Read Kernewek 2 Samuel 15 Bible Online

2 Samuel 15 - Kernewek bible

2 Samuel 15

¹Wosa hemma Absalom a gavas ragdho y honan charett ha mergh, ha hanter-kans korfwithyas dhe boenya a-ragdho.

²Absalom a sevi a-varr ha sevel ryb fordh an yet; ha peskweyth may to nebonan a'n jeva ken dhe vos gorrys a-rag an myghtern rag breus, Absalom a elwi dhodho, ha leverel, ‘A by sita os'ta?’ Hag ev a worthybi, ‘Dha was yw dhiworth onan a loethow Ysrael.’

³Ena Absalom a leveri dhodho, ‘Otta, dha vaterow yw da ha gwir; mes nyns eus kannas vyth a'n myghtern dhe'th klewes.’

⁴Hag ynwedh Absalom a leveri, ‘Ogh mar pen vy apoyntys breusyas y'n pow! Ena peub a's teva ken po kas a dho dhymm, ha my a wre dhodho gwirvreus.’

⁵Hag yndella yth o, peskweyth may to nebonan nes dhodho dhe omblegya a-ragdho, ev a ystynna y leuv, ha kavoes dalghenn ynno hag amma dhodho.

⁶Absalom a wre hemma dhe oll tus Ysrael a dho dhe'n myghtern rag breus; yndellma Absalom a ladras kolonnow gwer Ysrael.

⁷Yn diwedh peder blydhen Absalom a leveris dhe'n myghtern, ‘My a'th pys, gas vy dhe vones dhe Hebron ha kollenwel ow ambos re ambosis dhe'n ARLOEDH.

⁸Rag dha was a ambosas ambos pan esen trigys yn Geshur yn Aram, ha leverel. “Mara'm dre an ARLOEDH arta dhe Yerusalem, ena my a wordh an ARLOEDH.” ’

⁹Hag yn-medh an myghtern dhodho, ‘Ke yn kres.’ Ytho ev a sevis, ha mones dhe Hebron.

¹⁰Mes Absalom a dhannvonas aspioryon der oll loethow Ysrael, ha leverel, ‘Kettell glewowgh son an hirgorn, ena germewgh, “Absalom a reyn yn Hebron.” ’

¹¹Gans Absalom yth eth dewkans gour a Yerusalem. I re bia gelwys, hag i eth yn aga sempledh, ha ny wodhyens travyth.

¹²Pan esa Absalom owth offrynna sakrifisow, ev a dhannvonas war-lergh Ahithofel an Gilonyas, kusulyer Davydh, dhiworth y sita Gilo. Ha'n bras o krev; rag an bobel a gressyas prest gans Absalom.

¹³Kannas a dheuth dhe Davydh, ha leverel, ‘Yma kolonn gwer Ysrael war-lergh Absalom.’

¹⁴Ena Davydh a leveris dhe oll y wesyon esa ganso yn Yerusalem, ‘Sevewgh, ha fiyn; poken ny dhienkyn dhiworth Absalom. Fistenewgh, po ev a dremen dreson a-dhesempis, ha dri drog warnan, ha gweskel an sita gans min an kledha.’

¹⁵Yn-medh gwesyon an myghtern dhe'n myghtern, ‘Awotta, parys yw dha wesyon dhe wul pypynag a dhewisso agan arloedh an myghtern.’

¹⁶Ytho an myghtern eth yn-rag, hag oll y vayni war y lergh. Ha'n myghtern a asas deg iswragedh dhe witha an chi.

¹⁷An myghtern eth yn-rag, gans oll an bobel war y lergh, hag i a hedhis orth an diwettha chi.

¹⁸Oll y wesyon a dremenas dresto; hag oll an Kerethysi, hag oll an Pelethysi, hag oll an hwegh kans Gittyas re dhothya war y lergh dhiworth Gath, a dremenas a-rag an myghtern.

¹⁹Ena yn-medh an myghtern dhe Ittay an Gittyas, ‘Prag yth esos ow tos genen? Dehwel, ha trig gans an myghtern; rag ty yw estren, hag ynwedh divres dhiworth dha vammvro.

²⁰De y teuthys, ha hedhyw, a wrav vy ty dhe wandra a-dro genen, pan wrav vy mos plepynag mayth ylliv? Dehwel, ha kemmer dha vreder genes; ha re bo tregeredh ha lelder genowgh.’

²¹Mes Ittay a worthybis dhe'n myghtern, ha leverel, ‘Dell vew an ARLOEDH, ha dell vew ow arloedh an myghtern, plepynag may fo an myghtern, kyn fo yn mernans po yn bewnans, ena ynwedh y fydh dha was.’

²²Yn-medh Davydh dhe Ittay, ‘Ke ha tremen yn-rag.’ Ytho Ittay an Gittyas a dremenas yn-rag, gans oll y wer hag oll an re vyghan esa ganso.

²³Hag oll an vro a oelas gans lev ughel, hag oll an bobel a dremenas yn-rag; an myghtern ynwedh a dremenas dres nans Kidron, hag oll an bobel a dremenas yn-rag, troha fordh an gwylvos.

²⁴Hag otta, y feu Sadok ena ynwedh, hag oll an Levysi ganso, ow toen argh kevambos Duw. I a settyas argh Duw yn-nans, hag Abiathar eth yn-bann dhe sakrifia bys pan worfennsa oll an bobel tremena mes a'n sita.

²⁵Ena yn-medh an myghtern dhe Sadok, ‘Kemmer argh Duw a-ji dhe'n sita arta. Mar kavav gras yn golok an ARLOEDH, ev a'm dre arta, ha gasa my dh'y gweles, hi hy honan ha'y thrigva.

²⁶Mes mar lever yndella, “Ny gemmerav plesour vyth ynnos”, ottavy, gwres ev dhymm kepar dell hevel da dhodho.’

²⁷Yn-medh an myghtern ynwedh dhe Sadok an oferyas, ‘Mir, dehwel a-ji dhe'n sita yn kres, ha'th tew vab genes, Ahimaas dha vab, ha Yonathan mab Abiathar.

²⁸Mir, my a worta yn rysyow an gwylvos erna dheffo ger dhiworthis dhe dherivas dhymm.’

²⁹Ytho Sadok hag Abiathar a gemmeras argh Duw arta dhe Yerusalem, hag i a drigas ena.

³⁰Mes Davydh eth yn-bann dre leder menydh Oliv, hag ev a oelas hag ev ow mos yn-bann, gans y benn kudhys, hag ev eth dieskis; hag oll an bobel esa ganso a gudhas aga fenn ynwedh, hag i a oelas hag i ow mos yn-bann.

³¹Lemmyn y feu derivys dhe Davydh bos Ahithofel yn mysk an vrasoryon gans Absalom. Ytho Davydh a leveris, ‘A ARLOEDH, my a'th pys, treyl kusul Ahithofel dhe follneth.’

³²Pan dheuth Davydh dhe wartha an menydh, tyller mayth esa Duw gordhys, awotta, Hushay an Arkyas a dheuth dh'y vetya gans y gota skwardys ha dor war y benn.

³³Yn-medh Davydh dhodho, ‘Mar tremenydh yn-rag genev, ena, ty a vydh begh dhymm.

³⁴Mes mar tehwelydh dhe'n sita, ha leverel dhe Absalom, “My a vydh dha was, A vyghtern; kepar dell en vy gwas dha das yn termyn passys, lemmyn my a vydh dha was”, ena ty a yll lesta ragov kusul Ahithofel.

³⁵A ny vydh an oferysi Sadok hag Abiathar genes ena? Ytho pypynag a glewydh dhiworth chi an myghtern, ty a'n deriv dhe Sadok hag Abiathar an oferysi.

³⁶Yma gansa ena aga dew vab, Ahimaas mab, ha Yonathan mab Abiathar; ha dresta ty a wra derivas dhymm pup-tra a glewydh.’

³⁷Ytho Hushay koweth Davydh a dheuth a-ji dhe'n sita, y'n keth termyn mayth esa Absalom owth entra Yerusalem.