Read Kernewek Jenesis 26 Bible Online

Jenesis 26 - Kernewek bible

Jenesis 26

¹Yth esa divoetter arall y'n pow, dres an kynsa divoetter re hwarva yn dydhyow Abraham, hag yth eth Ysak dhe Abimelek myghtern an Filistysi, bys yn Gerar.

²Ha'n ARLOEDH a omdhiskwedhas dhodho ha leverel, ‘Na wra mos yn-nans dhe Ejyp. Gorta y'n pow may kowsav orthis anodho.

³Trig y'n pow ma ha my a vydh genes ha'th venniga, rag dhiso jy ha dhe'th has my a vynn ri oll an powyow ma. My a gollenow an ti a dos dhe Abraham dha das.

⁴Ha my a vynn ynkressya dha has kepar ha ster an nev, ha my a re dhe'th has oll an powyow ma. Oll kenedhlow an norvys a vydh bennigys y'th has:

⁵rag Abraham re goelas orth ow lev ha gwitha ow charj, ow gorhemmynnow, ow ordenansow ha'm laghys.’

⁶Ytho Ysak a drigas yn Gerar.

⁷Pan wrug gwer an tyller govynn orto a-dro dh'y wreg, ev a leveris, ‘Ow hwoer yw hi’, rag ev a berthi own a leverel, ‘Ow gwreg yw hi’, rag ev a brederis, ‘Gwer an tyller a wra ow ladha, drefenn Rebeka; rag teg yw hy semlans.’

⁸Wosa ev dhe vos ena termyn hir, Abimelek myghtern an Filistysi, a viras der an fenester ha gweles, hag awotta, Ysak, ow chershya Rebeka y wreg.

⁹Ytho Abimelek a elwis Ysak ha leverel, ‘Awotta, dha wreg yw hi yn tevri! Prag y hwruss'ta leverel, “Ow hwoer yw hi”?’ Ysak a leveris dhodho. ‘Drefenn my dhe leverel, “Rag own merwel a'y govis.” ’

¹⁰Hag yn-medh Abimelek, ‘Pyth yw hemma a wruss'ta gul dhyn ni? Martesen onan a'n bobel a wrussa growedha gans dha wreg, ha ty a wrussa dri blam warnan.’

¹¹Hag Abimelek a erghis dhe oll an bobel, ow leverel, ‘Neb a arvedh an gour ma po y wreg a wra merwel.’

¹²Hag Ysak a hasas has y'n pow na ha kavoes kansplek y'n vlydhen na, ha'n ARLOEDH a'n bennigas.

¹³Ha bras o an gour hag ev eth yn-rag moy ha moy ha mos ha bos pur vras.

¹⁴Hag ev a gavas flokkys a dheves ha greow a warthek ha gwesyon bals, ha'n Filistysi a borthas avi orto.

¹⁵Ha'n Filistysi re stoppsa oll an puthow re wrussa palas gwesyon y das, pan o Abraham y das hwath yn few, ha'ga lenwel a dhor.

¹⁶Yn-medh Abimelek dhe Ysak, ‘Ke yn-kerdh dhiworthyn, rag ty re dheuth ha bos kreffa yn feur ageson ni.’

¹⁷Ytho Ysak eth alena ha kampya yn nans Gerar ha triga ena.

¹⁸Hag Ysak a balas arta an puthow dowr a balsons yn dydhyow Abraham y das, may hwrug an Filistysi aga stoppya yn-bann wosa mernans Abraham; hag ev a ros dhedha an keth henwyn re wrussa y das ri dhedha.

¹⁹Gwesyon Ysak a balas y'n nans ha kavoes ena puth a dhowr bew.[28]

²⁰Mes bugeledh Gerar a strivyas gans bugeledh Ysak, ow leverel, ‘Yma'n dowr dhyn ni.’ Ytho ev a elwis an puth Esek drefenn i dhe strivya ganso.

²¹Ena i a balas ken puth hag i a strivyas a-dro dhe henna ynwedh; ytho ev a'n gelwis Sitna.

²²Ena ev eth yn-rag alena ha palas ken puth; ny wrussons i strivya a-dro dhodho; ytho ev a elwis y hanow Rehoboth ow leverel, ‘Rag lemmyn, an ARLOEDH re wrug spas ragon, ha ni a dheg frut y'n pow.’

²³Hag ev eth yn-bann alena dhe Beer-sheba.

²⁴Ha'n ARLOEDH a omdhiskwedhas dhodho an keth nos ha leverel, ‘My yw Duw Abraham dha das. Na borth own, rag yth esov genes ha my a wra dha venniga hag ynkressya dha has a-barth Abraham ow gwas.’

²⁵Ytho ev a dhrehevis alter ena ha gelwel war hanow an ARLOEDH; hag ena ev a settyas y dylda, hag ena gwesyon Ysak a gleudhyas puth.

²⁶Ena Abimelek eth dhodho dhiworth Gerar, hag Ahuzzath y goweth, ha Fikol pennhembrenkyas y lu.

²⁷Ysak a leveris dhedha, ‘Prag y hwrussowgh dos dhymmo? Hwi a'm kas ha hwi a'm dannvonas yn-kerdh dhiworthowgh.’

²⁸Yn-medhons i, ‘Dhe wir, ni re welas bos an ARLOEDH genes; ytho ni a leveris, bedhes ti yntredhon, ni a'th pys, yntra ni ha ty, ha gwren gul kevambos genes,

²⁹na wre'ta gul drog dhyn, par dell na wrussyn dha dochya. Ny wrussyn gul saw da dhis ha'th tannvon yn-kerdh yn kres; ha bennigys osta lemmyn a'n ARLOEDH.’

³⁰Hag ev a wrug kevewi ragdha, hag i a dhybris hag eva.

³¹I a sevis myttin a-varr ha ti an eyl dh'y gila, hag Ysak a's dannvonas yn-kerdh, hag i eth dhiworto yn kres.

³²An keth jydh na, gwesyon Ysak a dheuth ha derivas dhodho a-dro dhe'n puth a wrussens y balas, ha leverel dhodho, ‘Ni re gavas dowr.’

³³Ev a'n gelwis Sheba. Rakhenna hanow an sita yw Beer-sheba bys y'n jydh hedhyw.

³⁴Ha pan ova dew-ugens bloedh, Esaw a dhemmedhis Yudith myrgh Beeri an Hittyas, ha Basemath myrgh Elon an Hittyas.

³⁵Ha hwerowder spyrys o an re ma dhe Ysak ha Rebeka.