Read Kernewek Jenesis 38 Bible Online

Jenesis 38 - Kernewek bible

Jenesis 38

¹Y'n termyn na, Yuda eth yn-nans dhiworth y vreder, hag ev a dreylyas troha gour a Adullam, Hira y hanow.

²Hag ena, Yuda a welas myrgh gour Kananek, Shua hy hanow; ev a's kemmeras avel gwreg, ha mos a-bervedh dhedhi.

³Ha hi a gonsevyas ha dineythi mab hag ev a elwis y hanow Er.

⁴Ha hi a gonsevyas arta ha dineythi mab ha gelwel y hanow Onan.

⁵Ha hwath arta hi a dhineythis mab ha gelwel y hanow Shela. Ev a veu yn Kezib pan wrug hi y dhineythi.

⁶Ha Yuda a gemmeras gwreg rag Er, y gynsa-genys, ha Tamar o hy hanow.

⁷Hag Er, kynsa-genys Yuda, a veu drog yn golok an ARLOEDH, ha'n ARLOEDH a'n ladhas.

⁸Hag yn-medh Yuda dhe Onan, ‘Ke a-bervedh dhe wreg dha vroder ha gwra dha dhever dhedha avel broder dre lagha, ha drehav has dhe'th vroder.’

⁹Mes Onan a wodhya na vedha an has y has ev, ytho pan eth a-bervedh dhe wreg y vroder ev a skoellyas y has dhe'n leur, ma na rolla has dh'y vroder.

¹⁰Mes drog yn golok an ARLOEDH o an pyth a wrug, hag ev a'n ladhas ynwedh.

¹¹Ena yn-medh Yuda dhe Tamar y wohydh. ‘Gorta avel gwedhwes yn chi dha das erna dheffo ow mab Shela dhe oes.’ Rag ev a leveris, ‘Ma na varwo ev ynwedh, dell verwis y vreder.’ Ytho Tamar eth, ha hi a drigas yn chi hy thas.

¹²Termyn a dremenas, hag ena myrgh Shua, gwreg Yuda, a verwis. Wosa bos konfortys, Yuda eth yn-bann dhe'n dus esa ow knyvyas y dheves, dhe Timna, ev ha'y goweth Hira an Adullamyas.

¹³Hag y feu derivys dhe Tamar, ‘Otta, yma dha hwegron ow mos yn-bann dhe Timna dhe gnyvyas y flokk.’

¹⁴Ha hi a dhiwiskas hy dillas-gwedhwes ha gwiska vayl, ha'y maylya oll a-dro dhedhi, hag esedha orth porth Enaym usi war an fordh dhe Timna; rag hi a wrussa gweles bos Shela tevys dhe oes ha na via hi res dhodho avel gwreg.

¹⁵Yuda a's gwelas, ha tybi hy bos hora rag hi re wrussa kudha hy fas.

¹⁶Hag ev a dreylyas dhedhi ryb an fordh ha leverel, ‘Deus, gas vy dhe dhos a-bervedh dhis’, rag ny wodhya hy bos y wohydh. Yn-medh hi, ‘Pandr'a vynn'ta ri dhymm may hylli dos a-bervedh genev?’

¹⁷Hag yn-medh ev, ‘My a dhannvon dhis mynn gever a'm flokk’; hag yn-medh hi, ‘A vynn'ta ri dhymm gaja erna'n dannvenni?’

¹⁸Hag yn-medh ev, ‘Py par gaja a rov dhis?’ hag yn-medh hi, ‘Dha sel ha'th kordenn[48] ha'th lorgh usi y'th dorn.’ Ytho ev a's ros dhedhi hag ev eth a-bervedh dhedhi ha hi a gonsevyas anodho.

¹⁹Ena hi a sevis ha mos ha gorra a-denewen hy vayl ha gwiska dillas hy gwedhowses.

²⁰Ha Yuda a dhannvonas an mynn dre leuv y goweth, an Adullamyas, rag degemmeres an gaja dhiworth an venyn, mes ny's kavas.

²¹Hag ev a wovynnas orth gwer an tyller na, ow leverel, ‘Ple'ma'n hora-tempel[49] esa yn Enaym, ryb an fordh?’ hag yn-medhons i, ‘Nyns esa hora-tempel mann y'n le ma.’

²²Ytho ev a dhehwelis dhe Yuda ha leverel, ‘Ny wrug vy hy havoes, ha gwer an tyller a leveris ynwedh. “Nyns esa hora-tempel y'n tyller ma.” ’

²³Hag yn-medh Yuda. ‘Gas hi dhe witha an taklow, ma na'gan bo bismer. Otta, my re dhannvonas an mynn ma, mes ny wruss'ta hy throvya.’

²⁴A-dro dhe dri mis wosa hemma, y feu derivys dhe Yuda ow leverel, ‘Tamar, dha wohydh re dheuth ha bos hora, ha, moy es henna, hi re gonsevyas dre horyans.’ Yn-medh Yuda, ‘Drewgh hi yn-mes dhe vos leskys.’

²⁵Ha hi ow pos dres yn-mes, hi a dhannvonas dh'y hwegron ow leverel, ‘Gans flogh ov vy dre wour a bew an taklow ma.’ Hag yn-medh hi, ‘Hwither, dell y'th pysav, piw a bew an sel, an kordenn ha'n lorgh ma.’

²⁶Yuda a's hwithras, ha leverel, ‘Hi re beu moy gwiryon agesov; rag ny wrug vy hy ri dhe'm mab Shela.’ Ha ny wrowedhas gensi namoy.

²⁷Pan dheuth an termyn rag hi dhe dhineythi, yth esa gevellyon yn hy thorr.

²⁸Pan wrug hi dineythi, onan an dhew a worras leuv yn-mes; ha'n welivedhes a'n kemmeras, ha kelmi kordenn gogh war y leuv, ow leverel, ‘Hemma a dheuth yn-mes yn kynsa.’

²⁹Mes ev a gildennas y leuv, hag otta, y vroder a dheuth yn-mes hag yn-medh hi, ‘Assa wrussys torrva ragos!’ Ytho gelwys veu y hanow Peres.

³⁰Hag a-wosa y vroder a dheuth yn-mes, ha war y leuv an gordenn gogh, ha'y hanow a veu gelwys Zeragh.