Read Kernewek Jenesis 48 Bible Online

Jenesis 48 - Kernewek bible

Jenesis 48

¹Y hwarva, wosa an taklow ma, nebonan dhe leverel dhe Yosep, ‘Otta, klav yw dha das.’ Ytho ev a gemmeras y dhew vab Manasse hag Efraym ganso.

²Ha nebonan a dherivas dhe Yakob ow leverel, ‘Otta, dha vab Yosep yw devedhys dhiso’, hag Ysrael a omgennerthas hag esedha yn-bann war an gweli.

³Hag yn-medh Yakob dhe Yosep, ‘Duw Ollgalloesek[63] re omdhiskwedhas dhymm yn Luz, yn pow Kanan, ha'm benniga,

⁴ha leverel dhymm, “Awotta, my a vynn gul dhis doen frut ha kressya; ha my a wra dhis bos kemmynieth a genedhlow; ha my a re an tir ma dhe'th has war dha lergh dh'y berghenna bys vykken.”

⁵Ha lemmyn, dhymmo vy yw dha dhew vab a veu dineythys dhis yn pow Ejyp kyns my dhe dhos dhiso yn Ejyp; Efraym ha Manasse a vydh dhymmo vy, kepar dell yw Rewben ha Simeon.

⁶Ha'th agh dineythys genes war aga lergh a vydh dhiso jy. I a vydh gelwys war-lergh hanow aga breder yn aga eretons.

⁷Pan dheuth vy dhiworth Padan, Raghel a verwis rybov yn pow Kanan war an fordh, hwath unn pols byghan kyns dos dhe Efrath, ha my a's ynkleudhyas ena war an fordh dhe Efrath.’ Henn yw Bethlehem.

⁸Ysrael a welas mebyon Yosep ha leverel, ‘Piw yw an re ma?’

⁹Yn-medh Yosep dh'y das, ‘An re ma yw ow mebyon re wrug Duw aga ri dhymm omma.’ Hag yn-medh ev, ‘Doro i dhymmo, my a'th pys, ha my a wra aga benniga.’

¹⁰Ha tewl o dewlagas Ysrael dre gothni ha ny ylli gweles. Ytho ev a's dros nes dhodho hag ev a ammas dhedha ha'ga byrla.

¹¹Hag yn-medh Ysrael dhe Yosep, ‘Ny wrussen gwaytyas gweles dha fas, mes otta, Duw re dhiskwedhas dhymm dha has ynwedh.’

¹²Ha Yosep a's kemmeras dhiworth y dhewlin hag omblegya, gans y fas dhe'n leur.

¹³Ha Yosep a's kemmeras aga dew, Efraym yn y dhorn dhyghow a-gledh dhe Ysrael, ha Manasse yn y dhorn gledh a-dhyghow dhe Ysrael; hag ev a's dros nes dhodho.

¹⁴Hag Ysrael a ystynnas y leuv dhyghow ha'y gorra war benn Efraym, an yowynka, ha'y leuv gledh war benn Manasse. Ev a worras y dhiwla a-dreus, kynth o Manasse an kynsa-genys.

¹⁵Hag ev a vennigas Yosep, ow leverel, ‘An Duw may hwre kerdhes dheragdho ow thasow Abraham hag Ysak, An Duw re beu bugel dhymm der ow bewnans oll bys y'n jydh hedhyw,

¹⁶an el neb a'm delivras dhiworth pub droktra, re vennikko an vebyon; ha re bo gelwys warnedha ow hanow vy ha hanow ow thasow Abraham hag Ysak; ha re gressyons dhe vos bras aga niver yn kres an norvys.’

¹⁷Pan welas Yosep bos y das ow korra y leuv dhyghow war benn Efraym, kamm o henna yn y dhewlagas; hag ev a synsis leuv y das dh'y threylya dhiworth penn Efraym dhe benn Manasse.

¹⁸Hag yn-medh Yosep dh'y das, ‘Nansi, ow thas; rag hemm yw an kynsa-genys. Gorr dha leuv dhyghow war y benn ev.’

¹⁹Mes y das a naghas ha leverel, ‘My a woer, ow mab, my a woer. Ev ynwedh a dheu ha bos pobel, hag ev ynwedh a vydh bras; mes y vroder yowynka a vydh brassa agesso, ha'y has a vydh kenedhlow pals.’

²⁰Hag ev a's bennigas an jydh na, ow leverel, ‘Dredhos jy y fydh Ysrael ow ri bennath, ow leverel, “Re'th wrello Duw kepar hag Efraym ha kepar ha Manasse.” ’ Yndella ev a worras Efraym kyns Manasse.

²¹Hag yn-medh Ysrael dhe Yosep, ‘Otta, yth esov ow merwel, mes y fydh Duw genowgh ha'gas dri arta dhe bow agas tasow.

²²Ha my a re dhis unn rann moy es dell rov dhe'th vreder, hag a wrug hy hemmeres mes a leuv an Amorysi gans ow kledha ha gans ow gwarak.’