Read Kernewek Jenesis 24 Bible Online

Jenesis 24 - Kernewek bible

Jenesis 24

¹Gyllys koth o Abraham yn y dhydhyow, ha'n ARLOEDH re vennigsa Abraham yn pup-tra.

²Hag yn-medh Abraham dh'y servont, an kottha a'y vayni esa ow rewlya war bup-tra esa dhodho, ‘Gorr dha leuv yn-dann ow mordhos, my a'th pys,

³ha my a wra dhis ti re'n ARLOEDH, Duw an nevow ha Duw an norvys, na wre'ta kemmeres gwreg rag ow mab a vyrghes an Kananysi, mayth esov trigys yn aga mysk.

⁴Mes ke dhe'm pow vy ha dhe'm kerens ha kemmer gwreg rag ow mab, rag Ysak.’

⁵Hag yn-medh an servont dhodho, ‘Martesen ny vynn an venyn dos war ow lergh a-ji dhe'n pow ma. A goedh dhymm gul dhe'th vab dehweles dhe'n pow may hwruss'ta dos dhiworto?’

⁶Yn-medh Abraham dhodho, ‘Bydh war na wre'ta gul dhe'm mab dehweles ena.

⁷An ARLOEDH Duw a'n nevow neb a'm kemmeras dhiworth chi ow thas ha pow ow genesigeth[25] ha neb a gewsis genev ha neb a dos dhymm, ow leverel, “My a re an pow ma dhe'th has”, ev a dhannvon y el a-dheragos, ha ty a gemmer gwreg rag ow mab alena.

⁸Mes mar ny vynn an venyn dos war dha lergh, ena kwit vydhydh a'm ti ma; saw na wra dhe'm mab dehweles ena.’

⁹Ha'n servont a worras y leuv yn-dann mordhos Abraham y arloedh ha ti dhodho a-dro dhe'n dra ma.

¹⁰Ha'n servont a gemmeras deg kowrvargh mes a gowrvergh y arloedh, ha mos yn-kerdh, gans oll an taklow da a'y arloedh yn y leuv. Ev a sevis ha mos dhe Aram Naharaym bys yn sita Nahor.

¹¹Hag ev a wrug dhe'n kowrvergh mos war benn-glin a-ves dhe'n sita ryb puth dowr y'n gorthugher pan esa an benynes ow tos yn-mes dhe denna dowr,

¹²Hag ev e leveris, ‘A ARLOEDH, Duw ow arloedh Abraham, gront dhymm siwena hedhyw my a'th pys ha diskwa tregeredh dhe'm arloedh Abraham.

¹³Ottavy ow sevel ryb an fenten a dhowr, hag yma myrghes tus an sita ow tos yn-mes dhe denna dowr.

¹⁴An vowes may lavarav dhedhi, “Gorr dha bycher yn-nans, my a'th pys, may hylliv eva”, ha hi a worthyp, “Yv, ha my a re dowr dhe'th kowrvergh ynwedh” — gas hi dhe vos neb re wrussys hy apoyntya rag dha was Ysak, hag yndella my a woer ty dhe dhiskwedhes tregeredh dhe'm arloedh.’

¹⁵Kyns ev dhe worfenna y gows, awotta, yth esa Rebeka ow tos yn-mes — genys o hi dhe Bethuel, mab Milka, gwreg Nahor, broder Abraham — gans hy fycher war hy skoedh.

¹⁶An vowes o maghteth pur deg hy semlans, gwyrghes nag o aswonnys gans gour vyth. Hi eth yn-nans dhe'n fenten ha lenwel hi fycher ha dos yn-bann.

¹⁷Ha'n servont a boenyas rag hy metya, ha leverel, ‘Ro dhymm banna dowr a'th pycher dhe eva, my a'th pys.’

¹⁸Hag yn-medh hi, ‘Yv, ow arloedh’, ha hi a fyskas dhe worra yn-nans hy fycher war hy dorn ha ri dhodho dhe eva.

¹⁹Wosa gorfenna ri dhodho dhe eva, yn-medh hi, ‘My a denn dowr rag dha gowrvergh ynwedh bys pan worfennons eva.’

²⁰Ha hi a fyskas ha gwakhe hy fycher y'n new ha poenya arta dhe'n puth dhe denna, ha hi a dennas rag oll y gowrvergh.

²¹Ha'n gour a viras orti gluw, heb kewsel, dhe wodhvos mar kwrussa an ARLOEDH spedya y negys po na wrussa.

²²Wosa an kowrvergh dhe worfenna eva, an gour a gemmeras bysow owrek, hanter shekel hy foes, ha dew vreghellik rag hy diwla, deg shekel owr aga foes,

²³ha leverel, ‘Piw osta myrgh dhodho? Lavar dhymm, my a'th pys. Eus tyller yn chi dha das ragon dhe driga dres nos?’

²⁴Hag yn-medh hi dhodho, ‘My yw myrgh Bethuel, mab Milka re wrug hi dineythi dhe Nahor.’

²⁵Hi a leveris dhodho ynwedh, ‘Yma meur a gala' ha boes rag an kowrvergh genen ni, ha tyller dhe driga dres nos.’

²⁶Ha'n gour a omblegyas ha gordhya an ARLOEDH,

²⁷ha leverel, ‘Bennigys re bo an ARLOEDH, Duw ow arloedh Abraham, na wrug forsakya y dregeredh ha'y wiryonedh troha'm arloedh. An ARLOEDH re'm hembronkas yn ewn dhe ji breder ow arloedh.’

²⁸Ha'n vowes a boenyas ha derivas an taklow ma dhe ji hy mamm.

²⁹Ha dhe Rebeka yth esa broder, Laban y hanow; ha Laban a boenyas yn-mes dhe'n gour, bys y'n fenten.

³⁰Pan welas an bysow ha'n breghelligow war dhiwla y hwoer ha klewes geryow Rebeka y hwoer, ow leverel, ‘Yndella re wrug an gour kewsel genev’, yth eth bys y'n gour, hag awotta, yth esa ow sevel ryb an kowrvergh ryb an fenten.

³¹Hag yn-medh ev, ‘Deus a-bervedh, bennigys a'n ARLOEDH. Prag yth es'ta ow sevel a-ves? My re bareusis an chi, ha tyller rag an kowrvergh.’

³²Ytho an gour a dheuth a-bervedh y'n chi ha diveghya an kowrvergh ha ri kala' ha boes rag an kowrvergh ha dowr dhe wolghi y dreys ha treys an wer esa ganso.

³³Boes a veu gorrys a-dheragdho dhe dhybri, mes ev a leveris, ‘Ny vynnav dybri kyns my dhe dherivas ow negys.’ Yn-medh ev, ‘Kows.’

³⁴Ytho yn-medh ev, ‘Servont Abraham ov vy,

³⁵ha'n ARLOEDH re vennigas ow arloedh yn fras, hag ev re dheuth ha bos bras; ev re ros dhodho deves ha chatel, arghans hag owr, kethyon ha maghtethyon, kowrvergh hag asenes.

³⁶Ha Sara, gwreg ow arloedh a dhineythis dhodho mab wosa hy bos devedhys ha bos koth, hag ev a ros dhodho pup-tra eus dhodho.

³⁷Ha'm arloedh re wrug dhymm ti, ow leverel, “Na gemmer gwreg rag ow mab dhiworth myrghes an Kananysi, mayth esov trigys yn aga fow;

³⁸mes ke dhe ji ow thas ha dhe'm teylu vy ha kemmer gwreg rag ow mab.”

³⁹Ha my a leveris dhe'm arloedh, “Martesen ny vynn an venyn dos war ow lergh.”

⁴⁰Hag yn-medh ev dhymm, “An ARLOEDH, mayth esov ow kerdhes dheragdho, a dhannvon y el genes, ha ty a gemmer gwreg rag ow mab dhiworth ow theylu, ha dhiworth chi ow thas.

⁴¹Kwit vydhydh a'm ti pan dhyffi dhe'm teylu; mar ny vynnons hy ri dhis, kwit vydhydh a'm ti.”

⁴²‘Ha my a dheuth dhe'n fenten hedhyw, ha my a leveris, “A ARLOEDH, Duw ow arloedh Abraham, mars es'ta ow spedya ow negys mayth esov ow mos warnodho,

⁴³ottavy ow sevel ryb an fenten a dhowr. Mars eus gwyrghes ow tos yn-mes dhe denna ha my a lever dhedhi, ‘Gas vy dhe eva banna dowr a'th pycher, my a'th pys’;

⁴⁴ha mar lever hi dhymm, ‘Yv, ha my a denn dowr rag dha gowrvergh ynwedh’: bedhes homma an venyn re wrug an ARLOEDH hy apoyntya rag mab ow arloedh.”

⁴⁵‘Kyns my dhe worfenna kewsel y'm kolonn, awotta, yth esa Rebeka ow tos yn-mes, hy fycher war hi skoedh ha hi eth yn-nans dhe'n fenten ha tenna, ha my a leveris dhedhi, “Gas vy dhe eva, my a'th pys.”

⁴⁶Ha hi a fyskas ha gorra yn-nans hy fycher dhiworth hy skoedh, ha leverel, “Yv, ha my a re dhe'th kowrvergh dhe eva ynwedh.” Ytho my a evas; ha hi a ros dhe'n kowrvergh dhe eva ynwedh.

⁴⁷Ena my a wovynnas orti, “Piw osta myrgh dhodho?” Hi a leveris, “Myrgh Bethuel, mab Nahor a dhineythis Milka dhodho.” Ytho my a worras an bysow war hy dewfrik ha'n breghelligow war hy diwla.

⁴⁸Ena my a omblegyas ha gordhya an ARLOEDH ha benniga an ARLOEDH, Duw ow arloedh Abraham, neb a'm hembronkas war an fordh wir dhe gemmeres myrgh broder ow arloedh rag y vab.

⁴⁹Ha lemmyn, mars esowgh ow kul tregeredh ha lelder gans ow arloedh, leverewgh e dhymm, ha mar nyns osta, leverewgh e dhymm, may hwrylliv treylya dhe'n dyghow po dhe'n kledh.’

⁵⁰Ena Laban ha Bethuel a worthybis, ow leverel, ‘Devedhys yw hemma a'n ARLOEDH. Ny yllyn leverel travyth dhiso, na drog na da.

⁵¹Awotta Rebeka a-dheragos. Kemmer hi ha mos yn-kerdh. Hi a vydh gwreg dhe vab dha arloedh, dell leveris an ARLOEDH.’

⁵²Pan glewas servont Abraham aga lavarow, ev a omblegyas troha'n leur dherag an ARLOEDH.

⁵³Ena an servont a gemmeras yn-mes lestri arghans ha lestri owr ha dillas, ha'ga ri dhe Rebeka, ha rohow drudh a ros ev dh'y broder ha'y mamm.

⁵⁴Hag i a dhybris hag eva, ev ha'n wer esa ganso, hag ostya dres nos. I a sevis myttin, hag yn-medh ev, ‘Dannvenewgh vy dhe'm arloedh.’

⁵⁵Ena yn-medh hy broder ha'y mamm, ‘Gas an vowes dhe wortos genen nebes dydhyow, po deg dydh, ena hi a wra mos.’

⁵⁶Yn-medh ev dhedha, ‘Na wrewgh ow delatya, a-ban spedyas an ARLOEDH ow fordh, dannvenewgh vy yn-kerdh, ha my a dhe'm arloedh.’

⁵⁷Yn-medhons i, ‘Gwren ni gelwel an vowes ha govynn orti hy honan.’

⁵⁸Hag i a elwis Rebeka, ha leverel dhedhi, ‘A vynn'ta mos gans an gour ma?’ Yn-medh hi, ‘Mynnav.’

⁵⁹Hag i a dhannvonas yn-kerdh Rebeka aga hwoer ha'y mammeth, ha servont Abraham ha'y wer.

⁶⁰Hag i a vennigas Rebeka ha leverel dhedhi, ‘Agan hwoer osta; re bi mamm dhe vilyow a dhegow a vilyow, ha re berghenno dha has yet an re a's kas.’

⁶¹Ha Rebeka ha'y maghtethyon a sevis ha marghogeth war an kowrvergh ha siwya an gour; yndella an servont a gemmeras Rebeka ha mos yn-kerdh.

⁶²Lemmyn Ysak re dhothya dhiworth Beer-lahay-roi; yth esa trigys y'n Negeb.

⁶³Ysak eth yn-mes dhe brederi y'n gwel y'n gorthugher, hag ev a viras war-vann hag awotta kowrvergh ow tos.

⁶⁴Ha Rebeka a viras war-vann ha gweles Ysak, ha diyskynna dhiworth an kowrvargh.

⁶⁵Yn-medh hi dhe'n servont, ‘Piw yw an gour ma ow kerdhes y'n gwel dh'agan metya?’ An servont a leveris, ‘Ow arloedh yw.’ Ytho hi a gemmeras an vayl hag omgudha.

⁶⁶Ha'n servont a dherivas dhe Ysak pup-tra re wrussa.

⁶⁷Ena Ysak a's dros a-berth yn tylda Sara y vamm hag ev a gemmeras Rebeka ha hi eth ha bos y wreg; hag ev a's karas. Yndella Ysak a veu konfortys wosa mernans y vamm.