Read Kernewek Jenesis 3 Bible Online

Jenesis 3 - Kernewek bible

Jenesis 3

¹Lemmyn an sarf o moy sotel es pub best a'n gwel re wrussa an ARLOEDH Duw aga gul. Hag yn-medh hi dhe'n venyn, ‘A wrug Duw dhe wir leverel, “Na wrewgh hwi dybri a bub gwydhenn an lowarth”?’

²Hag yn-medh an venyn dhe'n sarf, ‘Ni a yll dybri a frut gwydh an lowarth;

³mes a frut an wydhenn usi yn kres an lowarth, Duw re leveris, “Ny goedh dhywgh naneyl dybri anodho na'y dochya ma na verwowgh.” ’

⁴Hag yn-medh an sarf dhe'n venyn, ‘Yn sur, ny wrewgh hwi merwel;

⁵rag Duw a woer, y'n jydh may typprowgh anodho, agas dewlagas a vydh igerys, ha hwi a vydh kepar ha duwow, ow kodhvos da ha drog.’

⁶Ha'n venyn, pan welas bos an wydhenn da rag boes, ha'y bos teg dhe'n dewlagas, ha gwydhenn dhesiradow dhe wul den fur, hi a gemmeras nebes a'y frut ha dybri; ha hi a ros ynwedh dh'y gour esa gensi, hag ev a dhybris.

⁷Ena aga lagasow aga dew a veu igerys hag i a wodhva aga bos noeth, hag i a wrias delyow figys war-barth dhe wul apronyow ragdha aga honan.

⁸Hag i a glewas lev an ARLOEDH Duw ow kerdhes y'n lowarth yn awel glor an jydh, hag Adam ha'y wreg a omgudhas dhiworth golok an ARLOEDH Duw, yn mysk gwydh an lowarth.

⁹Ha'n ARLOEDH Duw a elwis dhe Adam ha leverel dhodho, ‘Ple'th es'ta?’

¹⁰Hag ev a leveris, ‘My a glewas dha lev y'n lowarth ha kemmeres own drefenn ow bos noeth, ytho my a omgudhas.’

¹¹Hag yn-medh ev, ‘Piw a leveris dhis dha vos noeth? A wruss'ta dybri a'n wydhenn may hworhemmynnis dhis na wrelles dybri anedhi?’

¹²Hag yn-medh an den, ‘An venyn a wruss'ta ri dhymm dhe vos genev, hi a ros dhymm a'n wydhenn ha my a dhybris.’

¹³Hag yn-medh an ARLOEDH Duw dhe'n venyn. ‘Pyth yw henna re wruss'ta?’ Hag yn-medh an venyn, ‘An sarf a'm toellas, ha my a dhybris.’

¹⁴Hag yn-medh an ARLOEDH Duw dhe'n sarf, ‘Rag ty dhe wul hemma, milligys osta dres oll chatel ha dres pub best a'n gwel; war dha dorr ty a wra mos, ha doust ty a wra dybri pub dydh oll a'th vewnans.

¹⁵Ha my a worr avi yntra jy ha'n venyn, hag yntra dha has jy ha'y has hi. Ev a vrew dha benn ha ty a vrew y seudhel.’

¹⁶Dhe'n venyn ev a leveris, ‘My a gress dha bayn yn feur ha ty gans flogh; yn payn y fydhydh ow tineythi fleghes, mes dha dhesir a vydh troha dha wour, hag ev a wra dha rewlya.’

¹⁷Ha dhe Adam ev a leveris, ‘Rag ty dhe goela orth lev dha wreg, ha dybri a'n wydhenn may hwrug vy gorhemmynna dhis, ow leverel, “Na wra dybri anedhi”, milligys yw an dor a'th wovis jy; dre lavur ty a wra dybri anodho oll an dydhyow a'th vewnans.

¹⁸Ev a dhre spern hag askall dhis ha ty a wra dybri losow an gwel.

¹⁹Yn hwys dha fas ty a dheber bara, bys may tehwylli arta dhe'n dor; rag a henna ty a veu kemmerys: rag doust osta, ha dhe dhoust arta ty a dhehwel.’

²⁰Hag Adam a elwis hanow y wreg Eva drefenn hi dhe vos mamm peub oll bew.

²¹Ha'n ARLOEDH Duw a wrug powsyow a groghen rag Adam ha'y wreg ha'ga gwiska.

²²Hag yn-medh an ARLOEDH Duw, ‘Awotta, devedhys yw an den ha bos kepar hag onan ahanan, ow kodhvos an da ha'n drog. Ha lemmyn, ma na worro yn-rag y leuv, ha kemmeres ynwedh a'n wydhenn a vewnans, ha dybri ha bewa bys vykken’ —

²³ytho an ARLOEDH Duw a'n dannvonas yn-mes a lowarth Eden dhe wonedha an dor may fia kemmerys anodho.

²⁴Ytho ev a jasyas an den yn-mes ha gorra an cherubim a'n barth est dhe lowarth Eden ha kledha ow flammya ow treylya war bub tu rag gwitha fordh an wydhenn a vewnans.