Read Kekchi Job 40 Bible Online

Job 40 - Kekchi bible

Job 40

¹Li Kâcuaß quixye cuißchic re laj Job:

²—At Job, ¿ma xban nak cuan ânaßleb nak yôcat chincuechßinquil lâin li nimajcual Dios? Li ani naxcuechß rix li cßaßru ninbânu, tento nak tixsume li cßaßru tinpatzß re, chan.

³Laj Job quixye re:

⁴—At Kâcuaß, xban xmâcßaßil innaßleb xinâtinac. Incßaß naru tatinsume anakcuan. Mâcßaß chic cuâtin re tatinsume cuiß.

⁵Nabal xinye, abanan anakcuan incßaß chic tinâtinak, chan.

⁶Ut li Kâcuaß quiâtinac cuißchic chak saß li câk-sut-ikß ut quixye re:

⁷—Cßutbesi lâ cuînkilal anakcuan ut tâsume li cßaßru tinpatzß âcue.

⁸¿Ma yôcat chixyebal nak moco tîc ta li cßaßru ninbânu? ¿Ma tâye nak lâin cuan inmâc ut lâat mâcßaß âmâc?

⁹¿Ma kßaxal nim ta biß lâ cuanquil joß lâin? Ut, ¿ma chanchan ta biß nak namok li câk nak nacat-âtinac lâat?

¹⁰Cui yâl nak joßcan, cßutbesi lâ cuanquil ut lâ lokßal.

¹¹Cßutbesi lâ joskßil chiruheb li kßetkßeteb ut isi xcuanquileb.

¹²Cßut xxutâneb li nequeßxnimobresi ribeb ut sach ruheb li incßaß useb xnaßleb toj bar cuanqueb cuiß.

¹³Mukeb saß li chßochß ut taklaheb saß xnaßajeb li camenak.

¹⁴Cui tâbânu aßan, lâin tinqßue âlokßal ut tinye nak lâat naru tâcol âcuib xban nak cuan âcuanquil.

¹⁵Qßue retal li xul behemot xcßabaß. Lâin xinyîban re aßan joß nak xatinyîb lâat. Pim naxcuaß joß li cuacax.

¹⁶Abanan cau rib ut cau xmetzßêu.

¹⁷Lix ye chanchan xcacuil li chacalteß nak na-ecßan. Ut cßajoß xmetzßêu li raß.

¹⁸Lix bakel kßaxal cau joß li chßîchß bronce ut li rok chanchan li cacuil chßîchß.

¹⁹Riqßuin li xul aßan nacßutun li cßaßru xinbânu. Ut caßaj cuiß lâin naru ninnumta saß xbên.

²⁰Naxcuaß li pim li na-el saß cßalebâl li cuanqueb cuiß li joskß aj xul.

²¹Ut nahilan saß mu saß xyânkeb li aj saß lix sâb haß.

²²Naxcol rib rubeleb li cheß ut saß xyânkeb li nînki pim.

²³Incßaß naxucuac xban li nimaß nak nachamoß. Usta nacuulac toj saß re xchamal li haß, abanan incßaß nacßoxlac.¿Ma cuan ta biß junak târûk tâchapok re nak yô chi iloc? Ut, ¿ma cuan ta biß junak târûk tixhop li rußuj?

²⁴¿Ma cuan ta biß junak târûk tâchapok re nak yô chi iloc? Ut, ¿ma cuan ta biß junak târûk tixhop li rußuj?