Read Kernewek Jenesis 46 Bible Online

Jenesis 46 - Kernewek bible

Jenesis 46

¹Ytho Ysrael a dravalyas gans pup-tra esa dhodho ha dos dhe Beer-sheba ha sakrifia sakrifisow dhe Dhuw y das Ysak.

²Ha Duw a gewsis orth Ysrael dre welesigethow y'n nos ha leverel, ‘Yakob, Yakob.’ Hag yn-medh ev, ‘Ottavy.’

³Hag yn-medh ev, ‘My yw Duw, Duw dha das Ysak. Na borth own a vos yn-nans dhe Ejyp, rag ena my a wra dhis bos kenedhel vras.

⁴Yth av vy yn-nans genes dhe Ejyp, ha my a wra dha dhri arta yn-bann. Ha Yosep a worr y leuv war dha dhewlagas.’

⁵Ha Yakob a sevis dhiworth Beer-sheba ha mebyon Ysrael a dhug Yakob aga thas, ha'ga fleghes ha'ga gwragedh yn-kerdh y'n kertys a wrug Faro aga dannvon rag y dhoen.

⁶Hag i a gemmeras aga enyvales ha'ga pyth re wrussa kavoes yn pow Kanan, ha dos dhe Ejyp, Yakob hag oll y has ganso,

⁷y vebyon, ha mebyon y vebyon ganso, y vyrghes, ha myrghes y vebyon. Hag oll y has ev a dhros ganso bys yn Ejyp.

⁸An re ma yw henwyn mebyon Ysrael neb a dheuth dhe Ejyp: Yakob ha'y vebyon. Rewben, kynsa-genys Yakob,

⁹ha mebyon Rewben: Hano, Pallu, Hesron ha Karmi.

¹⁰Mebyon Simeon: Yemuel, Yamin, Ohad, Yakin, Sohar ha Shaul, mab an Gananyades.

¹¹Mebyon Levi: Gershon, Kohath ha Merari.

¹²Mebyon Yuda: Er, Onan, Shela, Peres, ha Zeragh; mes Er hag Onan a verwis yn pow Kanan. Mebyon Peres o Hesron ha Hamul.

¹³Mebyon Yssakar: Tola, Puva, Yob ha Shimron.

¹⁴Mebyon Zebulun: Sered, Elon ha Yahleel.

¹⁵An re ma yw mebyon Lea a dhineythis hi dhe Yakob yn Padan-aram, hag ynwedh Dina y vyrgh. Oll y vebyon ha'y vyrghes yw trydhek enev warn ugens.

¹⁶Mebyon Gad: Sifyon, Haggi, Shuni, Esbon; Eri, Arodi hag Areli.

¹⁷Mebyon Asher: Yimna, Yshva, Yshvi ha Beria, ha Seragh aga hwoer. Ha mebyon Beria: Heber ha Malkiel.

¹⁸An re ma yw mebyon Zilpa a ros Laban dhe Lea y vyrgh, ha hi a dhineythis an re ma dhe Yakob, hwetek enev.

¹⁹Mebyon Raghel, gwreg Yakob: Yosep ha Benyamin.

²⁰Y feu dineythys dhe Yosep yn pow Ejyp Manasse hag Efraym, neb a wrug Asenath myrgh Potifera, oferyas On[56] dineythi dhodho.[57]

²¹Mebyon Benyamin: Bela, Beker, hag Ashbel; Gera ha Naaman; Ehi ha Rosh; Muppim, Huppim hag Ard.

²²An re ma yw mebyon Raghel a veu dineythys dhe Yakob: an enevow oll, peswardhek.

²³Mebyon Dan: Hushim.

²⁴Mebyon Naftali: Yahseel, Guni, Yeser ha Shillem.

²⁵An re ma yw mebyon Bilha a ros Laban dhe Raghel y vyrgh. Hi a dhineythis an re ma dhe Yakob: an enevow oll, seyth.

²⁶Oll an enevow ow tos gans Yakob dhe Ejyp, an re a dheuth yn-mes a'y dhiwglun ev, heb nivera gwragedh mebyon Yakob, o hwegh ha tri-ugens enev.

²⁷Ha mebyon Yosep a veu dineythys dhodho yn Ejyp a veu dew enev. Oll an enevow a ji Yakob a dheuth dhe Ejyp a veu deg ha tri-ugens.

²⁸Ev a dhannvonas Yuda yn-rag dhe Yosep, may tiskwettho dhodho an fordh dhe Goshen.[58] Pan dheuthons bys yn pow Goshen,

²⁹Yosep a hernessyas y jarett ha mos yn-bann dhe vetya Ysrael y das yn Goshen. Pan y'n gwelas,[59] ev a goedhas war y gonna hag oela war y gonna termyn hir.

³⁰Hag yn-medh Ysrael dhe Yosep, ‘Gas vy dhe verwel lemmyn wosa gweles dha fas, rag ty dhe vos hwath yn few.’

³¹Hag yn-medh Yosep dh'y vreder ha dhe deylu y das, ‘My a wra mos yn-bann dhe dherivas an dra dhe Faro ha leverel dhodho, “Ow breder ha mayni ow thas esa yn pow Kanan re dheuth dhymmo vy.

³²An wer ma yw bugeledh deves, rag i a veu gwithysi enyvales, hag i re dhros gansa aga flokkys ha'ga greow ha pup-tra eus gansa.”

³³Ha pan wra Faro agas gelwel, ha govynn orthowgh, “Py par ober a wrewgh hwi?”

³⁴res yw dhywgh leverel, “Dha wesyon yw gwithysi enyvales a-dhia agan yowynkneth bys y'n eur ma, ha ni ha'gan tasow”, rag may hyllowgh triga yn pow Goshen; rag pub bugel deves yw kasadow dhe'n Ejyptianys.’