Read Kernewek 2 Samuel 11 Bible Online

2 Samuel 11 - Kernewek bible

2 Samuel 11

¹Yn gwenton an vlydhen, y'n termyn mayth a myghternedh yn-rag dhe vatalyas, Davydh a dhannvonas Yoab ha'y wesyon ganso, hag oll Ysrael; hag i a dhistruis an Ammonysi, hag omsettya a-dro dhe Rabba. Mes Davydh a wortas yn Yerusalem.

²Yn neb unn gorthugher Davydh a sevis a'y weli ha kerdhes a-dro war do chi an myghtern, ha dhiworth an to ev a welas benyn owth omwolghi; ha semlans an venyn o pur deg.

³Davydh a dhannvonas nebonan dhe wovynn a-dro dhe'n venyn. Ev a leveris, ‘A nyns yw homma Bathsheba myrgh Eliam, gwreg Uria an Hittyas?’

⁴Ytho Davydh a dhannvonas kannasow dh'y hyrghes, ha hi a dheuth dhodho, hag ev a wrowedhas gensi. (Lemmyn yth esa hi ow purhe hy honan wosa hy amseryow.) Ena hi a dhehwelis dh'y chi.

⁵An venyn a omdhuk, ha dannvon ha derivas dhe Davydh, ‘Gans flogh ov vy.’

⁶Ytho Davydh a dhannvonas ger dhe Yoab ha leverel, ‘Dannvon dhymm Uria an Hittyas.’ Ha Yoab a dhannvonas Uria dhe Davydh.

⁷Pan dheuth Uria dhodho, Davydh a wovynnas orto a-dro dhe Yoab, ha'n lu, ha fatell e an vresel.

⁸Ena Davydh a leveris dhe Uria, ‘Ke yn-nans dhe'th chi, ha golgh dha dhewdroes.’ Hag Uria eth yn-mes a ji an myghtern, ha ro dhiworth an myghtern a holyas war y lergh.

⁹Mes Uria a goskas orth porth chi an myghtern gans oll gwesyon y arloedh, ha nyns eth yn-nans dh'y ji.

¹⁰Pan dherivsons orth Davydh, ‘Ny wrug Uria mones yn-nans dh'y ji’, Davydh a leveris dhe Uria, ‘A ny dheuthys dhiworth vyaj? Prag na wruss'ta mones yn-nans dhe'th chi?’

¹¹Hag yn-medh Uria dhe Davydh, ‘Yma an argh hag Ysrael ha Yuda trigys yn skovvaow; hag yma ow arloedh Yoab ha gwesyon ow arloedh ow kampya y'n gwel; a wrav vi ytho mones dhe'm chi, dhe dhybri hag eva, ha growedha gans ow gwreg? Kepar dell vewydh, ha dha enev a vew, ny vynnav gul tra a'n par na.’

¹²Ena Davydh a leveris dhe Uria, ‘Trig omma hedhyw ynwedh, hag a-vorow my a'th tannvon dhe-ves.’ Ytho Uria a drigas yn Yerusalem y'n jydh na ha'n jydh a-wosa.

¹³Ena Davydh a'n gelwis dhe dhybri hag eva dheragdho, hag ev a'n gwrug medhow; ha gorthugherweyth ev eth yn-mes dhe wrowedha war y weli gans gwesyon y arloedh, mes ny wrug ev mones yn-nans dh'y ji.

¹⁴Ternos myttin Davydh a skrifas lyther dhe Yoab, ha'y dhannvon dre leuv Uria.

¹⁵Y'n lyther ev a skrifas, ‘Sett Uria y'n voward, y'n kalessa omladh. Ena omdenn a-dhiworto, may fydh ev gweskys, ha merwel.’

¹⁶Pan esa Yoab owth omsettya a-dro dhe'n sita, ev a settyas Uria yn tyller may hwodhya bos gwer an eskar an moyha nerthek.

¹⁷Pan dheuth gwer an sita yn-mes, ha batalyas orth Yoab: rann a'n bobel dhiworth wesyon Davydh a goedhas; hag Uria an Hittyas a verwis ynwedh.

¹⁸Ena Yoab a dhannvonas ha derivas dhe Davydh oll an nowodhow a-dro dhe'n vatel;

¹⁹hag ev a erghis dhe'n gannas, ow leverel, ‘Pan worfennsys derivas an nowodhow a-dro dhe'n vatel dhe'n myghtern,

²⁰mar pydh sorr an myghtern drehevys, hag ev a lever dhis, “Prag y teuthewgh mar nes dhe'n sita dhe vatalyas? A ny wodhvewgh i dhe denna dhiworth an fos?

²¹Piw a weskis Abimelek mab Yerub-besheth? A ny wrug benyn tewlel men-melin a-wartha warnodho dhiworth an fos may ferwis yn Thebes? Prag y teuthewgh nes dhe'n fos?” ena lavar, “Dha was Uria an Hittyas yw marow ynwedh.” ’

²²Ytho, an gannas eth, ha dos ha derivas orth Davydh pup-tra a wrussa Yoab y dhannvon dhe dherivas.

²³An gannas a leveris dhe Davydh, ‘I a'gan fethas, ha dos yn-mes dhyn y'n gwel; mes ni a wrug dhedha kildenna bys porth an yet.

²⁴Ena an sethoryon a dennas sethow dhiworth an fos war dha wesyon; ha re a wesyon an myghtern yw marow. Ha dha was Uria an Hittyas yw marow ynwedh.’

²⁵Yn-medh Davydh dhe'n gannas, ‘Yndella ty a lever dhe Yoab, “Na vedhes an dra ma drog y'th wolok, rag an kledha a dheber an eyl kepar ha'y gila; krevha dha vatel orth an sita, ha'y domhwel.” Ha kennerth e.’

²⁶Pan glewas gwreg Uria bos hy gour marow, hi a gynis rag hy gour.

²⁷Wosa an kynvann dhe vos passyes, Davydh a dhannvonas ha'y hyrghes dh'y ji, ha hi eth ha bos y wreg, ha dineythi dhodho mab. Mes drog yn golok an ARLOEDH o an pyth re wrussa Davydh.