Read Kernewek Jenesis 19 Bible Online

Jenesis 19 - Kernewek bible

Jenesis 19

¹An dhew el a dheuth dhe Sodom gorthugherweyth, ha Lot esa owth esedha orth yet Sodom. Ha pan y's gwelas, Lot a sevis dh'aga metya hag omblegya, ha'y fas war-tu ha'n leur.

²Hag yn-medh ev, ‘Ow arlydhi, treylyewgh, dell y'gas pysav, a-berth yn chi agas gwas; trigewgh dres nos, ha golghi agas treys. Ena hwi a sev a-varr ha mos war agas fordh.’ Yn-medhons i, ‘Na vynnyn, ni a vynn spena an nos y'n plen.’

³Mes ev a ynnias warnedha yn fras, hag i a dreylyas dhodho hag entra a-bervedh yn y ji, hag ev a wrug kevewi ragdha ha pobas bara heb goell hag i a dhybris.

⁴Mes kyns i dhe wrowedha, gwer an sita, gwer Sodom, a dheuth oll a-dro dhe'n chi, yowynk ha loes, oll an bobel, dhiworth pub le,

⁵hag i a elwis Lot ha leverel dhodho, ‘Ple'ma an wer a dheuth dhis nyhewer? Doro i yn-mes dhyn ni, may hwryllyn aga aswonn.’

⁶Ha Lot eth yn-mes dhedha orth an daras, ha degea an daras a-dryv dhodho,

⁷ha leverel, ‘Ow breder, my a'gas pys, na wrewgh tra mar debel.

⁸Awotta lemmyn, yma dhymm diw vyrgh na aswonnsons gour. Gesiwgh vy dh'aga dri yn-mes dhywgh, ha gwrewgh hwi dhedha dell vo plegadow dhywgh, saw na wrewgh travyth dhe'n wer ma. Rag henna y teuthons i yn-dann woskes ow tho vy.’

⁹Hag yn-medhons i, ‘Sav a-denewen!’ Hag yn-medhons i arta, ‘An gwas ma re dheuth omma avel alyon, hag ev a vedh agan breusi. Lemmyn ni a vynn dha dhyghtya gweth es an re na.’ Hag i a waskas yn harow war an gour, war Lot, ha dos nes, rag terri an daras.

¹⁰Mes an wer a worras aga dorn yn-mes ha tenna Lot a-bervedh y'n chi dhedha ha degea an daras.

¹¹Hag i a weskis an wer esa orth daras an chi gans dellni, byghan ha bras, ma na allsons kavoes an daras.

¹²Hag yn-medh an wer[21] dhe Lot, ‘Eus tus erell genes omma? Deuv, ha'th vebyon ha'th vyrghes, ha piwpynag a vo dhis y'n sita — doro i mes a'n tyller,

¹³rag ni a vynn distrui an tyller ma rag bos aga garm gyllys bras dherag an ARLOEDH, ha'n ARLOEDH re'gan dannvonas dh'y dhistrui.’

¹⁴Ha Lot eth yn-mes ha kewsel gans y dheuvyon a dhemmedhis y vyrghes ha leverel, ‘Sevewgh yn-bann, kewgh yn-kerdh yn-mes a'n tyller ma, rag an ARLOEDH a vynn distrui an sita ma.’ Mes dh'y dheuvyon yth heveli ev dhe vos den ow kul ges.

¹⁵Ha pan dheuth golow dydh, an eledh a ynnias war Lot, ow leverel, ‘Sav yn-bann, kemmer dha wreg ha'th tiw vyrgh usi omma ma na vi diswrys yn kessydhyans an sita.’

¹⁶Mes ev a dhelatyas, ytho an wer a settyas dalghenn yn y leuv ha leuv y wreg ha leuv y dhiw vyrgh, a-ban gemmeras an ARLOEDH truedh anodho; hag i a'n dros yn-mes, ha'y worra mes a'n sita

¹⁷Ha pan wrussens aga dri yn-mes, yn-medhons,[22] ‘Fi rag dha vewnans. Na wra mires a-dryv dhis, na gortos le vyth y'n plen a-dro; fi dhe'n menydh ma na vi diswrys.’

¹⁸Hag yn-medh Lot dhedha, ‘A, nansi, ow Arloedh!

¹⁹Awotta lemmyn, dha servont re gavas gras y'th wolok ha ty re gressyas dha dregeredh re wruss'ta genev ow sawya ow bewnans; ha ny allav fia dhe'n menydh, rag own a'n droktra dhe'm kemmeres ha my dhe verwel.

²⁰Awotta lemmyn, ogas yw an sita ma dhe fia dhedhi, ha byghan yw hi. A, gas vy dhe skapya ena (a nyns yw hi onan byghan?) ha'm enev a vew.’

²¹Hag yn-medh ev dhodho, ‘Otta, my a wront dhis dha vynnas y'n mater ma ynwedh. Ny wrav vy domhwel an sita ma re wruss'ta kewsel anedhi.

²²Gwra fistena, fi ena, rag ny allav gul travyth erna dhyffi ena.’ Rag henna an sita a veu gelwys Soar.

²³Drehevys veu an howl war an dor pan entras Lot yn Soar.

²⁴Ena an ARLOEDH a asas glaw loskven dhe goedha war Sodom ha Gomorra ha tan dhiworth an ARLOEDH yn-mes a nev.

²⁵Hag ev a dhomhwelas an sitys na hag oll an plen a-dro ha trigoryon oll an sitys ha'n pyth esa ow tevi war an dor.

²⁶Mes gwreg Lot, esa a-dryv dhodho, a viras war-dhelergh ha mos ha bos pilar a hoelan.

²⁷Hag Abraham eth myttin a-varr dhe'n tyller may hwrussa sevel dherag an ARLOEDH.

²⁸Hag ev a viras war-woeles troha Sodom ha Gomorra ha trohag oll an plen a-dro, ha gweles, hag otta, yth esa mog an pow ow mos yn-bann kepar ha mog fornes.

²⁹Ha pan dhistruis Duw sitys an plen, Duw a borthas kov a Abraham ha dannvon Lot yn-mes a gres an domhwelyans pan dhomhwelas an sitys mayth esa Lot trigys a-bervedh ynna.

³⁰Ha Lot eth yn-bann mes a Soar ha triga y'n vro venydhyek ha'y dhiw vyrgh ganso, rag own a'n jeva a driga yn Soar, hag yth esa trigys yn kav, ev ha'y dhiw vyrgh.

³¹Ha'n kynsa-genys a leveris dhe'n yowynka, ‘Koth yw agan tas ha nyns eus gour vyth y'n norvys a dheffo a-bervedh dhyn ni war-lergh gis oll an norvys.

³²Deun, gwren ni gul dh'agan tas eva gwin ha ni a wrowedh ganso, may hyllyn gwitha has der agan tas.’

³³Hag i a wrug dh'aga thas eva gwin an nos na, ha'n kynsa-genys a dheuth ha growedha gans hy thas, ha ny wodhva ev pan wrowedhas hi, na pan sevis yn-bann.

³⁴Ha ternos y hwarva an kynsa-genys dhe leverel dhe'n yowynka, ‘Awotta, my a wrowedhas de gans ow thas. Gwren ni gul dhodho eva gwin haneth ynwedh, ha ke tejy dhe wrowedha ganso, may hyllyn gwitha has der agan tas.’

³⁵Ytho i a wrug dh'aga thas eva gwin an nos na ynwedh, ha'n yowynka a sevis yn-bann ha growedha ganso, ha ny wodhva ev pan wrowedhas hi, na pan sevis hi yn-bann.

³⁶Ytho, diw vyrgh Lot a gonsevyas der aga thas.

³⁷Ha'n kynsa-genys a dhineythis mab ha gelwel y hanow Moab; an keth hemma yw tas an Moabysi bys y'n jydh hedhyw.

³⁸Ha'n yowynka, hi ynwedh a dhineythis mab ha gelwel y hanow Ben-ammi; an keth hemma yw tas an Ammonysi bys y'n jydh hedhyw.