Read Kernewek 2 Samuel 23 Bible Online

2 Samuel 23 - Kernewek bible

2 Samuel 23

¹An re ma yw diwettha geryow Davydh: Dargan Davydh mab Yesse, dargan an gour a veu drehevys yn ughel, an den untys a Dhuw Yakob ha'n kanor hweg a Ysrael:

²Spyrys an ARLOEDH a gews dredhov, yma y lavar war ow thaves.

³Duw Ysrael a gewsis, Karrek Ysrael a leveris dhymm: Ev neb a rewl tus yn ewnder, hag a rewl yn own Duw,

⁴ev a vydh avel golow an bora, pan sev an howl, yn myttin heb kommol, avel golewder wosa glaw a dhre gwels dhiworth an dor.

⁵A nyns yw ow chi yndella gans Duw? Rag ev a wrug genev kevambos bys vykken, ordenys yn pup-tra ha sur. A ny wra ev gul dhe skylla oll ow selwyans, ha'm desir?

⁶Mes an vilens a vydh oll avel dreyn yw tewlys dhe-ves, rag ny yllir aga hemmeres y'n leuv;

⁷ha'n gour a's toch a arv y honan gans horn po sheft guw; hag y'n tan i a vydh leskys glan y'n keth tyller na.

⁸An re ma yw henwyn an gasoryon esa dhe Davydh: Yeshbaal[22] an Hakmonyas;[23] ev o chyf an Tri; ev a dhrehevis y wuw erbynn eth kans neb a ladhas war unn dro.

⁹Nessa dhodho o Eleazar mab Dodo an Aghoghyas, onan a'n tri hasor gans Davydh pan dhefisons an Filistysi esa kuntellys ena rag batel, ha gwer Ysrael a gildennas.

¹⁰Ev a sevis ha gweskel an Filistysi bys pan veu y dhorn skwithys ha glena orth an kledha. An ARLOEDH a dhros trygh meur y'n jydh na. Ha ny dhehwelis an bobel war y lergh marnas dhe breydha.

¹¹Nessa dhodho o Shamma mab Age an Hararyas. Ha'n Filistysi a omguntellas yn Lehi, mayth esa splatt leun a lentilow; ha'n bobel a fias a-dherag an Filistysi.

¹²Mes ev a sevis ena yn kres an splatt, ha'y dhefendya, ha ladha an Filistysi; ha'n ARLOEDH a dhros trygh meur.

¹³Tri a'n deg chyf warn ugens eth yn-nans, ha dos dhe Davydh yn termyn trevas bys kav Adullam, hag yth esa bagas a Filistysi ow kampya yn nans Refaim.

¹⁴Y'n termyn na, yth esa Davydh y'n ger, hag yth esa savla-goelyadoryon an Filistysi yn Bethlehem.

¹⁵Davydh a yeunis ha leverel, ‘Unnweyth a rolla nebonan dhymm diwes a'n dowr dhiworth puth Bethlehem usi ryb an yet!’

¹⁶Ena an tri hasor a herdhyas a-ji dhe gamp an Filistysi ha tenna dowr yn-mes a buth Bethlehem usi ryb an yet, ha'y dhri dhe Davydh. Mes ny vynnas y eva; hag ev a'n dinewis yn-mes dhe'n ARLOEDH.

¹⁷Hag ev a leveris, ‘An ARLOEDH difenn, my dhe wul hemma. A nyns yw hemma goes an wer neb eth orth peryll aga bewnans?’ Ha ny vynnas Davydh y eva. An traow ma a wrug an tri hasor.

¹⁸Abishay broder Yoab mab Seruya o chyf an Tri. Ev a dhrehevis y wuw erbynn tri hans ha'ga ladha, ha gwaynya hanow gans an Tri.

¹⁹A nyns o ev an moyha enorys a'n Tri? Ev a dheuth ha bos aga haslewydh, kyn na veu reknys yn mysk an Tri.

²⁰Benaya mab Yehoyada, kasor galloesek dhiworth Kasbeel, oberer a lies gweythres; ev a weskis dew vab Ariel a Moab.[24] Ev eth yn-nans ynwedh ha ladha lew a-ji dhe bytt yn dydh erghek.

²¹Hag ev a ladhas gour a Ejyp, teg y semlans. Hag yth esa guw yn leuv gour Ejyp; mes ev eth yn-nans dhodho gans lorgh, ha kachya an guw yn-mes a leuv gour Ejyp, ha'y ladha gans y wuw y honan.

²²An traow ma a wrug Benaya mab Yehoyada, ha gwaynya hanow gans an Tri hasor.

²³Ev o gerys-da yn mysk an Deg warn ugens, mes ny veu reknys yn mysk an Tri. Ha Davydh a'n settyas war y withysi.

²⁴Yn mysk an Deg warn ugens a veu Asahel broder Yoab, Elhanan mab Dodo a Bethlehem,

²⁵Shamma an Harodyas, Elika an Harodyas,

²⁶Heles an Paltyas, Ira mab Ikkesh an Tekoyas,

²⁷Abiezer an Anathothyas, Mebunnay an Hushathyas,

²⁸Salmon an Aghoghyas, Maharay an Netofathyas,

²⁹Heleb mab Baana an Netofathyas, Ittay mab Ribay dhiworth Gibea a vebyon Benyamin,

³⁰Benaya an Pirathonyas, Hidday dhiworth goverow Gaash,

³¹Abi-albon an Arbathyas, Azmaveth an Barhumyas,

³²Eliaghba an Shaalbonyas, a vebyon Yashen, Yonathan,

³³Shamma an Hararyas, Ahiam mab Sharar an Hararyas,

³⁴Elifelet mab Ahasbay, mab an Maakathyas, Eliam mab Ahithofel an Gilonyas,

³⁵Hesro an Karmelyas, Paray an Arbyas,

³⁶Ygal mab Nathan a Soba, Bani an Gadyas,

³⁷Selek an Ammonyas, Naharay an Beerothyas, deger arvow Yoab mab Seruya,

³⁸Ira an Ithryas, Gareb an Ithryas,

³⁹Uria an Hittyas: i oll seytek warn ugens.