Read Kernewek 2 Samuel 17 Bible Online

2 Samuel 17 - Kernewek bible

2 Samuel 17

¹Ynwedh Ahithofel a leveris dhe Absalom, ‘Gas vy dhe dhewis dewdhek mil wour, ha my a sev ha helghya war-lergh Davydh an nos ma.

²My a dheu warnodho hag ev skwith ha'y dhiwleuv gwannhes, ha my a'n gwra dhe berthi own; hag oll an bobel usi ganso a fi; ha ny waskav nagonan saw unnsel an myghtern,

³ha my a dhre oll an bobel arta dhis, kepar dell dhehwelis oll an bobel dhe'n gour a hwilydh, hag oll an bobel a vydh yn kres.’

⁴Ha'n gusul o da yn dewlagas Absalom, hag oll henavogyon Ysrael.

⁵Ena yn-medh Absalom, ‘Galw lemmyn Hushay an Arkyas, ha klewyn ynwedh an pyth a lever.’

⁶Pan dheuth Hushay dhe Absalom, Absalom a leveris dhodho, ‘Ahithofel re gewsis war-lergh an gusul ma; a wren ni war-lergh y gusul? Mar ny'n gwren, kows.’

⁷Ena Hushay a leveris dhe Absalom, ‘An gusul re ros Ahithofel, nyns yw da an weyth ma.

⁸Rag ty a woer bos dha das ha'y wer kasoryon, ha'ga sorr dhe dhewi, kepar hag orses ledrys hy orsigow y'n gwel. Ynwedh dha das yw gour konnyk yn bresel, ha ny vynn tremena an nos gans y wer.

⁹Awotta lemmyn, ev re omgudhas yn onan an pyttow, po yn onan an tylleryow erell. Ha pan goedh nebes anedha y'n kynsa omsettyans, piwpynag a'n klew a lever, “Yth esa ladhva yn mysk an bobel a hol Absalom.”

¹⁰Ha'n gour ynwedh neb yw kolonnek, gans kolonn kepar ha lew, a deudh glan dhe-ves gans own, rag oll Ysrael a woer bos dha das kasor, ha'n re usi ganso yw kasoryon alloesek.

¹¹Rakhenna, my a gusul, bedhes oll Ysrael kuntellys dhis, dhiworth Dan bys yn Beer-sheba, kepar ha'n tewes usi ryb an mor yn niver, ha ty dha honan ow mos y'n vatel.

¹²Ena ni a dheu warnodho plepynag may fo kevys, ha ni a goedh warnodho kepar dell goedh an gluth war an dor; ha ny vydh ev gesys, nag onan a'n wer usi ganso.

¹³Ha mar omdenn a-ji dhe neb sita, ena oll Ysrael a dhre lovonow dhe'n sita na, ha ni a's tenn y'n nans, bys ma na vydh kevys ena unn vilienn anedhi.’

¹⁴Hag Absalom hag oll gwer Ysrael a leveris, ‘Kusul Hushay an Arkyas yw gwell ages kusul Ahithofel.’ Rag an ARLOEDH re worhemmynnsa dhe lesta kusul dha Ahithofel, may halla an ARLOEDH dri drog war Absalom.

¹⁵Ena yn-medh Hushay dhe Sadok hag Abiathar an oferysi, ‘Yndellma Ahithofel re gusulyas Absalom ha henavogyon Ysrael; hag yndellma my re gusulyas.

¹⁶Lemmyn dannvenewgh hware, ha derivewgh dhe Davydh, “Na dremen an nos na yn rysyow an gwylvos, mes tremen yn-rag; poken an myghtern hag oll an bobel usi ganso a vydh kollenkys.” ’

¹⁷Y fedha Yonathan hag Ahimaas ow kortos yn En-rogel, ha maghteth e ha derivas orta, hag i e ha derivas orth myghtern Davydh, rag ny yllens bos gwelys owth entra an sita.

¹⁸Mes gour yowynk a's gwelas, ha derivas orth Absalom; ytho aga dew a asas yn uskis ha dos dhe ji gour yn Bahurim a'n jeva puth yn y glos; hag i eth yn-nans ynno.

¹⁹Y wreg a gemmeras kudhans ha'y ystynn dres anow an puth, ha lesa brunyon barlys warnodho; ha nyns esa travyth godhvedhys anodho.

²⁰Pan dheuth gwesyon Absalom dhe ji an venyn, i a leveris, ‘Ple'ma Ahimaas ha Yonathan?’ Ha'n venyn a worthybis dhedha, ‘I re dremenas dres gover an dowr.’ Ha pan hwilsons ha ny allsons aga havoes, i a dhehwelis dhe Yerusalem.

²¹Wosa i dhe vos dhe-ves, i a dheuth yn-bann yn-mes a'n puth, ha mones ha derivas orth myghtern Davydh. Yn-medhons dhe Davydh, ‘Sav ha tremen dres an dowr hware; rag re gusulyas Ahithofel er dha bynn kepar dell wrug.’

²²Ena Davydh a sevis, hag oll an bobel esa ganso, hag i a dremenas dres an Yordan. Hag orth tardh an jydh, ny veu gesys denvyth anedha neb na dremensa dres an Yordan.

²³Pan welas Ahithofel na veu y gusul holys, ev a dhibras y asen ha sevel ha mones dh'y ji, dh'y sita, hag ordena y vayni, hag omgregi ha merwel, hag ev a veu ynkleudhys yn bedh y das.

²⁴Ena Davydh a dheuth dhe Mahanaym. Hag Absalom a dremenas dres an Yordan, ev hag oll gwer Ysrael ganso.

²⁵Lemmyn Absalom re settsa Amasa yn le Yoab war an lu. Amasa o mab gour henwys Yether an Yshmaelyas[16] neb a alsa a-ji dhe Abigayl, myrgh Nahash myrgh Seruya mamm Yoab.

²⁶Ysrael hag Absalom a gampyas yn pow Gilead.

²⁷Pan dheuth Davydh dhe Mahanaym, Shobi mab Nahash a Rabba an Ammonysi, ha Makir mab Ammiel a Lo-debar, ha Barzillay an Gileadyas a Rogelim

²⁸a dhros gweliow, basonyow, ha lestri a bri; ynwedh gwaneth, heydh, bleus, ys rostys, fav, ha lentilow,

²⁹mel hag amanynn, ha deves, ha keus bughes, rag Davydh ha'n bobel ganso dhe dhybri. Rag i a leveris, ‘Yma dhe'n bobel nown ha skwithter ha syghes y'n gwylvos.’