Read Kernewek Jenesis 17 Bible Online

Jenesis 17 - Kernewek bible

Jenesis 17

¹Ha pan o Abram nownsek bloedh ha peswar-ugens, an ARLOEDH a omdhiskwedhas dhe Abram ha leverel dhodho, ‘Duw Ollgalloesek[19] ov vy. Kerdh a-dheragov, ha bydh divlam.

²Ha my a wra ow hevambos yntra my ha ty, ha my a wra dha gressya dres eghenn.’

³Hag Abram a goedhas war y fas ha Duw a gewsis ganso, ow leverel,

⁴‘Dhe'm parth evy, awotta ow hevambos genes: ty a vydh an tas a genedhlow pals.

⁵Ny vydh dha hanow Abram namoy, mes dha hanow a vydh Abraham, rag my a'th wra an tas a genedhlow pals.

⁶Ha my a'th wra dhe dhoen meur a frut, ha my a wra kenedhlow ahanas, ha myghternedh a dheu yn-mes ahanas.

⁷Ha my a fast ow hevambos yntra my ha ty, ha'th has war dha lergh yn aga henedhow avel kevambos bys vykken, dhe vos Duw dhiso, ha'th has war dha lergh.

⁸Ha my a re dhis, ha dhe'th has war dha lergh, an tir mayth esta alyon ynno, oll an tir a Kanan dh'y berghenna bys vykken, ha my a vydh aga Duw.’

⁹Hag yn-medh Duw dhe Abraham. ‘Dhe'th parth tejy, ty a with ow hevambos, ty ha'th has war dha lergh yn aga henedhow.

¹⁰Hemm yw ow hevambos a wre'ta y witha, yntra my ha hwi ha'th has war dha lergh. Pub gorreydh ahanowgh a vydh trodreghys

¹¹Ha hwi a wra trodreghi kig agas kudhgenn ha hemma a vydh tokyn a'n kevambos yntra my ha hwi.

¹²Ha nebonan yn agas mysk a vo eth dydh y oes a vydh trodreghys, pub flogh gorow der agas henedhow neb yw genys y'th chi po nebonan nag yw dha has jy prenys gans mona dhiworth estren.

¹³Neb yw genys y'th chi ha neb yw prenys gans mona a dal bos trodreghys; ow hevambos a vydh a-bervedh y'th kig rag kevambos bys vykken.

¹⁴Ha gorreydh heb trodreghyans, nag yw trodreghys kig y gudhgenn, treghys dhe-ves dhiworth y bobel vydh an enev na; ev re dorras ow hevambos.’

¹⁵Ha Duw a leveris dhe Abraham, ‘Saray dha wreg, ny wre'ta gelwel hy hanow Saray, mes Sara a vydh hy hanow.

¹⁶Ha my a vynn hy benniga ha ri dhis mab dhiworti hi ynwedh, ha hi a dheu ha bos kenedhlow; myghternedh poblow a dheu dhiworti.’

¹⁷Ena Abraham a goedhas war y fas ha hwerthin ha leverel yn y golonn, ‘A vydh flogh dineythys dhe wour kans bloedh y oes? Hag a wra Sara dineythi, deg bloedh ha peswar-ugens bloedh hy oes?’

¹⁸Hag yn-medh Abraham dhe Dhuw, ‘Unnweyth a kwrella Yshmael bewa y'th wolok!’

¹⁹Hag yn-medh Duw, ‘Sara dha wreg a dhineyth mab, ha ty a elow y hanow Ysak, ha my a fast ow hevambos ganso avel kevambos bys vykken rag y has war y lergh.

²⁰Ha rag Yshmael, my re'th klewas. Awotta, my a wra y venniga, ha gul dhodho doen frut, ha'y gressya dres eghenn. Ev a dhineyth dewdhek pryns ha my a'n gwra dhe vos kenedhel vras.

²¹Mes my a fast ow hevambos gans Ysak, neb a wra Sara y dhineythi dhis y'n termyn ma a'n vlydhen a dheu.’

²²Hag ev a astelas kewsel ganso, ha Duw eth yn-bann dhiworth Abraham.

²³Hag Abraham a gemmeras Yshmael y vab, ha pub kethwas re bia genys yn y ji, ha peub re bia prenys gans mona, pub gorreydh yn mysk tus chi Abraham, ha trodreghi kig aga hudhgenn an keth jydh na, kepar dell wrussa Duw y leverel dhodho.

²⁴Hag Abraham o nownsek bloedh ha peswar-ugens pan veu trodreghys kig y gudhgenn.

²⁵Hag Yshmael a veu trydhek bloedh pan veu trodreghys yn kig y gudhgenn.

²⁶An keth jydh na y feu Abraham hag Yshmael y vab trodreghys;

²⁷hag oll an wer a'y ji, an re genys y'n chi, ha'n re prenys gans mona dhiworth estren, a veu trodreghys ganso.