Read Kernewek 2 Samuel 12 Bible Online

2 Samuel 12 - Kernewek bible

2 Samuel 12

¹An ARLOEDH a dhannvonas Nathan dhe Davydh. Ev a dheuth dhodho, ha leverel dhodho, ‘Yth esa dew wour yn neb unn sita, an eyl rych ha'y gila boghosek.

²Yth esa dhe'n golusek niver bras a flokkys ha chatel;

³mes nyns esa dhe'n boghosek travyth marnas unn oenes vyghan, re brensa. Ev a's magas, ha hi a devis ganso ha gans y fleghes; hi a dhybri a'y bastell, hag eva a'y hanaf, ha growedha yn y askra, ha hi o kepar ha myrgh dhodho.

⁴Hag y teuth tremenyas dhe'n golusek, mes ny'n jevo an golonn dhe gemmeres a'y flokkys y honan na'y jatel dhe bareusi rag an tremenyas neb re dhothya dhodho, mes ev a gemmeras oenes an boghosek, ha'y fareusi rag an gour re dhothya dhodho.’

⁵Ena sorr Davydh a dhewis yn toemm erbynn an gour. Ev a leveris dhe Nathan, ‘Dell vew an ARLOEDH, an gour neb re wrug hemma a dhervynn an mernans;

⁶res yw ev dhe dhaskorra an oenes pedergweyth, drefenn ev dhe wul hemma, ha drefenn nag esa dhodho truedh vyth.’

⁷Ena yn-medh Nathan dhe Davydh, ‘Ty yw an gour. Yndellma y lever an ARLOEDH, Duw Ysrael: My a'th untyas myghtern war Ysrael, ha my a'th telivras yn-mes a leuv Sowl.

⁸My a ros dhis chi dha vester, ha gwragedh dha vester yn dha askra, ha ri dhis chi Ysrael ha Yuda; ha mar pe henna re vyghan, my a rosa dhis kemmys moy.

⁹Prag y tispressys ger an ARLOEDH, dhe wul an drog yn y wolok? Ty re weskis Uria an Hittyas gans an kledha, ha kemmeres y wreg dhe vos dha wreg, ha'y ladha gans kledha an Ammonysi.

¹⁰Rakhenna ny dreyl an kledha nevra dhiworth dha ji, rag ty re'm dispresyas, ha kemmeres gwreg Uria an Hittyas dhe vos dha wreg.

¹¹Yndellma y lever an ARLOEDH: Awotta, my a dhrehav drog warnas yn-mes a'th chi; ha my a gemmer dha wragedh dherag dha dhewlagas, ha'ga ri dhe'th kentrevek, hag ev a wrowedh gans dha wragedh yn golok an howl ma.

¹²Rag ty a'n gwrug yn-dann gel; mes my a wra hemma a-rag oll Ysrael, hag a-rag an howl.’

¹³Hag yn-medh Davydh dhe Nathan, ‘My re beghas erbynn an ARLOEDH.’ Ha Nathan a leveris dhe Davydh, ‘Lemmyn an ARLOEDH re worras dhe-ves dha begh; ny verwydh.

¹⁴Byttegyns, drefenn ty dhe skornya glan an ARLOEDH der an ober ma, an mab yw genys dhis a verow.’

¹⁵Ena Nathan eth dh'y ji. Ha'n ARLOEDHa weskis an mab a dhineythis gwreg Uria dhe Davydh, hag ev o pur glav.

¹⁶Ytho Davydh a bysis war Dhuw rag an mab; Davydh a benysas, ha mones a-ji ha growedha dres nos war an dor.

¹⁷Henavogyon y ji a sevis a-ughto, dh'y dhrehevel dhiworth an dor; mes ny vynnas, na ny dhybris boes gansa.

¹⁸Y'n seythves dydh an mab a verwis. Ha gwesyon Davydh a borthas own a dherivas orto bos y vab marow; rag i a leveris, ‘Awotta, pan o an mab yn few, ni a gewsis dhodho, ha ny woslowas orthyn; ytho fatell yllyn derivas orto bos y vab marow? Ev a wra neppyth drog dhodho y honan.’

¹⁹Mes pan welas Davydh bos y wesyon ow hwystra war-barth, ev a wodhva bos y vab marow; ha Davydh a leveris dh'y wesyon, ‘Yw an flogh marow?’ Hag i a worthybis, ‘Marow yw.’

²⁰Ena Davydh a sevis a'n dor, hag omwolghi, hag ura y honan, ha chanjya y dhillas. Ev eth a-ji dhe ji an ARLOEDH, ha gordhya; ena ev eth dh'y ji y honan; ha pan wovynnas, i a settyas boes dheragdho hag ev a dhybris.

²¹Ena y wesyon a leveris dhodho, ‘Pandr'yw hemma re wruss'ta? Ty a benysas hag oela rag an flogh pan o ev yn few; mes pan verwis an flogh, ty a sevis ha dybri boes.’

²²Yn-medh ev, ‘Pan o an flogh hwath yn few, my a benysas hag oela; rag my a leveris, “Piw a woer mara pydh an ARLOEDH grassyes dhymm, may fewo an flogh?”

²³Mes lemmyn ev yw marow; prag y tegoedh dhymm penys? A allav vy y dhri dhe-dre dhymm arta? Yth av vy dhodho, mes ny dhehwel ev dhymm.’

²⁴Ena Davydh a gonfortyas Bathsheba y wreg, ha mones dhedhi, ha growedha gensi; ha hi a dhineythis mab, ha'y henwel Solomon. Drefenn an ARLOEDH dh'y gara,

²⁵ev a dhannvonas ger dre leuv Nathan an profoes, ev dhe vos henwys Yedidia,[10] a-barth an ARLOEDH.

²⁶Lemmyn Yoab a vatalyas orth Rabba an Ammonysi, ha kemmeres an sita ryel.

²⁷Yoab a dhannvonas kannasow dhe Davydh, ha leverel. ‘My re vatalyas orth Rabba; ynwedh my re gemmeras kastell an dowrow.

²⁸Lemmyn kuntell remenant an bobel war-barth, ha kamp erbynn an sita, ha kemmer hi; poken my a gemmer an sita, ha hi a vydh henwys war-lergh ow hanow vy.’

²⁹Ytho Davydh a guntellas oll an bobel war-barth ha mones dhe Rabba, ha batalyas orti ha'y hemmeres.

³⁰Ev a gemmeras kurun aga myghtern dhiworth y benn; ha'y foes o talent a owr, hag yth esa ynni men drudh; ha hi a veu gorrys war benn Davydh. Ynwedh ev a dhros yn-mes preydh an sita, kals bras.

³¹Ev a dhros yn-mes an bobel esa ynni, ha'ga settya dhe lavur gans heskennow, ha pigellow a horn, ha boelyow a horn, hag ev a's gorras dhe lavur orth an kowynnow-brykk. Yndella y hwrug dhe oll sitys an Ammonysi. Ena Davydh hag oll an bobel a dhehwelis dhe Yerusalem.