Read Kernewek Jenesis 13 Bible Online

Jenesis 13 - Kernewek bible

Jenesis 13

¹Ytho Abram eth yn-bann yn-mes a Ejyp troha'n Negeb, ev ha'y wreg, ha pup-tra esa dhodho, ha Lot ganso.

²Pur rych o Abram gans chatel, arghans hag owr.

³Hag ev eth yn y gerdhow dhiworth an Negeb dhe Bethel, bys y'n tyller may fia y dylda y'n dalleth yntra Bethel hag Ay,

⁴bys yn tyller an alter re wrussa y'n dalleth; hag ena Abram a elwis war hanow an ARLOEDH.

⁵Mes Lot ynwedh, neb esa ow mos gans Abram, a'n jeva flokkys ha chatel ha tyldow,

⁶ha ny ylli an tir aga sostena, hag i trigys war-barth, rag bos bras aga fyth, ma na yllens triga war-barth.

⁷Ytho yth esa strif yntra bugeledh chatel Abram ha bugeledh chatel Lot. Yth esa an Kananysi ha'n Perizzysi trigys ena y'n pow.

⁸Hag yn-medh Abram dhe Lot, ‘My a'th pys, na vedhes strif yntra my ha ty hag yntra dha vugeledh jy ha'm bugeledh vy, rag breder on ni.

⁹A nyns usi oll an tir a-dheragos? Diberth dhiworthiv, dell yth pysav. Mar mynnydh kemmeres an barth kledh, my a gemmer an barth dhyghow, ha mar kemmerydh an barth dhyghow my a gemmer an barth kledh.’

¹⁰Ha Lot a dhrehevis y dhewlagas ha gweles oll an plen a-dro dhe'n Yordan, oll anodho dhe vos dowrhes — kyns an ARLOEDH dhe dhiswul Sodom ha Gomorra — kepar ha lowarth an ARLOEDH, kepar ha pow Ejyp ha ty ow tos bys yn Soar.

¹¹Ha Lot a dhewisas oll an plen a-dro dhe'n Yordan dhodho y honan, ha Lot a dravalyas troha'n howldrevel hag i a dhibarthas an eyl dhiworth y gila.

¹²Yth esa Abram trigys yn pow Kanan, hag yth esa Lot trigys yn sitys an plen, ha kavoes gwiryow peuri[13] bys Sodom.

¹³Mes tus Sodom o tebel ha peghadoryon dres eghenn dherag an ARLOEDH.

¹⁴Ha'n ARLOEDH a leveris dhe Abram, wosa bos Lot diberthys dhiworto, ‘Drehav dha dhewlagas, ha mir dhiworth an tyller mayth esos troha'n kledh, ha'n dyghow, ha'n howldrevel, ha'n howlsedhes.

¹⁵Rag my a re oll an tir a welydh dhiso jy ha dhe'th has bys vykken.

¹⁶Ha my a wra dha has kepar ha doust an dor: mar kyll den nivera doust an dor, dha has ynwedh a yll bos niverys.

¹⁷Sav yn-bann, kerdh der an pow, der y hys ha der y les, rag my a vynn y ri dhiso.’

¹⁸Ena Abram a gavas gwiryow peuri[14] ha dos ha triga ryb derow Mamre usi yn Hebron ha drehevel alter dhe'n ARLOEDH y'n tyller na.