Read Kernewek Jenesis 49 Bible Online

Jenesis 49 - Kernewek bible

Jenesis 49

¹Ena Yakob a elwis y vebyon ha leverel, ‘Omguntellewgh war-barth, may hwrylliv derivas dhywgh an pyth a hwyrvydh dhywgh y'n dydhyow a dheu.

²Omguntellewgh ha klewes, a vebyon Yakob. Goslowewgh orth Ysrael agas tas.

³‘Rewben, ow hynsa-genys osta, ow krevder ha kynsa frut ow nerth gourel, moyha yn reowta, moyha yn krevder.

⁴Ewynek avel dowr, ny vydh dhis ragwir, rag ty eth yn-bann dhe weli dha das. Ena ty a'n defolas; ty eth[64] yn-bann dhe'm growedhva.

⁵‘Breder yw Simeon ha Levi. Arvow garowder yw aga hellylli.

⁶Na wres o enev entra yn aga hevrin; na vedhes ow enor kesunys gans aga huntelles; rag yn aga sorr i a ladhas gour, war-lergh aga sians i a evredhis tarow.[65]

⁷Milligys re bo aga sorr, rag fell yw, ha'ga honnar, rag tynn yw. My a wra aga ranna yn Yakob ha'ga skattra yn Ysrael.

⁸‘Yuda, dha vreder a wra dha wormel. Yma dha leuv war gilbenn dha eskerens. Mebyon dha das a omblek dhiso.

⁹Kolen lew yw Yuda. Dhiworth an preydh, ow mab, ty res eth yn-bann. Ev a blattyas, ev a wrowedhas kepar ha lew, ha kepar ha lewes; piw a wra dhodho sevel?

¹⁰Ny dreyl an welenn dhiworth Yuda na'n dernwelenn a-dhiworth y dreys, erna dheffo ev neb a's pew;[66] ha dhodho ev y fydh omaj an poblow.

¹¹Ow kelmi y asenik dhe'n gwinbrenn hag ebel y gasek-asen dhe'n gwinbrenn flour, ev a wolgh y dhillas y'n gwin, ha'y bows yn goes grappys.

¹²Terlentri a wra y dhewlagas gans gwin, ha gwynn vydh y dhyns gans leth.

¹³‘Zebulun a vydh trigys orth an morrep, hag a vydh porth rag gorholyon; ha'y denewen a vydh troha Sidon.

¹⁴‘Asen askornek yw Yssakar ow krowedha ynter an dhew sagh-diber.

¹⁵Ev a welas bos da y bowesva, ha hweg an tir; ev a blegyas y skoedh dhe'n begh, hag a veu gorrys dhe hwel krev avel kethwas.

¹⁶‘Dan a varn y bobel avel onan a loethow Ysrael.

¹⁷Dan a vydh sarf ryb an fordh, nader gornek ryb an troe'lergh, ow tynsel gwewennow an margh may koedh an marghek war-dhelergh.

¹⁸‘My a wayt dha selwyans, A ARLOEDH.

¹⁹‘Gad, bagas a omsett er y bynn, mes ev a omsett erbynn an re dhelergh.

²⁰‘Yn-mes a Asher rych vydh y vara, hag ev a re boes denti ryel.

²¹‘Naftali yw ewik delivrys dhe wari; ev a re geryow teg.

²²‘Skorrenn leun a frut yw Yosep, skorrenn leun a frut ryb fenten. Yma y varrow ow resek dres an ke.

²³An sethoryon a'n provokyas yn feur. Eskarogeth a's teva er y bynn;

²⁴mes y warak a dhuryas fyrv ha giow y dhiwdhorn[67] dre dhiwdhorn an Galloesek a Yakob, yn hanow an Bugel, karrek Ysrael,[68]

²⁵dre Dhuw dha das neb a'th weres, ha'n Ollgalloesek[69] neb a'th vennik, gans bennathow an nevow a-vann, bennathow an downder a wrowedh war-nans, bennathow diwvronn ha torr.

²⁶Bennathow dha das yw kreffa es bennathow an menydhyow heb diwedh, es bennathow an breow heb diwedh; re bons war benn Yosep, ha war grogen an pryns yn mysk y vreder.

²⁷‘Benyamin yw bleydh ow skwardya; Myttin ev a dheber y breydh, ha gorthugher ev a rann an pyth re beu pyllys.’

²⁸Oll an re ma yw dewdhek loeth Ysrael, ha hemm yw an pyth a leveris aga thas dhedha pan wrug ev aga benniga; ev a's bennigas pubonan war-lergh y vennath y honan.

²⁹Ena ev a erghis dhedha, ow leverel dhedha, ‘My a vydh kuntellys war-barth gans ow fobel. Gwrewgh ow ynkleudhyas gans ow thasow y'n kav yn gwel Efron an Hittyas,

³⁰y'n kav yn gwel Makpela usi dherag Mamre yn pow Kanan, a brenas Abraham gans an gwel dhiworth Efron an Hittyas, avel perghennogeth rag ynkleudhva.

³¹Ena, i a ynkleudhyas Abraham ha Sara y wreg; ena i a ynkleudhyas Ysak ha Rebeka y wreg, hag ena my a ynkleudhyas Lea.

³²An gwel ha'n kav ynno a veu prenys dhiworth mebyon Heth.’

³³Ha Yakob a worfennas erghi dh'y vebyon ha tenna yn-bann y dreys a-berth yn y weli, hag anella y dhiwettha anall. Hag ev a veu kuntelles dh'y bobel.