Read Kernewek Jenesis 5 Bible Online

Jenesis 5 - Kernewek bible

Jenesis 5

¹Hemm yw lyver henedhow Adam. Y'n jydh may formyas Duw mab-den, yn hevelep Duw y'n gwrug ev.

²Gorow ha benow ev a's gwrug ha'ga benniga ha gelwel aga henwyn ‘Den’ y'n jydh may fons i formys.

³Adam a vewas deg bloedh ha hwegh-ugens, ha dineythi mab yn y hevelep, war-lergh y imaj ev, ha gelwel y hanow Seth.

⁴Dydhyow Adam wosa ev dhe dhineythi Seth a veu eth kans blydhen, hag ev a dhineythis mebyon ha myrghes.

⁵Dydhyow oll bewnans Adam a veu naw kans blydhen ha deg warn ugens; hag ev a verwis.

⁶Seth a vewas kans blydhen ha pymp, ha dineythi Enos.

⁷Seth a vewas eth kans blydhen ha seyth wosa ev dhe dhineythi Enos; hag ev a dhineythis mebyon ha myrghes.

⁸Dydhyow oll Seth a veu naw kans blydhen ha dewdhek; hag ev a verwis.

⁹Enos a vewas deg blydhen ha peswar-ugens ha dineythi Kenan.

¹⁰Enos a vewas eth kans blydhen ha pymthek wosa ev dhe dhineythi Kenan, hag ev a dhineythis mebyon ha myrghes.

¹¹Dydhyow oll Enos a veu naw kans blydhen ha pymp; hag ev a verwis.

¹²Kenan a vewas deg blydhen ha tri-ugens, ha dineythi Mahalalel.

¹³Kenan a vewas eth kans blydhen ha dew-ugens wosa ev dhe dhineythi Mahalalel, hag ev a dhineythis mebyon ha myrghes.

¹⁴Dydhyow oll Kenan a veu naw kans bloedh ha deg; hag ev a verwis.

¹⁵Mahalalel a vewas pymp blydhen ha tri-ugens ha dineythi Yared.

¹⁶Ha Mahalalel a vewas eth kans blydhen ha deg warn ugens wosa ev dhe dhineythi Yared, hag ev a dhineythis mebyon ha myrghes.

¹⁷Dydhyow oll Mahalalel a veu eth kans blydhen, pymthek ha peswar-ugens; hag ev a verwis.

¹⁸Yared a vewas eth-ugens blydhen ha dew ha dineythi Enok.

¹⁹Yared a vewas eth kans blydhen wosa ev dhe dhineythi Enok, hag ev a dhineythis mebyon ha myrghes.

²⁰Hag oll dydhyow Yared a veu naw kans blydhen, dew ha tri-ugens; hag ev a verwis.

²¹Enok a vewas pymp blydhen ha tri-ugens ha dineythi Methusela.

²²Hag Enok a gerdhas gans Duw trihans blydhen wosa ev dhe dhineythi Methusela, hag ev a dhineythis mebyon ha myrghes.

²³Ha dydhyow oll Enok a veu trihans blydhen pymp ha tri-ugens.

²⁴Hag Enok a gerdhas gans Duw ha ny veu moy, rag Duw a'n kemmeras.

²⁵Methusela a vewas seyth blydhen ha naw-ugens ha dineythi Lamek.

²⁶Ha Methusela a vewas seyth kans vlydhen, diw ha peswar-ugens wosa ev dhe dhineythi Lamek, hag ev a dhineythis mebyon ha myrghes.

²⁷Dydhyow oll Methusela a veu naw kans blydhen naw ha tri-ugens; hag ev a verwis.

²⁸Lamek a vewas diw vlydhen ha naw-ugens ha dineythi mab.

²⁹Hag ev a elwis y hanow Noy, ow leverel, ‘An keth hemma a re dhyn konfort dhiworth agan ober ha dhiworth lavur agan diwla drefenn an dor re vollethis an ARLOEDH.’

³⁰Ha Lamek a vewas pymp kans blydhen, pymthek ha peswar-ugens wosa ev dhe dhineythi Noy, hag ev a dhineythis mebyon ha myrghes.

³¹Dydhyow oll Lamek a veu seyth kans blydhen, seytek ha tri-ugens; hag ev a verwis.

³²Noy o pymp kans bloedh, ha Noy a dhineythis Shem, Ham ha Yafeth.