Read Kernewek Jenesis 2 Bible Online

Jenesis 2 - Kernewek bible

Jenesis 2

¹Yndella kowlwrys veu an nevow hag oll an lu anedha.

²Ha'n seythves dydh Duw a worfennas y ober re wrussa gul, hag ev a bowesas an seythves dydh a'n ober oll re wrussa.

³Ha Duw a vennigas an seythves dydh ha'y sakra drefenn ev dhe bowes a'y ober oll re wrussa Duw formya ha gul.

⁴Hemm yw istori an nevow ha'n nor pan vons i formys y'n jydh may hwrug an ARLOEDH Duw an nor ha'n nevow.

⁵Pan nag esa hwath prysk an gwel y'n dor, ha pan na devis hwath losow an gwel, rag ny wrussa an ARLOEDH Duw gasa glaw dhe goedha war an norvys, ha nyns esa den dhe wonedha an dor,

⁶mes dowr a frosas yn-bann[1] dhiworth an dor ha dowra oll enep an tir,

⁷an ARLOEDH Duw a formyas mab-den mes a dhoust an dor ha hwytha yn y dhewfrik anall bewnans, ha den eth ha bos enev bew.

⁸Ha'n ARLOEDH Duw a blansas lowarth yn Eden troha'n howldrevel ha gorra ena an den re wrussa formya.

⁹Ha'n ARLOEDH Duw a wrug dhe devi mes a'n dor pub gwydhenn a vo teg dhe weles ha da rag boes, an wydhenn a vewnans ynwedh yn kres an lowarth, ha'n wydhenn a wodhvos da ha drog.

¹⁰Hag yth esa avon ow resek yn-mes a Eden dhe dhowra an lowarth, ha dhiworth an tyller na y feu rynnys dhe dhos ha bos peder skorrenn.

¹¹Hanow an kynsa yw Pishon, hag a resek oll a-dro dhe dir Havila, le may ma owr;

¹²hag owr an tir ma yw da: yma ena bedellium ha men onyks.

¹³Hanow an nessa avon yw Gihon: henn yw an keth usi ow resek a-dro dhe oll an pow a Kush.

¹⁴Hanow an tressa avon yw Tigris; an keth henna usi ow resek est dhe Assyria. An peswora avon yw Ewfrates.

¹⁵Ha'n ARLOEDH Duw a gemmeras an den ha'y worra a-berth yn lowarth Eden dh'y wonedha ha dh'y witha.

¹⁶Ha'n ARLOEDH Duw a erghis dhe'n den, ow leverel, ‘Ty a yll dybri yn surredi a bub gwydhenn y'n lowarth.

¹⁷Mes a wydhenn an godhvos a dha hag a dhrog ny wre'ta dybri, rag y'n jydh may tybrydh anedhi ty a wra merwel yn surredi.’

¹⁸Hag yn-medh an ARLOEDH Duw, ‘Nyns yw da bos an den y honan; my a vynn gul gweres, gwiw dhodho.’

¹⁹Ha mes a'n dor an ARLOEDH Duw a formyas pub best a'n gwel ha pub edhen a'n ayr ha'ga dri dhe Adam dhe weles fatell vynna aga henwel, ha pypynag a henwis Adam pub kreatur bew, yndella y feu y hanow.

²⁰Hag Adam a ros henwyn dhe oll an chatel ha dhe ydhyn an ayr ha dhe bub best a'n gwel, mes nyns esa kevys gweres, par gwiw dhodho.

²¹Ha'n ARLOEDH Duw a wrug dhe gosk down koedha war Adam. Ha pan esa yn kosk ev a gemmeras onan a'y asennow ha degea an kig yn hy le.

²²Ha'n ARLOEDH Duw a wrug an asenn re wrussa kemmeres dhiworth Adam dhe vos benyn ha'y dri dhe Adam.

²³Hag yn-medh Adam, ‘Homma wortiwedh yw askorn a'm eskern vy, ha kig a'm kig vy. Hi a vydh henwys Gwreg, rag hy bos kemmerys mes a wour.’

²⁴Ytho gour a vynn gasa y das ha'y vamm ha glena orth y wreg hag i a vydh unn kig.

²⁵Ha noeth ens i aga dew, Adam ha'y wreg, ha ny gemmerens meth.