Read Kernewek 2 Samuel 16 Bible Online

2 Samuel 16 - Kernewek bible

2 Samuel 16

¹Pan dremenas Davydh pols dres gwartha an menydh, awotta, Siba gwas Mefibosheth a'n metyas, gans dew asen dibrys, hag yth esa warnedha dewkans torth-vara, ha kans tesenn a rappys, ha kans frut hav, ha seth a win.

²Yn-medh an myghtern dhe Siba, ‘Prag y hwruss'ta dri an re ma?’ Siba a worthybis, ‘An asenes yw rag mayni an myghtern dhe varghogeth warnedha; ha'n bara ha frutys hav yw rag an wer yowynk dhe dhybri; ha'n gwin yw rag an re a glamder y'n gwylvos dhe eva.’

³Yn-medh an myghtern, ‘Ple'ma mab dha vester?’ Siba a leveris dhe'n myghtern, ‘Yma trigys yn Yerusalem; rag yn-medh ev, “Hedhyw chi Ysrael a dhaskorr dhymm gwlaskor ow thas.” ’

⁴Ena yn-medh an myghtern dhe Siba, ‘Otta, oll esa dhe Mefibosheth a vydh dhis lemmyn.’ Ha Siba a leveris, ‘My a omblek; re gyffiv gras y'th wolok, ow arloedh an myghtern.’

⁵Pan dheuth Davydh dhe Bahurim, otta, gour a deylu chi Sowl a dheuth yn-mes, ha'y hanow Shimei mab Gera, hag ev a vollethis hag ev ow mones yn-mes.

⁶Ev a labydhas Davydh hag oll gwesyon myghtern Davydh gans meyn; hag yth esa oll an bobel hag oll an gasoryon war y leuv dhyghow ha war y leuv gledh.

⁷Yndella y leveri Shimei pan vollethis, ‘Deus yn-mes, deus yn-mes, ty wour goesek, ha ty wour Belial!

⁸An ARLOEDH re attylis warnas oll goes chi Sowl, may reynsys yn y le; ha'n ARLOEDH re dhelivras an wlaskor yn leuv Absalom dha vab, hag ottajy yn anken, drefenn dha vos gour goesek.’

⁹Ena Abishay mab Seruya a leveris dhe'n myghtern, ‘Prag y volleth an ki marow ma ow arloedh an myghtern? Gas vy dhe vones yn-rag, my a'th pys, ha kemmeres dhe-ves y benn.’

¹⁰Mes yn-medh an myghtern, ‘Pyth eus yntra my ha hwi, hwi vebyon Seruya? Mar kwra ev mollethi rag an ARLOEDH dhe leverel dhodho, “Molleth Davydh”, piw a lever ena, “Prag y hwruss'ta yndella?” ’

¹¹Ena Davydh a leveris dhe Abishay, ha dhe oll y wesyon, ‘Awotta, ow mab, neb a dheuth yn-mes a'm kolodhyon vy, a hwila ow bewnans; pygemmys moy lemmyn y hyll an Benyaminyas ma y wul! Gesiwgh ev dhodho y honan, ha gesiwgh ev dhe vollethi; rag an ARLOEDH re worhemmynnis dhodho.

¹²Martesen an ARLOEDH a wel ow galar[14] ha attyli dhymm gans da yn le y volleth hedhyw.’

¹³Ytho, Davydh ha'y wer eth war an fordh, ha Shimei eth war denewen an menydh a-dal dhodho, ow mollethi ha tewlel meyn ha tewlel doust orto.

¹⁴Ha'n myghtern, hag oll an bobel esa ganso a dheuth dhe'n Yordan[15] skwith; hag ena ev a dhiskwithas y honan.

¹⁵Lemmyn Absalom, hag oll an bobel, gwer Ysrael, a dheuth dhe Yerusalem, hag yth esa Ahithofel ganso.

¹⁶Ena pan dheuth Hushay an Arkyas, koweth Davydh, dhe Absalom, Hushay a leveris dhodho. ‘Re vewo an myghtern, re vewo an myghtern!’

¹⁷Hag Absalom a leveris dhe Hushay, ‘Yw hemma dha lelder dhe'th koweth? Prag na wruss'ta mones gans dha goweth?’

¹⁸Yn-medh Hushay dhe Absalom, ‘Nansi; mes an den neb re beu dewisys gans an ARLOEDH, ha gans oll an bobel ma, hag oll gwer Ysrael, dhodho my a vydh, ha ganso my a drig.

¹⁹Ynwedh, piw a servyav? A ny servyav dherag y vab? Kepar dell re servis dherag dha das, yndella y fydhav dheragos.’

²⁰Ena yn-medh Absalom dhe Ahithofel, ‘Ro dhyn dha gusul; pandr'a wren?’

²¹Yn-medh Ahithofel dhe Absalom, ‘Ke a-ji dhe iswragedh dha das, re asas dhe witha an chi; hag oll Ysrael a glew ty dhe wul dha honan kasadow gans dha das, ena diwla peub eus genes a vydh krevhes.’

²²Ytho i a dhrehevis tylda rag Absalom war do an chi; hag Absalom eth a-ji dhe iswragedh y das yn golok Ysrael oll.

²³Lemmyn y'n dydhyow na kusul Ahithofel o par dell wovynnir orth Duw; yndella yth o oll kusul Ahithofel gans Davydh ha gans Absalom.