Read Kernewek Jenesis 41 Bible Online

Jenesis 41 - Kernewek bible

Jenesis 41

¹Dhe benn diw vlydhen leun, yth esa Faro owth hunrosa, hag awotta, yth esa ev ow sevel ryb an Nil,

²hag otta, yth esa seyth bugh ow tos yn-bann mes a'n Nil, teg aga semlans ha tew aga hig, hag yth esens ow peuri yn mysk an kors.

³Hag otta, yth esa seyth bugh erell ow tos yn-bann war aga lergh mes a'n Nil, drog aga semlans ha tanow aga hig, hag yth esens ow sevel ogas dhe'n bughes war lann an Nil,

⁴Ha'n bughes drog aga semlans ha tanow aga hig a dhybris an seyth bugh teg aga semlans ha tew. Ha Faro a dhifunas.

⁵Hag ev a goskas ha hunrosa nessa torn, hag otta, seyth penn-ys ow tevi war unn arr, tew ha da.

⁶Hag otta, yth esa seyth penn-ys tanow, ha syghys gans gwyns an est owth egina war aga lergh.

⁷Ha'n pennow-ys tanow a lonkas an seyth tew ha leun. Faro a dhifunas hag otta, hunros ova.

⁸Ha myttin, troblys veu y spyrys, hag ev a dhannvonas ha gelwel oll an goelyogyon a Ejyp hag oll hy thus fur, ha Faro a dherivas y hunros dhedha, mes nyns esa denvyth a wodhva aga styrya dhe Faro.

⁹Ena chyf an hanaforyon a gewsis gans Faro, ow leverel, ‘Hedhyw my a berth kov a'm peghosow.

¹⁰Faro o serrys gans y wesyon ha'm gorra yn-dann with yn chi chyf an withysi, my ha chyf an beboryon.

¹¹Ni a hunrosas hunros yn unn nos, my hag ev, pub hunros gans y styryans y honan.

¹²Yth esa Ebrow yowynk genen ena, keth dhe jyf an withysi. Ni a dherivas agan hunrosow dhodho, hag ev a's styryas dhyn, ow styrya dhe bub huni war-lergh y hunros.

¹³Hag y hwarva kepar dell wrussa y styrya dhyn. My a veu daskorrys dhe'm soedh, hag ev a veu kregys.’

¹⁴Ena Faro a dhannvonas ha gelwel Yosep, hag i a'n dros yn hast mes a'n pytt; ev a omdhivarvas ha chanjya y dhillas, ha dos dhe Faro.

¹⁵Yn-medh Faro dhe Yosep, ‘My re hunrosas hunros mes nyns eus denvyth a wodhvo y styrya. My re glewas y vos leverys a-dro dhis, pan glewydh hunros ty a yll y styrya.’

¹⁶Yosep a worthybis Faro, ow leverel, ‘Duw, a-der my, a re dhe Faro gorthyp a gres.’

¹⁷Ena Faro a leveris dhe Yosep, ‘Y'm hunros, ottavy ow sevel ryb glann an Nil.

¹⁸Hag otta, yth esa seyth bugh ow tos yn-bann mes a'n Nil, tew aga hig ha teg aga semlans, hag yth esens ow peuri yn mysk an kors.

¹⁹Hag otta seyth bugh erell ow tos yn-bann war aga lergh, gwann ha pur dhrog aga semlans, ha tanow aga hig. Ny welis bughes mar dhrog le vyth yn pow Ejyp.

²⁰Ha'n bughes tanow ha drog a dhybris an kynsa seyth bugh dew.

²¹Mes pan wrussens dos dh'aga holodhyon, nyns o possybyl godhvos i dhe dhos dh'aga holodhyon. Drog o aga semlans kepar ha kyns. Ena my a dhifunas.

²²My a welas y'm hunros, hag otta seyth penn-ys ow tevi war unn arr, leun ha da.

²³Hag otta, yth esa seyth penn-ys gwedhrys, tanow ha syghys gans gwyns an est, owth egina war aga lergh.

²⁴Ha'n seyth penn-ys tanow a lonkas an seyth penn-ys da. My re dherivas hemma dhe'n goelyogyon, mes nyns esa nagonan anedha a wodhvo y styrya dhymm.’

²⁵Hag yn-medh Yosep dhe Faro, ‘Onan yw hunros Faro. Duw re dhiskwedhas dhe Faro an pyth usi ow kul.

²⁶An seyth bugh dha yw seyth blydhen; ha'n seyth penn-ys da yw seyth blydhen. Onan yw an hunros.

²⁷Ha'n seyth bugh danow ha drog a dheuth yn-bann war aga lergh yw seyth blydhen; ha'n seyth penn-ys gwag, syghys gans gwyns an est yw seyth blydhen a dhivoetter.

²⁸Hemm yw an pyth re leveris vy dhe Faro: an pyth a vynn Duw y wul, ev re'n diskwedhas dhe Faro.

²⁹Awotta, yma seyth blydhen ow tos: palster meur yn oll pow Ejyp.

³⁰Hag y fydh seyth blydhen a dhivoetter ow sevel wosa an re ma, hag oll an palster yn pow Ejyp a vydh ankevys, ha divoetter a dhiswra an wlas.

³¹Ha ny vydh kov a'n palster[51] y'n wlas drefenn an divoetter a dheu a'y wosa; rag poes dres eghenn y fydh.

³²Ha rag bos an hunros diskwedhys diwweyth dhe Faro, sur yw, an dra dhe vos fondys gans Duw hag yma Duw ow fistena dh'y wul.

³³Ytho lemmyn, re dhewisso Faro gour doeth ha fur, ha'y apoyntya war bow Ejyp.

³⁴Re settyo Faro soedhogyon war an wlas ha kemmeres an pympes rann a drevas pow Ejyp y'n seyth blydhen a balster.

³⁵Ha re guntellons oll boes an blydhynyow da ma usi ow tos, ha bernya ys yn-dann leuv Faro, rag boes y'n sitys, ha re wrellons y witha.

³⁶Ha'n boes ma a vydh gwithys rag an pow rag an seyth blydhen a dhivoetter usi ow tos yn pow Ejyp, ma na vo an pow diswrys der an divoetter.’

³⁷Da veu hemma yn golok Faro hag yn golok oll y wesyon.

³⁸Hag yn-medh Faro dh'y wesyon, ‘A yllyn ni kavoes gour a'n par ma, hag ynno Spyrys Duw?’

³⁹Ytho Faro a leveris dhe Yosep, ‘A-ban wrug Duw diskwedhes hemma oll dhiso, nyns eus denvyth mar dhoeth ha fur avelos.

⁴⁰Ty a vydh apoyntys war ow chi, hag oll ow fobel a vydh gostydh dhe'th worhemmynn. Y'n tron yn unnsel, my a vydh brassa agesos jy.’

⁴¹Hag yn-medh Faro dhe Yosep. ‘Mir, my re'th worras war oll pow Ejyp.’

⁴²Ha Faro a gemmeras y vysow-sel dhiworth y leuv ha'y worra war leuv Yosep ha'y wiska gans dillas a sendal ha gorra chayn owrek a-dro dh'y gonna;

⁴³Hag ev a wrug dhodho mos y'n nessa charett esa dhodho, hag i a armas a-dheragdho, ‘Plegyewgh an glin’; hag ev a'n gorras war oll pow Ejyp.

⁴⁴Hag yn-medh Faro dhe Yosep. ‘Faro ov vy, ha hebos jy ny wra denvyth drehevel y leuv na'y droes yn oll pow Ejyp.’

⁴⁵Ha Faro a elwis hanow Yosep Safenath-paaneagh,[52] ha ri dhodho Asenath, myrgh Potifera, oferyas On[53] avel gwreg. Ha Yosep eth yn-mes der oll pow Ejyp.

⁴⁶Ha Yosep o deg bloedh warn ugens y oes pan sevis a-rag Faro myghtern Ejyp. Ha Yosep eth yn-mes dhiworth golok Faro ha tremena der oll pow Ejyp.

⁴⁷Y'n seyth blydhen a balster an tir a ros dornasow a drevas.

⁴⁸Hag ev a guntellas oll an boes a'n seyth blydhen a dremenas yn pow Ejyp, ha gorra an boes a-berth y'n sitys. An boes dhiworth an gwel a-dro dhe bub sita ev a worras a-bervedh ynni.

⁴⁹Yosep a vernyas ys kepar ha tewes an mor, orth y gressya yn feur, bys pan astelas nivera, rag heb niver veu.

⁵⁰Dew vab a veu dineythys dhe Yosep kyns dos blydhen an divoetter, dineythys dhodho gans Asenath, myrgh Potifera, oferyas On.

⁵¹Ha Yosep a elwis hanow an kynsa-genys Manasse, ‘rag Duw re wrug dhymm ankevi oll ow throbel hag oll chi ow thas.’

⁵²Hag ev a elwis hanow an nessa Efraym, ‘rag Duw re wrug dhymm doen frut yn pow ow galarow.’

⁵³An seyth blydhen a balster esa yn pow Ejyp a veu kollenwys,

⁵⁴ha'n seyth blydhen a dhivoetter a dhallathas dos, dell lavarsa Yosep. Yth esa divoetter yn oll an powyow, mes yth esa bara yn pow Ejyp oll.

⁵⁵Hag yth esa oll pow Ejyp ow famya, ha'n bobel a grias war Faro rag bara; hag yn-medh Faro dhe oll an dus a Ejyp, ‘Kewgh dhe Yosep. Gwrewgh an pyth a lever ev dhywgh.’

⁵⁶Hag yth esa an divoetter dres enep an pow oll. Ha Yosep a igoras pub tyller mayth esa ys, ha'y wertha dhe dus Ejyp, rag tynn o an divoetter yn pow Ejyp.

⁵⁷Hag oll an bys a dheuth dhe Ejyp dhe brena dhiworth Yosep, rag bos an divoetter tynn yn oll an bys.