natuna ono gitaa, ia ekwalimuto. Ia na nepepa mogana matalotalona pene kala-pakaa, e gekumuato kumukumura rovara taulatoi kwapuna maki pene gaivagira.”

⁶Ne apoe-agoto, Mamoe Natuna agitaaato. Ia terona nugana tumakenai eruga-tagowai, vomaguli gaura vativati (4) e vegitatago talimara kamurana geruga-gegelagiato. Mamoe Natuna gitagitana noo reketana gevagi-kwaregaato. Ia varuna taulatoi kwapuna e matana maki taulatoi kwapuna. Voo Palagu palaguna taulatoi kwapuna ekilagirana. Ira Palagu na tanopara maparanai etugu-agorato.

⁷Mamoe Natuna eagoto, ne teronai etanu-tagowai talimana gimana ripanai vopepa mogana matalotalona gauna egapiato!

⁸Pepa mogana matalotalona egapiato aonai, maguli gaura vativati e vegita-tago talimara kamura gagala ruala vativati (24) Mamoe Natuna wailanai gevetiu-talito. Ira kwapurakwapura mageria hap (kita vetaina) e kolo gulora aorai mulamula kovuna maponara. Vokovu maponara voo Palagu gena talima veagara geria rapali kilara.

⁹Ne ira na mari valiguna ta evetaina gemariato,“Goi na pepa mogana matalotalona pono gapia gelegele,e ia kumukumu na rovara maki pono kala-pakara gelegele,kwalana goi gevagi-kwaregamuto,e goi ralamu na maru e gare Palagu gena ovoi-vagiratokwalu maparara geriana, e karo maparara geriana,e pete maparara e tanopara maparara na.

¹⁰Goi na ira Palagu gena Basileia kwaluna talimarai ovega-agorato,e Palagu vetugunagina pia ago-veni ulanana Rupu Veaga velerai ovega-agorato.Ira tanopara maparana atanai pia vekuneagi.”

¹¹Apoe-agoto, aneru karora galagala-vagi akamonagirato. Voaneru gutuma galagala-vagi ati vega-agi-venira. Ira na terona e maguli gaura vativati e vegitatago talimara kamura geruga-gegelagirato.

¹²Emari gemari-rakukuato,“Mamoe Natuna, gevagi-kwaregaato gauna,magena rorirori, tiavu pene gapia,e rinaga vogo, e aoneka, e kwalimu pene vaia!E ia magena rorirori taunilimalima maparara napia kupa-ragea, e pia vega-ragea e pia vone-lagi-agia!”

¹³Ne Palagu na ekalarato gaura maparara kupa aonai, tanopara atanai, tanopara kapulenai, e rawapara aonai gaura maparara na emari gegapi-itiato akamonagiato,“Teronai etanu-tagona Palagu na e Mamoe Natuna,tauria ruala na vega-rage, vekuparage, ralema iwavagina,e tiavu pia gapira, pene ago vanagivanagi ati ikana!”

¹⁴Ne maguli gaura vativati na gevega-taunataunaato, gekilato, “Amen!” E vegitatago talimara kamura gagala ruala evativati (24) gevetiu-talito, Palagu gealiruputali-veniato.