Read Kernewek Jenesis 39 Bible Online

Jenesis 39 - Kernewek bible

Jenesis 39

¹Lemmyn Yosep a veu dres yn-nans dhe Ejyp, ha Potifar, lyswas Faro, an chyf rennyas,[50] gour ejyptek, a'n prenas dhiworth an Yshmaelysi a'n dros ena.

²Yth esa an ARLOEDH gans Yosep hag ev o gour siwen; hag yth esa ev yn chi y arloedh ejyptek.

³Ha'y arloedh a welas bos an ARLOEDH ganso, ha'n ARLOEDH dhe wul pup-tra esa ow kul dhe siweni yn y dhorn.

⁴Ytho Yosep a gavas gras yn y wolok ha'y servya, hag ev a'n apoyntyas dhe vos gorwoelyas war y ji ha pup-tra a'n jevo ev a ros yn y dhorn.

⁵A-dhia'n termyn may hwrug ev y apoyntya war y ji ha war bup-tra esa dhodho, an ARLOEDH a vennigas chi an Ejyptyan drefenn Yosep; hag yth esa bennath an ARLOEDH war bup-tra esa dhodho y'n chi hag y'n gwel.

⁶Ytho ev a asas pup-tra esa dhodho yn dorn Yosep ha nyns esa dhodho bern a dravyth marnas a'n bara esa ow tybri. Ha Yosep o teg y semlans ha teg dhe weles.

⁷Hag y hwarva, wosa an taklow ma, y trehevis gwreg y arloedh hy dewlagas war Yosep, ha leverel, ‘Gwra growedha genev.’

⁸Mes ev a skonyas ha leverel dhe wreg y arloedh, ‘Otta, nyns eus bern dhe'm arloedh a dravyth yn y ji a'm govis vy, hag ev a ros pup-tra eus dhodho y'm leuv.

⁹Nyns eus denvyth brassa agesov vy y'n chi ma. Ny wrug ev gwitha travyth dhiworthiv marnas ty, drefenn ty dhe vos y wreg. Fatell wrav vy an drogober bras ma, ha pegha erbynn Duw?’

¹⁰Yth esa hi ow kewsel a dhydh dhe dhydh dhe Yosep, mes ny goelas orti, dhe wrowedha gensi na dhe vos gensi.

¹¹Mes unn jydh ev eth a-berth y'n chi dhe wul y ober, ha nyns esa denvyth a dus an chi ena y'n chi.

¹²Ha hi a'n kachyas der y dhillas, ow leverel, ‘Growedh genev.’ Hag ev a asas y dhillas yn hy dorn ha fia dhe'n fo ha mos yn-mes.

¹³Pan welas hi y hwrussa gasa y dhillas yn hy dorn ha fia yn-mes,

¹⁴hi a elwis tus hy chi ha kewsel orta ow leverel, ‘Mirewgh, ev re dhros dhyn ni gour ebrow, dhe wul ges ahanan. Ev a dheuth dhymm dhe wrowedha genev, ha my a elwis gans lev ughel.

¹⁵Pan y'm klewas ow trehevel ow lev ha gelwel, ev a asas y dhillas rybov ha fia ha mos yn-mes.’

¹⁶Ena hi a worras y dhillas yn hy ogas, bys pan dheuth y arloedh dh'y ji.

¹⁷Ha hi a gewsis ganso war-lergh an geryow ma, ‘An kethwas ebrow a wruss'ta dri dhyn ni a dheuth a-bervedh dhymm dhe wul ges ahanav.

¹⁸Mes pan dhrehevis ow lev ha garma, ev a asas y dhillas rybov ha fia yn-mes.’

¹⁹Pan glewas y arloedh geryow y wreg hag a gewsis hi dhodho, ow leverel, ‘War-lergh an taklow ma y hwrug dha gethwas dhymm’, y sorr a dhewis.

²⁰Hag arloedh Yosep a'n kemmeras ha'y worra y'n prison, an tyller mayth o kelmys prisnoryon an myghtern, hag yth esa ev ena y'n prison.

²¹Mes yth esa an ARLOEDH gans Yosep. Ev a dhiskwedhas tregeredh dhodho ha gorra dhodho favour yn golok gwithyas an prison.

²²Ha gwithyas an prison a ros yn leuv Yosep oll an prisnoryon esa y'n prison; ha pup-tra esens i ow kul ena, ev a veu neb a'n gwre.

²³Ny wrug gwithyas an prison vri a dravyth re bia gorrys yn y leuv, rag yth esa an ARLOEDH ganso; ha dhe bup-tra a wre, an ARLOEDH a ros siwena.