Read Kernewek Jenesis 22 Bible Online

Jenesis 22 - Kernewek bible

Jenesis 22

¹Ha wosa an hwarvosow ma Duw a brovas Abraham ha leverel dhodho, ‘Abraham!’ Hag yn-medh ev, ‘Awottavy.’

²Hag yn-medh ev, ‘Kemmer dha vab, dha unn vab Ysak a gerydh, ha ke dhe bow Moria ha'y offra ena avel offrynn leskys war onan an menydhyow a lavarav dhis.’

³Hag Abraham a sevis yn-bann ternos a-varr, ha dibra y asen, ha kemmeres dew a'y wer yowynk ganso hag Ysak y vab, ha treghi an keunys rag an offrynn leskys, ha sevel ha mos dhe'n tyller a leveris Duw dhodho.

⁴An tressa dydh, Abraham a dhrehevis y dhewlagas ha gweles an tyller a-bell.

⁵Hag yn-medh Abraham dh'y wer yowynk, ‘Gortewgh omma gans an asen ha my ha'n maw a vynn mos enos ha gordhya, ha dehweles dhywgh arta.’

⁶Hag Abraham a gemmeras keunys an offrynn leskys ha'y worra war Ysak y vab; ha kemmeres an tan y'n y dhorn ha kollell hag i eth aga dew war-barth.

⁷Hag Ysak a gewsis orth Abraham y das ha leverel, ‘Ow thas!’ Hag ev a leveris, ‘Ottavy, ow mab.’ Hag yn-medh ev, ‘Ott an tan ha'n keunys, mes ple'ma'n oen rag an offrynn leskys?’

⁸Hag yn-medh Abraham, ‘Duw y honan a brovi an oen rag offrynn leskys, ow mab.’ Ytho i eth aga dew war-barth.

⁹Hag i a dheuth dhe'n tyller a leveris Duw dhodho, hag Abraham a dhrehevis alter, hag araya an keunys, ha kelmi Ysak y vab, ha'y worra war an alter a-ugh an keunys.

¹⁰Hag Abraham a ystynnas y dhorn ha kemmeres an gollell dhe ladha y vab.

¹¹Mes el an ARLOEDH a elwis dhodho mes a nev ha leverel, ‘Abraham, Abraham!’ Hag yn-medh ev, ‘Ottavy.’

¹²Hag yn-medh ev, ‘Na ystynn dha dhorn war an maw, na gul travyth dhodho, rag lemmyn my a woer ty dhe berthi own a Dhuw, a-ban na wruss'ta skonya a ri dhymm dha vab, dha unn vab.’

¹³Hag Abraham a dhrehevis y dhewlagas hag awotta, war y lergh hordh maglennys der y gern yn prysk, hag Abraham eth ha kemmeres an hordh ha'y offrynna avel offrynn leskys yn le y vab.

¹⁴Hag Abraham a elwis hanow an tyller na ‘An ARLOEDH a brovi’; dell yw leverys bys y'n jydh hedhyw, ‘War venydh an ARLOEDH y fydh proviys.’

¹⁵Hag el an ARLOEDH a elwis dhe Abraham mes a'n nevow an nessa torn.

¹⁶Hag ev a leveris, ‘My re dos ren ow honan’ yn-medh an ARLOEDH, ‘rag ty re wrug an dra ma ha ny skonsys ri dha vab, dha unn vab,

¹⁷my a wra dha venniga yn surredi, ha kressya dha has kepar ha ster an nevow ha kepar ha'n tewes war dreth an mor, ha'th has a wra erita yet y eskerens.

¹⁸Hag y'th has y fydh kenedhlow oll y'n norvys bennigys, rag ty re woslowas orth ow lev.’

¹⁹Hag Abraham a dhehwelis dh'y dus yowynk hag i a sevis yn-bann ha mos war-barth dhe Beer-sheba, hag yth esa Abraham trigys yn Beer-sheba.

²⁰Ha wosa an taklow ma, y feu derivys dhe Abraham ow leverel, ‘Awotta, Milka, hi ynwedh, re dhineythis mebyon dhe'th vroder Nahor,

²¹Us, y gynsa-genys ha Buz y vroder ha Kemuel, tas Aram,

²²ha Kesed ha Hazo ha Pildash hag Yidlaf ha Bethuel.’

²³Bethuel a dhineythis Rebeka. Milka a dhineythis an eth ma dhe Nahor, broder Abraham.

²⁴Ha'y iswreg, Reuma hy hanow, a dhineythis ynwedh Tebagh ha Gaham ha Tahash ha Maaka.