Read Kernewek 2 Samuel 10 Bible Online

2 Samuel 10 - Kernewek bible

2 Samuel 10

¹Wosa hemma, myghtern an Ammonysi a verwis, ha Hanun y vab a reynyas yn y le.

²Ena yn-medh Davydh, ‘My a dhiskwa tregeredh dhe Hanun mab Nahash, kepar dell dhiskwedhas y das tregeredh dhymm.’ Ytho Davydh a dhannvonas dh'y gonfortya dre leuv y wesyon rag y das. Pan dheuth an wesyon dhe diredh an Ammonysi,

³pennsevigyon an Ammonysi a leveris dhe Hanun aga arloedh, ‘A dybydh bos Davydh owth enora dha das y'th wolok, hag ev ow tannvon konforters dhis? A ny dhannvonas Davydh y wesyon dhis dhe hwithra an sita, dhe aspia orti, ha dh'y domhwel?’

⁴Ytho Hanun a dhalghennas gwesyon Davydh ha divarva hanter aga barv, ha treghi dhe-ves aga dillas y'n kres bys aga diwbedrenn, ha'ga dannvon dhe-ves.

⁵Pan veu derivys orth Davydh, ev a dhannvonas dh'aga metya, rag an wer a berthi meth bras. Yn-medh an myghtern, ‘Gortewgh yn Yeriko bys pan vo agas barvow tevys, hag ena dehwelewgh.’

⁶Pan welas an Ammonysi i dhe vos kasadow dherag Davydh, an Ammonysi a dhannvonas hag arveth Aramysi Beth-rehob hag Aramysi Soba, ugens mil droesek, ha dhiworth myghtern Maaka mil wour, ha dhiworth governour Tob, dewdhek mil wour.

⁷Pan glewas Davydh anodho, ev a dhannvonas Yoab hag oll lu an gasoryon.

⁸Mebyon Ammon a dheuth yn-mes, hag i a settyas aga honan yn aray rag batel orth entrans an yet; mes y feu Aramysi Soba ha Rehob, ha gwer Tob ha Maaka, arayys y'n gwel.

⁹Pan welas Yoab bos an vatel settys er y bynn a-rag hag a-dryv, ev a dhewisas re a'n gwella kasoryon a Ysrael, ha'ga settya yn aray erbynn Aram;

¹⁰ha remenant y wer ev a worras yn charj Abishay y vroder, hag ev a's arayas erbynn an Ammonysi.

¹¹Yn-medh ev, ‘Mars yw Aram re grev ragov, ena ty a'm gweres; mes mars yw an Ammonysi re grev ragos, ena my a dheu ha'th weres.

¹²Bydh hardh, ha bedhen kolonnek rag agan pobel, ha rag sitys agan Duw; ha re wrello an ARLOEDH an pyth a hevel da dhodho.’

¹³Ena Yoab ha'n soudoryon esa ganso a dheuth nes dhe'n vatel erbynn Aram; hag i a fias a-dheragdho.

¹⁴Pan welas an Ammonysi Aram dhe fia, i ynwedh a fias a-dherag Abishay, hag entra a-ji dhe'n sita. Ena Yoab a dhehwelis dhiworth an Ammonysi, ha dos dhe Yerusalem.

¹⁵Mes pan welas an Aramysi i dhe vos fethys gans Ysrael, i a omguntellas war-barth.

¹⁶Hadadezer a dhannvonas ha dri yn-mes an Aramysi esa dres an Avon; hag i a dheuth dhe Helam, ha Shobak kaslewydh lu Hadadezer orth aga ledya.

¹⁷Pan veu derivys orth Davydh, ev a guntellas oll Ysrael war-barth, ha treusi an Yordan, ha dos dhe Helam. An Aramysi a settyas aga honan yn aray erbynn Davydh ha batalyas orto.

¹⁸Mes an Aramysi a fias a-dherag Ysrael; hag a'n Aramysi Davydh a ladhas an wer a seyth kans charett, ha dewgens mil varghek, ha gweskel Shobak kaslewydh aga lu, hag ev a verwis ena.

¹⁹Pan welas oll an vyghternedh neb o gwesyon Hadadezer, aga bos fethys a-dherag Ysrael, i a wrug kres gans Ysrael, ha'ga servya.