Read Kernewek Jenesis 18 Bible Online

Jenesis 18 - Kernewek bible

Jenesis 18

¹Ha'n ARLOEDH a omdhiskwedhas dhodho ryb derow Mamre, pan o esedhys yn daras an tylda yn toemmder an jydh.

²Hag ev a dhrehevis y dhewlagas ha mires, hag awotta, yth esa tri gour ow sevel a-dal dhodho, ha pan y's gwelas ev a boenyas dh'aga metya dhiworth daras an tylda hag omblegya dhe'n dor

³ha leverel, ‘Ow Arloedh, mar kevis gras y'th wolok, na dremen yn-rag dres dha was.

⁴Bedhes kyrghys neppyth a dhowr, ha golghewgh agas treys ha powes yn-dann an wydhenn,

⁵Ha my a wra kyrghes tamm bara, may konfortyowgh hwi agas kolonn. Wosa henna hwi a yll tremena yn-rag, a-ban re dheuthewgh dh'agas gwas.’ Hag yn-medhons i, ‘Gwra yndella, kepar dell leversys.’

⁶Hag Abraham a fistenas a-berth y'n tylda dhe Sara ha leverel, ‘Fisten, gwra pareusi tri sea[20] a vleus fin. Toes e, ha gul torthow.’

⁷Hag Abraham a boenyas dhe'n chatel ha kyrghes leugh, medhel ha da, ha'y ri dhe dhen yowynk neb a fistenas dh'y bareusi.

⁸Hag ev a gemmeras kowles ha leth ha'n leugh re wrussa y bareusi, ha'y worra a-dheragdha, ha sevel rybdha yn-dann an wydhenn, hag i a dhybris.

⁹I a leveris dhodho, ‘Ple'ma Sara dha wreg?’ Hag yn-medh ev, ‘Ottahi, a-berth y'n tylda.’

¹⁰Hag yn-medh ev, ‘Yn sur my a dhehwel dhis y'n vlydhen a dheu, hag otta, Sara dha wreg a's tevydh mab.’ Ha Sara a'n klewas orth daras an tylda esa a-dryv dhodho.

¹¹Lemmyn, Abraham ha Sara o koth, gyllys yn kothni, ha ny veu na fella dhe Sara amseryow benynek.

¹²Ytho Sara a hwarthas ynni hi hy honan, ow leverel, ‘Wosa my dhe vos gwedhrys, a vydh plesour dhymm, ha'm arloedh koth ynwedh?’

¹³Hag yn-medh an ARLOEDH dhe Abraham, ‘Prag y hwrug Sara hwerthin, ow leverel. “Yw gwir y fydhav ow tineythi flogh, gyllys koth dell ov?”

¹⁴Eus travyth re gales rag an ARLOEDH? Y'n termyn apoyntys, my a dhehwel dhis, y'n vlydhen a dheu, hag y fydh dhe Sara mab.’

¹⁵Ena Sara a naghas, ow leverel, ‘Ny wrug vy hwerthin’, rag own a's teva. Hag ev a leveris, ‘Nansi! mes hwerthin a wruss'ta.’

¹⁶An wer a sevis alena ha mires war-woeles troha Sodom; yth esa Abraham ow kerdhes gansa dh'aga hembronk.

¹⁷Hag yn-medh an ARLOEDH, ‘A wrav vy keles dhiworth Abraham an pyth a wrav,

¹⁸a-ban vydh Abraham ow tos ha bos kenedhel vras ha galloesek yn sur, hag a-ban vydh pub kenedhel a'n nor bennigys dredho?

¹⁹Rag my re'n dewisas, may hwrella worhemmynna dh'y fleghes ha'y vayni war y lergh, hag i a wra gwitha fordh an ARLOEDH, dhe wul ewnder ha gwirvreus, may trollo an ARLOEDH war Abraham an pyth re leveris dhodho.’

²⁰An ARLOEDH a leveris ynwedh, ‘Rag bos an arm erbynn Sodom ha Gomorra bras, ha rag bos aga fegh pur boes,

²¹my a dheu yn-nans dhe weles mar kwrussons i yn tien war-lergh an arm re dheuth dhymmo; ha mar ny wrussons, my a'n goer.’

²²Ha'n wer a dreylyas alena ha mos troha Sodom; mes Abraham a sevi hwath dherag an ARLOEDH.

²³Abraham a dheuth nes ha leverel, ‘A vynn'ta diswul hwath an re wiryon gans an re dhrog?

²⁴Martesen y fydh hanter-kans den gwiryon a-berth y'n sita. A vynn'ta dhe wir diswul an tyller heb y sparya rag an hanter-kans den gwiryon usi a-berth y'n sita?

²⁵Pell bedhes dhiworthis gul war-lergh an gis ma, ladha an re wiryon gans an re dhrog, may fo an re wiryon kepar ha'n re dhrog; bedhes pell dhiworthis! A ny vynn Breusyas oll an nor gul gwirvreus?’

²⁶Hag yn-medh an ARLOEDH, ‘Mar kavav hanter-kans den gwiryon a-berth y'n sita, sparya a wrav oll an tyller a'ga govis i.’

²⁷Hag Abraham a worthybis, ‘Awotta lemmyn, my re vedhas kewsel orth an Arloedh, ha my doust ha lusu.

²⁸Martesen y fyll pymp a'n hanter-kans gwiryon. A vynn'ta distrui oll an sita rag pymp dhe fyllel?’ Hag yn-medh ev, ‘Mar kavav pymp ha dew-ugens, ny vynnav hy distrui.’

²⁹Hag ev a gewsis orto hwath arta ha leverel, ‘Martesen y fydh dew-ugens kevys ena.’ Hag ev a leveris, ‘Rag dew-ugens, ny'n gwrav.’

³⁰Hag ev a leveris dhodho, ‘Na vedhes an Arloedh serrys, ha my a vynn kewsel. Martesen y fydh deg warn ugens kevys ena.’ Hag ev a leveris, ‘Ny'n gwrav mar kavav deg warn ugens.’

³¹Hag ev a leveris, ‘Awotta, lemmyn, my re vedhas kewsel orth an Arloedh. Martesen y fydh ugens kevys ena.’ Hag ev a leveris, ‘Ny vynnav hy distrui rag ugens.’

³²Hag ev a leveris, ‘Na vedhes an Arloedh serrys, ha my a vynn kewsel an torn ma yn unnsel. Martesen y fydh deg kevys ena.’ Hag yn-medh ev, ‘Ny wrav vy distrui rag deg.’

³³Ha'n ARLOEDH eth yn-kerdh kettell wrussa astel kewsel dhe Abraham, hag Abraham eth arta dh'y dyller.