Read Kernewek 2 Samuel 2 Bible Online

2 Samuel 2 - Kernewek bible

2 Samuel 2

¹Wosa hemma Davydh a wovynnas orth an ARLOEDH, ‘A wrav vy mos yn-bann a-ji dhe onan a sitys Yuda?’ Ha'n ARLOEDH a leveris dhodho, ‘Ke yn-bann.’ Davydh a wovynnas, ‘Ple'th av yn-bann?’ Hag yn-medh ev, ‘Dhe Hebron.’

²Ytho Davydh eth yn-bann di, war-barth gans y dhiw wreg, Ahinoam an Yezreelyades, hag Abigayl gwreg Nabal an Karmelyas.

³Davydh a dhros yn-bann y wer esa ganso, pub gour gans y deylu; hag i a drigas yn sitys Hebron.

⁴Ena gwer Yuda a dheuth, hag eno i a untyas Davydh myghtern war ji Yuda. Pan dherivsons orth Davydh, ‘An re a ynkleudhyas Sowl o gwer Yabesh-gilead’,

⁵Davydh a dhannvonas kannasow dhe wer Yabesh-gilead ha leverel dhedha, ‘Bennigys owgh a'n ARLOEDH drefenn hwi dhe wul an tregeredh ma dh'agas arloedh, dhe Sowl, ha'y ynkleudhyas.

⁶Lemmyn re dhiskwettho an ARLOEDH tregeredh ha lelder dhywgh, ha my ynwedh a dhiskwa an kuvder ma dhywgh, drefenn hwi dhe wul hemma.

⁷Lemmyn bedhes krev agas diwleuv, ha bedhewgh kolonnek; rag Sowl agas arloedh yw marow, ha chi Yuda re'm untyas myghtern warnedha.’

⁸Lemmyn ytho Abner mab Ner, kaslewydh lu Sowl, re gemmersa Ish-bosheth mab Sowl, ha'y dhri dhe Mahanaym.

⁹Ev a'n gwrug myghtern war Gilead, ha war an Asherysi[3], ha war Yezreel, ha war Efraym, ha war Benyamin, ha war oll Ysrael.

¹⁰Ish-bosheth mab Sowl o dewgens bloedh pan dheuth ha bos myghtern war Ysrael, hag ev a reynyas diw vlydhen. Mes chi Yuda a holyas Davydh.

¹¹An termyn mayth esa Davydh myghtern yn Hebron war ji Yuda o seyth blydhen ha hwegh mis.

¹²Abner mab Ner, ha gwesyon Ish-bosheth mab Sowl, eth yn-mes a Mahanaym dhe Gibeon.

¹³Yoab mab Seruya, ha gwesyon Davydh, ynwedh eth yn-mes hag i a vetyas war-barth ryb poll Gibeon. I a esedhas, an eyl bagas unn tu a'n poll ha'n bagas arall a'n tu arall dhe'n poll.

¹⁴Yn-medh Abner dhe Yoab, ‘Seves an wer yowynk hag omladhens a-dheragon.’ Hag yn-medh Yoab, ‘Sevens.’

¹⁵Ena i a sevis ha tremena orth niver, dewdhek a Benyamin hag Ish-bosheth mab Sowl, ha dewdhek a wesyon Davydh.

¹⁶Pubonan a settyas dalghenn yn penn y gila, ha gwana y gledha yn tenewen y erbynner may koedhsons war-barth. Rakhenna an tyller yw henwys Helkath-hassurim, usi yn Gibeon.

¹⁷An gas o fest kales an jydh na; hag Abner ha gwer Ysrael a veu fethys a-dherag gwesyon Davydh.

¹⁸Yth esa tri mab Seruya ena, Yoab, Abishay, hag Asahel. Lemmyn maga skav war y droes avel ewik y'n gwel o Asahel;

¹⁹hag Asahel a jasyas war-lergh Abner, ha ny dreylyas na dhe'n dyghow na dhe'n kledh hag ev orth y holya.

²⁰Ena Abner a dreylyas a-dro ha govynn, ‘Os'ta Asahel?’ Hag ev a worthybis, ‘Ov.’

²¹Hag Abner a armas dhodho, ‘Treyl a-denewen dhe'th kledh po dhe'th tyghow, ha dalghenn onan a'n wer yowynk ha dhestrypp y arvow ragos dha honan.’ Mes ny vynnas treylya a-denewen dhiworto.

²²Hag Abner a armas arta dhe Asahel, ‘Treyl a-denewen dhiworthiv. Prag y koedh dhymm dha weskel dhe'n leur? Fatell allsen ytho diskwedhes ow fas dhe Yoab dha vroder?’

²³Mes ev a naghas treylya a-denewen. Ytho Abner a'n gweskis gans penn-goeles sheft y wuw yn y dorr may teuth an guw mes a'y geyn. Ev a goedhas ena, ha merwel poran y'n tyller na. Ha peub neb a dho dhe'n tyller may koedhas Asahel ha merwel a sevis stag.

²⁴Mes Yoab hag Abishay a helghyas war-lergh Abner. Ha pan sedhis an howl, i a dheuth dhe vre Amma, usi a-rag Giagh war an fordh dhe wylvos Gibeon.

²⁵Mebyon Benyamin a omguntellas a-dro dhe Abner, hag i a dheuth ha bos unn bagas, hag i a sevis war wartha bre.

²⁶Ena Abner a armas dhe Yoab ha leverel, ‘A wra an kledha devorya bys vykken? A ny wodhes y fydh an diwedh hwerow? Pes termyn y fydh kyns ty dhe leverel dhe'n bobel may treyllyons dhiworth helghya aga breder?’

²⁷Yoab a worthybis, ‘Dell vew Duw, mar ny gowsses, yn sur y fia myttin kyns pub gour dhe asa helghya y vroder.’

²⁸Ytho Yoab a hwythas an korn, hag oll an bobel a hedhis; ny helghsons war-lergh Ysrael namoy na breseli na fella.

²⁹Abner ha'y wer a gerdhas oll an nos na dres an Araba; i a dreusis an Yordan, ha mos der oll an myttin, hag i a dheuth dhe Mahanaym.

³⁰Yoab a dhehwelis dhiworth helghya Abner; hag ev a guntellas oll an bobel. Yth esa kellys dhiworth gwesyon Davydh nownsek gour hag ynwedh Asahel.

³¹Mes gwesyon Davydh re ladhsa trihans gour ha tri-ugens a vebyon Benyamin ha gwer Abner.

³²I a gemmeras Asahel yn-bann, ha'y ynkleudhyas yn bedh y das, esa yn Bethlehem. Yoab ha'y wer a gerdhas der oll an nos na, hag i a dheuth dhe Hebron orth tardh an jydh.