Read Kekchi Job 33 Bible Online

Job 33 - Kekchi bible

Job 33

¹Joßcan ut, at Job, chacuabihak li oc cue chixyebal. Chaqßuehak retal chi us li cßaßru tinye âcue.

²Anakcuan oc cue chixyebal li joß qßuial cuan saß inchßôl.

³Chixjunil li tinye âcue tzßakal yâl ut tinye chi anchal inchßôl.

⁴Li nimajcual Dios, aßan li quiyîban cue ut aßan ajcuiß xqßuehoc inyußam.

⁵Chinâsume cui tatrûk. Cßoxla chi us cßaßru tinâsume cuiß.

⁶Lâat ut lâin juntakßêto chiru li Dios. Lâin chßochß oquenakin joß lâat.

⁷Matxucuac chicuu. Lâin mâcßaß incuanquil saß âbên.

⁸Lâin xcuabi chi tzßakal li cßaßru xaye. Xcuabi nak xaye chi joßcaßin,

⁹Lâin tîc inchßôl. Incßaß ninbânu li incßaß us. Mâcßaß inmâc ut mâ jun li mâusilal ninbânu.

¹⁰Abanan li Dios xqßue raylal saß inbên ut chanchanin chic jun li xicß na-iloc re.

¹¹Chanchan xbacß li cuok riqßuin cadena nak xqßue li raylal saß inbên ut yô chixqßuebal retal cßaßru ninbânu,” chancat.

¹²Abanan li cßaßru xaye moco us ta xban nak li Dios nim xcuanquil chiru li cuînk.

¹³¿Cßaßut nak yôcat chixcuechßbal rix li Dios? ¿Cßaßut nak nacaye nak incßaß naxsume li cßaßru nacatzßâma chiru?

¹⁴Nabal pây ru naxbânu li Dios nak narâtinaheb li cristian. Aban eb aßan incßaß nequeßxqßue retal lix kßusbaleb.

¹⁵Cuan nak li Dios narâtinaheb li cristian saß lix matqßueb malaj ut saß visión chi kßek nak yôqueb chi cuârc.

¹⁶Naxye reheb cßaßru teßxbânu ut naxqßueheb xnaßleb.

¹⁷Naxye reheb nak teßxcanab xbânunquil li incßaß us. Ut naxye ajcuiß reheb nak incßaß teßxnimobresi ribeb.

¹⁸Incßaß naxcanabeb chi sachc. Naxcoleb ban chiru li câmc.

¹⁹Cuan nak naxkßuseb riqßuin yajel ut riqßuin xrahil lix tibeleb.

²⁰Nequeßxcanab tzacânc usta châbil tzacaêmk naqßueheß reheb.

²¹Mâcßaß chic xtibeleb ut nacßutun chic lix bakeleb.

²²Incßaß chic nequeßxcuy. Câmqueb re.

²³Abanan cui cuan ta junak xtakl li Dios naxnau âtinac, tâchâlk raj ut tixchßolob raj chiru li cuînk cßaßru us tixbânu.

²⁴Tixye raj re li cuînk, “Li Dios xril xtokßobâl âcuu. Aßan xcoloc âcue chiru li câmc. Ac xtau ani tâtojok rix lâ mâc.”

²⁵Tâqßuirâk lix tibel li cuînk ut tâcuânk cuißchic xcacuilal joß nak quicuan chak saß lix sâjilal.

²⁶Tâtijok chiru li Dios ut li Dios târabi li cßaßru tixtzßâma. Chi sa saß xchßôl tixlokßoni cuißchic li Dios ut tâcuânk cuißchic chi sum âtin riqßuin.

²⁷Tixye, “Lâin xinmâcob. Lâin xinbânu li incßaß us. Abanan li Dios incßaß xinixqßue chixtojbal lin mâc joß incßulub.

²⁸Aban li Dios xcoloc cue chiru li câmc. Joßcan nak toj yoßyôquin”, chaßak.

²⁹Nabal sut naxbânu li Dios chi joßcaßin riqßuineb li cuînk re xcolbaleb.

³⁰Joßcaßin nak naxcoleb chiru li câmc ut naxqßueheb chi cuânc saß ruchichßochß chi saheb saß xchßôleb.

³¹At Job, canab âcuib chirabinquil li cßaßru yôquin chixyebal âcue. Qßue retal li cuâtin.

³²Cui cuan li cßaßru tâye re xcßutbal nak mâcßaß âmâc, âtinan chi mâcßaß âcßaßux. Lâin nacuaj nak teßxqßue retal nak mâcßaß âmâc.Abanan, cui mâcßaß cßaßru tâye, canab âcuib chirabinquil li cßaßru tinye. Lâin tinye âcue chanru naru tâcuânk ânaßleb.

³³Abanan, cui mâcßaß cßaßru tâye, canab âcuib chirabinquil li cßaßru tinye. Lâin tinye âcue chanru naru tâcuânk ânaßleb.