Read Kernewek Jenesis 37 Bible Online

Jenesis 37 - Kernewek bible

Jenesis 37

¹Yakob a drigas y'n pow may hwrussa y das triga avel alyon, yn pow Kanan.

²An re ma yw henedhow Yakob: Yosep, seytek bloedh y oes, esa ow peuri an flokk gans y vreder; maw ova, gans mebyon Bilha ha gans mebyon Zilpa, gwragedh y das; ha Yosep a dhros derivas drog anedha dh'aga thas.

³Lemmyn Ysrael a gara Yosep moy es oll y vebyon erell, rag ev a veu mab y gothni; hag ev a wrug kota liesliw[46] ragdho.

⁴Ha'y vreder a welas y hwre aga thas y gara moy es y vreder oll, hag i a'n kasas, ha ny yllens kewsel yn kuv ganso.

⁵Lemmyn Yosep a hunrosas hunros ha'y dherivas dh'y vreder; hag i a'n kasas hwath moy.

⁶Yn-medh ev dhedha, ‘Goslowewgh, my a'gas pys, an hunros ma re hunrosis:

⁷awotta, yth esen ni ow kelmi manalow y'n gwel, hag awotta, ow manal vy a sevis, ha pesya a'y sav ynwedh; hag awotta, agas manalow hwi a dheuth oll a-dro, hag omblegya dhe'm manal vy.’

⁸Hag yn-medh y vreder dhodho, ‘A vydhydh ow reynya warnan yn hwir? Po a vydhydh orth agan rewlya?’ Ytho i a'n kasas hwath dhe voy drefenn y hunrosow ha'y eryow.

⁹Hag ev a hunrosas hunros arall ha'y dherivas dh'y vreder, ha leverel, ‘Otta, my re hunrosas hunros arta, hag otta, an howl ha'n loer hag unnek ster a omblegyas dhymm.’

¹⁰Mes ev a'n derivas dh'y das ha dh'y vreder ha'y das a'n rebukyas ha leverel dhodho, ‘Pyth yw an hunros ma re wruss'ta hunrosa? A wren ni dos, my ha'th vamm ha'th vreder, dhe omblegya dhe'n leur a-ragos?’

¹¹Ha'y vreder a borthas avi orto; mes y das a withas an dra yn y vrys.

¹²Y vreder eth dhe beuri flokk aga thas yn Shekem.

¹³Hag Ysrael a leveris dhe Yosep, ‘A nyns usi dha vreder ow peuri yn Shekem? Deus, my a wra dha dhannvon dhedha.’ Hag yn-medh ev dhodho. ‘Ottavy.’

¹⁴Hag yn-medh ev dhodho, ‘Ke lemmyn dhe weles mars yw pup-tra yn poynt da gans dha vreder ha gans an flokk, ha dri dhymm derivas warnedha.’ Ytho ev a'n dannvonas dhiworth nans Hebron, hag ev a dheuth dhe Shekem.

¹⁵Ha neb unn gour a'n kavas, hag, awotta, yth esa ow kwandra a-dro y'n gwel; ha'n gour a wovynnas orto, ‘Pyth es'ta ow hwilas?’

¹⁶Yn-medh ev, ‘Yth esov ow hwilas ow breder. Lavar dhymm, my a'th pys, ple'mons i ow peuri?’

¹⁷Hag yn-medh an gour, ‘Gyllys alemma yns i. Rag my a's klewas ow leverel, “Deun ni dhe Dothan.” ’ Ytho Yosep eth war-lergh y vreder ha'ga havoes yn Dothan.

¹⁸Hag i a'n gwelas a-bell, hwath kyns ev dhe dhos nes dhedha, hag i a vrasas er y bynn dh'y ladha.

¹⁹Hag i a leveris an eyl dh'y gila, ‘Ottomma an hunroser enos ow tos.

²⁰Deun lemmyn ha gwren ni y ladha ha'y dewlel yn onan a'n puthow, ha leverel, neb unn tebel vest dh'y dhybri; ha ni a welvydh pandr'a vydh y hunrosow.’

²¹Mes Rewben a glewas ha'y dhelivra mes a'ga leuv ha leverel, ‘Na wren ni kemmeres y vewnans.’

²²Hag yn-medh Rewben dhedha, ‘Na wrewgh skoellya goes; tewlewgh e a-berth y'n puth ma y'n difeythtir. Na wrewgh ystynn leuv er y bynn’ — may halla y dhelivra mes a'ga leuv ha'y dhri arta dh'y das.

²³Pan dheuth Yosep bys yn y vreder i a stryppyas y gota dhiworto, an kota liesliw esa warnodho;

²⁴hag i a'n kemmeras ha'y dewlel a-berth y'n puth. Gwag o an puth, heb bos dowr ynno.

²⁵Hag i a esedhas dhe dhybri bara, hag i a dhrehevis aga lagasow ha mires, hag awotta, karavan a Yshmaelysi ow tos dhiworth Gilead. Yth esa aga howrvergh ow toen spisys, balsam ha myrr, ow vyajya dh'aga doen yn-nans dhe Ejyp.

²⁶Hag yn-medh Yuda dh'y vreder, ‘Py par prow vydh mar ledhyn agan broder ha keles y woes?

²⁷Deun, gwren ni y wertha dhe'n Yshmaelysi ma na vydh agan leuv warnodho. Agan broder, agan kig ni yw ev.’ Ha'y vreder a goelas orto.

²⁸Ena tus a Midyan, gwikoryon, a dremenas, hag i a dennas Yosep ha'y dhrehevel yn-mes a'n puth; hag i a'n gwerthas dhe'n Yshmaelysi a ugens bath a arghans, hag i a dhros Yosep dhe Ejyp.

²⁹Ena Rewben a dhehwelis dhe'n puth, hag otta, nyns esa Yosep y'n puth hag ev a skwardyas y dhillas

³⁰ha dehweles dh'y vreder ha leverel, ‘Nyns usi an maw ena. Ha my, ple'th av?’

³¹Hag i a gemmeras kota Yosep ha ladha bogh ha troghya an kota y'n goes.

³²Ena i a dhannvonas an kota liesliw ha'y dri dh'aga thas ha leverel, ‘Ni re gavas hemma. Mir mars yw kota dha vab, po nag yw.’

³³Hag ev a'n hwithras ha leverel, ‘Kota ow mab! Tebel vest re'n dybris. Skwardys yw Yosep yn sur!’

³⁴Ena Yakob a skwardyas y dhillas ha gorra yskar a-dro dh'y dhiwglun, ha kyni rag y vab lies dydh.

³⁵Hag oll y vebyon hag oll y vyrghes a sevis rag y gonfortya mes ev a skonyas a vos konfortys, hag ev a leveris, ‘My a vynn mos yn-nans dhe'n bedh dhe'm mab, ow kyni.’ Ha'y das a oelas ragdho.

³⁶Mes an Midyanysi a'n gwerthas yn Ejyp dhe Potifar, onan a lyswesyon Faro, an chyf rennyas.[47]