Read Kekchi Lamentaciones 3 Bible Online

Lamentaciones 3 - Kekchi bible

Lamentaciones 3

¹Lâin jun cuînk quincßul nabal li raylal xban nak yô xjoskßil li Dios saß inbên.

²Cßajoß li raylal xqßue saß inbên. Incßaß chic us nin-el. Chanchan nak yôquin chi bêc saß kßojyîn ut incßaß naxcutanobresi lin be.

³Rajlal cutan junes raylal nincßul.

⁴Xban li raylal li yôquin chixcßulbal, chanchan nak tîxin chic chi us. Ut chanchan tokoleb lin bakel.

⁵Junes raylal ut chßaßajquilal nincßul. Sutsûquin xban li raylal.

⁶Xban li raylal li nincßul, chanchan nak cuanquin saß kßojyîn, joß eb li camenak li ac xeßcam najter.

⁷Chanchan nak sutsûquin saß tzßac re nak incßaß tinêlelik. Chanchan nak bacßbôquin riqßuin cadena kßaxal âl xban li raylal li yôquin chixcßulbal.

⁸Usta xinjap cue chixtzßâmanquil intenkßanquil chiru, abanan li Kâcuaß incßaß xrabi lin tij.

⁹Chanchan nak eb li tzßac yîbanbil riqßuin pec nequeßramoc re lin be. Ut incßaß chic nintau cßaßru tinbânu.

¹⁰Li Kâcuaß chanchan jun li oso malaj ut jun li cakcoj mukmu roybeninquil ani tixchap.

¹¹Chanchan nak quinixchap ut quinixrahobtesi ut quinixcanab injunes chi mâ ani natenkßan cue.

¹²Chanchan nak yô chintîcanquil riqßuin lix tzimaj.

¹³Chanchan nak quinixcut riqßuin lix tzimaj ut kßaxal cham qui-oc.

¹⁴Chixjunileb li cuech tenamitil niquineßxhob. Rajlal cutan yôqueb chinseßenquil.

¹⁵Junes raylal nincßul. Chanchan nak junes cßa chic li nintzaca.

¹⁶Chanchan nak quinixcut chiru chßochß ut xeßtokeß li ruch cue. Ut chanchan nak quinixtolcßosi saß poks.

¹⁷Mâcßaß chic tuktûquil usilal cuiqßuin. Ut mâcßaß chic li sahil chßôlejil.

¹⁸Mâcßaß chic inmetzßêu. Ut nincßoxla nak mâcßaß chic nacuoybeni riqßuin li Kâcuaß.

¹⁹Lâin nincßoxlac chirix chixjunil li raylal ut li rahil chßôlejil li nincßul. Nacuecßa tzßakal xmay li raylal li nincßul.

²⁰Incßaß na-el saß inchßôl. Ut yô chi chßinânc inchßôl.

²¹Abanan cuan jun li nacßojla cuiß inchßôl. Ut aßan li nacuoybeni.

²²Xban nak junelic naruxtâna ku li Kâcuaß, joßcan nak incßaß xo-osoß. Junelic naril xtokßobâl ku.

²³Cuulaj cuulaj nocorosobtesi. Acß chic li kosobtesinquil xban nak kßaxal nim li rusilal saß kabên.

²⁴Li Kâcuaß, aßan li natenkßan cue. Ut aßan li ninyoßoni.

²⁵Li Kâcuaß junelic châbil riqßuineb li nequeßyoßonin riqßuin. Ut naruxtâna ruheb li nequeßxsicß xtenkßanquil riqßuin.

²⁶Kßaxal us nak junak târoybeni nak tâtenkßâk xban li Kâcuaß. Ut incßaß yôk chixcuechßinquil li cßaßru naxbânu.

²⁷Kßaxal us nak junak tixcanab rib chi taklâc xban li Kâcuaß chalen saß xsâjilal.

²⁸Kßaxal us nak junak tixcßojob xchßôl ut incßaß tâcuechßînk xban nak li Kâcuaß, aßan li quiqßuehoc re chixcßulbal li raylal.

²⁹Chixcubsihak ban rib rubel xcuanquil li Kâcuaß, xban nak toj cuan cßaßru naroybeni.

³⁰Chixqßuehak chi saqßuecß saß xnakß ru xbaneb li xicß nequeßiloc re usta tâcßutekß xxutân.

³¹Li Kâcuaß incßaß nocoxtzßektâna chi junaj cua.

³²Usta naxqßue xrahil kachßôl, abanan naruxtâna ku xban nak kßaxal nim li ruxtân saß kabên.

³³Moco yal naraj ta xchßôl li Kâcuaß nak naxqßue li raylal saß kabên.

³⁴Li Kâcuaß incßaß nacuulac chiru nak teßrahobtesîk li cuanqueb rubel xcuanquil jalan tenamit.

³⁵Chi moco nacuulac chiru li Kâcuaß nak tâmakßekß chiruheb li cßaßru reheb.

³⁶Li Kâcuaß incßaß nacuulac chiru nak incßaß narakeß âtin saß tîquilal.

³⁷¿Ani ta biß târûk tixye cßaßru tixcßul junak cui moco joßcan ta naraj li Dios?

³⁸Nakacßul li us joß ajcuiß li incßaß us xban nak joßcan naraj li Kâcuaß.

³⁹¿Cßaßut nak târahokß xchßôl li cuînk xban li raylal li naxcßul, cui aßan ajcuiß li yô chi mâcobc?

⁴⁰Chikaqßuehak retal chi us cßaßru takabânu. Chikajal li kacßaßux ut chosukßîk riqßuin li Kâcuaß.

⁴¹Chikayâba xcßabaß li Kâcuaß cuan saß choxa ut takaye:

⁴²—Lâo xkakßet lâ cuâtin ut xomâcob châcuu. Ut lâat incßaß xacuy kamâc.

⁴³Cßajoß lâ joskßil. Joßcan nak xaqßue li raylal saß kabên. Xoâcanab chi camsîc ut incßaß xacuil xtokßobâl ku.

⁴⁴Chanchan nak xamuk âcuib saß chok re nak incßaß tâcuabi li katij.

⁴⁵Xban li raylal xaqßue saß kabên, chanchano aj chic mul ut mâcßaß chic noco-oc cuiß chiruheb chixjunileb li tenamit.

⁴⁶Chixjunileb li xicß nequeßiloc ke nocoeßxhob.

⁴⁷Kßaxal ra xkacßul. Xsacheß ru li katenamit. Ut yô kaxiu.—

⁴⁸Li xyaßal cuu natßululnac saß xnakß cuu xban nak queßsacheß ruheb lin tenamit.

⁴⁹Incßaß tincanab yâbac xban nak mâcßaß nacßojoban inchßôl,

⁵⁰toj retal nak li Kâcuaß târil chak xtokßobâl ku saß choxa.

⁵¹Cßajoß nak nayotßeß inchßôl xban li raylal li xeßxcßul eb li ixk li cuanqueb Jerusalén.

⁵²Eb li xicß nequeßiloc cue xineßxchap chi mâcßaß inmâc. Chanchanin li xul li quitßaneß saß jun li raßal ut incßaß naru tâêlelik.

⁵³Xineßxcut chi yoßyo saß jun li chamal jul ut queßxtzßap li re riqßuin jun nimla pec.

⁵⁴Saß inchßôl lâin nak oc cue chi subûnc saß haß. Ut quinye: —Anakcuan xin-osoß.—

⁵⁵At Kâcuaß, lâin quinyâba lâ cßabaß nak cuanquin chak saß xchamal li jul.

⁵⁶Cacuabi li cßaßru quinye nak quintzßâma châcuu nak tinâcol. Incßaß xacanab yal chi joßcan li cßaßru quintzßâma châcuu.

⁵⁷Saß li cutan nak quintzßâma intenkßanquil âcue, lâat caye cue: Matxucuac.

⁵⁸At Kâcuaß, lâat cat-oquen chicuix ut quinâcol.

⁵⁹At Kâcuaß, lâat caqßue retal li raylal yôquin chixcßulbal chi mâcßaß inmâc. Chacol rix lin yußam.

⁶⁰Lâat nacanau nak xicß niquineßril. Nacaqßue retal nak yôqueb chixcßûbanquil chanru nak tineßxcamsi li xicß nequeßiloc cue.

⁶¹Lâat xacuabi nak yôqueb chinhobbal. Nacanau chixjunil li cßaßru nequeßxcßûb chicuix.

⁶²Nacanau cßaßru nequeßxye li xicß nequeßiloc cue. Rajlal chicuix nequeßâtinac.

⁶³Chaqßue retal li cßaßru nequeßxbânu. Chalen ekßela ut toj ecuu, junelic yôqueb chinhobbal.

⁶⁴Chaqßueheb chixtojbal rix lix mâqueb, at Kâcuaß. Chabânu reheb joß xcßulubeb xcßulbal.

⁶⁵Chacacuubresi lix chßôleb re nak incßaß teßxtau xyâlal ut chamajecuaheb.Chacßut lâ joskßil chiruheb ut chasach ruheb. Chacuisiheb saß li ruchichßochß, at Kâcuaß.

⁶⁶Chacßut lâ joskßil chiruheb ut chasach ruheb. Chacuisiheb saß li ruchichßochß, at Kâcuaß.