Read Kernewek Jenesis 8 Bible Online

Jenesis 8 - Kernewek bible

Jenesis 8

¹Mes Duw a borthas kov a Noy hag oll an bestes, hag oll an chatel esa ganso y'n gorhel ha Duw a wrug dhe wyns tremena war an nor ha bashes veu an dowrow.

²Fentynyow an downder ha fenestri nev a veu stoppyes, ha'n glaw dhiworth nev a veu lettys;

³ha'n dowrow a omdennas heb hedhi dhiworth an tir, ha wosa kans dydh ha hanter-kans an dowrow a veu lehes.

⁴Hag y'n seythves mis, yn seytegves dydh an mis, an gorhel a bowesas war menydhyow Ararat.

⁵Ha'n dowrow a besyas lehe bys y'n degves mis. Y'n degves mis, yn kynsa dydh an mis, pennow an menydhyow a veu gwelys.

⁶Ena dhe benn dew-ugens dydh, Noy a igoras fenester[8] an gorhel re wrussa ev gwruthyl,

⁷ha dannvon yn-mes marghvran, hag yth esa hi ow mos yn-mes ha dehweles bys pan veu desyghys an dowrow dhiworth an tir.

⁸Ena ev a dhannvonas kolomm dhiworto dhe weles mars o an dowrow lehes dhiworth enep an dor.

⁹Mes ny gavas an golomm powesva rag godhen hy throes, ha hi a dhehwelis dhodho y'n gorhel, rag y feu an dowrow war enep oll an nor. Ena ev a ystynnas y leuv ha'y hachya, ha'y dri dhodho a-bervedh y'n gorhel,

¹⁰Ev a wortas hwath seyth dydh moy. Hag arta ev a dhannvonas an golomm mes a'n gorhel

¹¹Ha'n golomm a dheuth dhodho y'n gorthugher, hag awotta, yth esa delenn oliv yr yn hy ganow, may hwodhva Noy bos an dowrow bashes dhiworth an tir

¹²Hag ev a wortas hwath seyth dydh moy ha dannvon an golomm yn-mes; ha ny dhehwelis dhodho arta.

¹³Y'n kynsa blydhen ha hwegh kans, y'n kynsa mis, yn kynsa dydh an mis, y feu an dowrow desyghys dhiworth an nor; ha Noy a gemmeras yn-mes gorher an gorhel ha mires, hag awotta, sygh o enep an dor.

¹⁴Hag y'n nessa mis, y'n seythves warn ugens dydh a'n mis, sygh o an nor.

¹⁵Ha Duw a gewsis orth Noy, ow leverel,

¹⁶‘Ke yn-rag yn-mes a'n gorhel, ty ha'th wreg ha'th vebyon ha gwragedh dha vebyon genes.

¹⁷Doro yn-mes genes pub tra vew usi genes, a bub kig, ydhyn ha bestes, pub pryv ow kramya war an nor, may hwrellons hesya yn pals war an nor ha doen frut ha kressya war an nor.’

¹⁸Ytho Noy eth yn-mes, ha'y vebyon ha'y wreg ha gwragedh y vebyon ganso.

¹⁹Pub best, pub pryv, pub edhen, ha pup-tra ow kramya war an dor, war-lergh aga hinda, eth yn-mes a'n gorhel.

²⁰Ha Noy a dhrehevis alter dhe'n ARLOEDH ha kemmeres rann a'n bestes glan ha'n ydhyn glan hag offrynna offrynnow leskys war an alter.

²¹Ha'n ARLOEDH a vlasas an sawer plegadow, ha'n ARLOEDH a leveris yn y golonn, ‘Ny wrav vy mollethi an dor namoy drefenn mab-den; rag drog yw bodh kolonn mab-den a-dhia y yowynkneth. Ny wrav namoy gweskel pub tra vew, dell wrug vy.

²²Hedre vo an nor ow pesya, hasa ha trevas, yeynder ha toemmder, hav ha gwav, dydh ha nos, ny wrons sessya.’