Read Kernewek Jenesis 43 Bible Online

Jenesis 43 - Kernewek bible

Jenesis 43

¹Tynn o an divoetter y'n pow.

²Pan wrussens i gorfenna dybri an ys a wrussens dri yn-mes a Ejyp, yn-medh aga thas dhedha, ‘Dehwelewgh ha prena tamm boes ragon.’

³Mes yn-medh Yuda dhodho, ‘An gour a'gan gwarnyas gans ti ow leverel, “Ny wrewgh hwi gweles ow fas heb bos agas broder genowgh.”

⁴Mar mynnydh dannvon agan broder genen, ni a wra mos yn-nans ha prena boes ragos;

⁵mes mar ny vynnydh y dhannvon, ny vynnyn ni mos yn-nans; rag an gour a leveris dhyn, “Ny welowgh ow fas marnas yma agas broder genowgh.” ’

⁶Ysrael a leveris, ‘Prag y hwrussowgh drog dhymm, ow terivas dhe'n gour bos unn broder moy dhywgh?’

⁷Hag yn-medhons i, ‘An gour a wrug agan apposya a-dro dhyn ni hag a-dro dh'agan kerens, ow leverel, “Yw agas tas hwath yn few? Eus broder dhywgh?” ha ni a dherivas dhodho a-dro dhe'n taklow ma. A yllyn ni godhvos y hwre leverel, “Drewgh agas broder yn-nans”?’

⁸Hag yn-medh Yuda dhe Ysrael y das, ‘Dannvon an maw genev vy, ha ni a sev ha mos, may hwryllyn bewa a-der merwel, ni ha ty ha'gan fleghes.

⁹My ow honan a vydh goestel ragdho. Ty a yll y rekwirya a'm diwla. Mar ny'n drov dhiso ha'y settya a-dheragos, kablus vydhav a-ragos oll ow dydhyow.

¹⁰Rag mar ny wrellen delatya, ni a wrussa dehweles lemmyn diwweyth.’

¹¹Hag yn-medh Ysrael aga thas dhedha, ‘Mars yw yndella, hemma gwrewgh: Kemmerewgh neppyth a wella askorr an tir yn agas seghyer, ha kemmerewgh ro yn-nans rag an gour, tamm balsam ha tamm mel, spisys ha myrr, pistachys hag alamandow.

¹²Ha kemmerewgh diwweyth an myns a vona yn agas dorn, hag ynwedh an mona a veu daskorrys yn ganow agas seghyer; kemmerewgh e arta yn agas dorn. Martesen gwall ova.

¹³Ha kemmerewgh agas broder. Sevewgh ha dehwelewgh dhe'n gour.

¹⁴Ha re rollo Duw Ollgalloesek[54] mersi dhywgh dherag an gour, may tannvonno dhywgh agas broder arall, ha Benyamin. Ha my — mar pydh ow fleghes kellys, kellys vydhons.’

¹⁵Ha'n wer a gemmeras an ro ma, ha diwweyth an myns a vona yn aga dorn, ha Benyamin. I a sevis ha mos yn-nans dhe Ejyp, ha sevel dherag Yosep.

¹⁶Ha Yosep a welas Benyamin gansa, ha leverel dhe rewler y ji, ‘Doro an wer a-berth y'n chi ha ladha best ha pareusi pup-tra, rag y fydh an wer ow tybri genev dhe hanter-dydh.’

¹⁷Ha'n gour a wrug dell leveris Yosep hag ev a dhros an wer a-berth yn chi Yosep.

¹⁸Ha'n wer a berthi own rag i dhe vos dres a-bervedh yn chi Yosep, hag yn-medhons, ‘Ni re beu dres a-ji drefenn an mona a veu daskorrys yn agan seghyer an kynsa gweyth. Ev a vynn omsettya er agan pynn ha koedha warnan, ha'gan kemmeres dhe vos kethyon, ha'gan asenes ynwedh.’

¹⁹Hag i a dheuth nes dhe rewler chi Yosep ha kewsel orto orth daras an chi,

²⁰ha leverel, ‘A arloedh, dhe wir ni a dheuth yn kynsa dhe brena boes.

²¹Pan dheuthen dhe davern hag igeri agan seghyer, otta, yth esa mona pub huni yn ganow y sagh, an poes leun a'gan mona; ytho ni re'n dros arta yn agan dorn.

²²Ha ni re dhros mona arall yn agan dorn dhe brena boes. Ny wodhon piw a worras agan mona yn agan seghyer.’

²³Hag yn-medh ev, ‘Kres dhywgh hwi. Na berthewgh own. Agas Duw ha Duw agas tas re ros dhywgh tresor yn agas seghyer. Agas mona a dheuth dhymmo vy.’ Ena ev a dhros Simeon yn-mes dhedha.

²⁴Ha'n gour a dhros an wer a-bervedh yn chi Yosep ha ri dowr dhedha, hag i a wolghas aga threys; hag ev a ros boes dh'aga asenes.

²⁵Hag i a bareusis an ro rag devedhyans Yosep dhe hanter-dydh, rag i re wrussa klewes i dhe dhybri ena.

²⁶Yosep a dheuth a-berth y'n chi, hag i a dhros dhodho y'n chi an ro esa yn aga dorn, hag omblegya dhodho dhe'n leur.

²⁷Hag ev a wovynnas orta fatell ens, ow leverel, ‘Usi agas tas yn poynt da, an den koth a wrussowgh kewsel anodho? Yw ev hwath yn few?’

²⁸Hag yn-medhons i, ‘Yma dha was agan tas yn poynt da. Hwath yn few yw ev.’ Hag i a omblegyas ha koedha dhe'n dor a-ragdho.

²⁹Mes ev a dhrehevis y dhewlagas ha gweles Benyamin y vroder, mab y vamm ev, ha leverel, ‘Yw hemma agas broder yowynka, re wrussowgh hwi kewsel dhymm anodho?’ Ena yn-medh ev, ‘Re bo Duw grassyes dhis, ow mab’,

³⁰Ha Yosep a fistenas, rag movyes veu y golodhyon drefenn y vroder, hag ev a vynnas oela; hag ev eth a-ji dhe'n chambour hag oela ena.

³¹Ena ev a wolghas y fas ha dos yn-mes owth omgontrolya, ha leverel, ‘Settyewgh bara.’

³²Hag i a settyas boes ragdho ev y honan diberthys ha ragdha i aga honan diberthys ha rag an Ejyptianys esa ow tybri ganso aga honan diberthys, rag ny yll an Ejyptianys dybri gans an Ebrowyon, rag tra gasadow yw henna dhe'n Ejyptianys.

³³I a esedhas a-dheragdho, an kynsa-genys war-lergh y wir genesik, ha'n yowynka war-lergh y yowynkneth. Ha'n wer a viras gans marth an eyl orth y gila.

³⁴Hag ev a gemmeras rannow a voes esa a-ragdho ha'ga ri dhedha i; mes rann Benyamin a veu pympgweyth moy es rannow oll an re erell. Ytho i a evas, ha bos medhow ganso.